Read Zeme Naga JEREMIA 13 Bible Online

JEREMIA 13 - Zeme Naga bible

JEREMIA 13

¹Tingwang ne aigum ze achu rang lei; “Tat ze banutpaî lui lu ze ning kia ge ’ngkang gai lau, zai chize hedui ge sûm gai se lau,” zeu.

²Dadege Tingwang gu sam luigum ze I mi kia ka’ngkangbe-paî lui lu, a kia ge ’ngkang gai de lei.

³Zai Tingwang gu sam lua pakenabe a dage wang ze,

⁴“Mi kia ka’ngkangbe-paî nang luilube, ning kia ge bambe tei lu, chu ze, Euphrates ’mbe tat ze chige tingchu-terialim kakge chilia ’mbe bai gai ne lau,” ze kacheu de lei.

⁵Dadege I tat ze Tingwang ne samdiegaibe luigum ze, chize Euphrates geukung ge bai gai de lei.

⁶Zai tingnaimikpui misonggabe châng dege Tingwang ne achu rang ze, “Chu lu Euphrates ’mbe tat lu, chi gene mi kia ka’ngkangbe-paî, ningchu I bai gai ra diegaibe ze lu le lau,” kacheu de lei.

⁷Chidadege Euphrates ’mbe I tat lu mi kia ka’ngkangbe-paî I baigai’ndibe bâm gene chize kuipat lu ze lu de lei. Zai pie le lau, mi kia ka’ngkangbe-paî sia di de lei; mâ-hangge du chize yi ta di de lei.

⁸Chidadege Tingwang sam a dage wang de lei:

⁹“Tingwang ne aigum ze rang lei: Aigum daze Juda gechîrettewbe benai Jerusalem gechîrettewbe I ne tew’nsia ’ndu lei.

¹⁰Aipau kesiabe ziemmena ramme a sam ’ngkingmeume, penui kunrachi ze penui ne nei-nei ’mbe tewtat ti zai kêdabe hera ramme chai penui sui, zai penui je kellum ra tatme â aipau mi kia ka’ngkangbe-paî, mâ-hangge du yi tadibe zat gum gu lei.

¹¹Mi kia ka’ngkangbe-paî ’mpeumi kia ge ’nnaigitbambe gum ze Israel kibaume leine benai Juda kibaume leine a dage ’nnaigit ze bam ra I tew gai lei, ze Tingwang ne kacheu de lei, dezai a hangge penui ziemmena hejiyibe, getoabe, zai pengêudibe chang gu lei, kane penui ’ngking mak lei.

¹²“Aipau sam ze nang penui dage salia ra lei: ‘Tingwang Israelme Rapeu ne aigum ze rang lei, “Wain bung leine wain ne bampuigit ra lei,” zeu,’ ze acheu zeu. Zai ningchu penui ne, ‘Wain bung leine wain ne puigit bam ra lei be anui chî mak mei?’ ze acheu gu lei.

¹³Dezai penui je nang acheu ra lei, ‘Tingwang ne aigum ze rang lei: Pie le lau, heramdeiname leine je meneuhiam gai ra I tew gai gu lei; Dabidbe gu heguang-bamrak ge heguangme ka’ntaume, tingkume, kemeume, zai Jerusalem name leine jeu.

¹⁴Zai I ne penui karai getau ra tew gai gu lei, pe peume benai pe name karai ge zeu, ze Tingwang ne kacheu de lei. Penui je I ngau’nggia ra mak, I gesut ra mak zai ’nggia ra mak zai penui je I tew’nsia mak ta ra mak lei,’ zeu,” ze acheu zeu.

¹⁵’Ngking le lau, keditew se lau, Tingwang ne rang gai daseu.

¹⁶Pa ne kemuîbe teiwangrabe suage Tingwang ningnui Rapeu je hengêu pei lau, peloa’ntûm peireige muîrambe ge ning pî ’nraprabe suage, zai kebabe nang peube luage, pa ne chize muîwang ra tewkeli gai, zai muî’ntip de ra tewgairabe suage zeu.

¹⁷Kane ningnui ne ’ngking mak tizai â, ningnui gechîrettewbe gene a keringbe â reine ze hap ku de lei; a mikdui lua ze I hap-desang gu lei. Tingwang gu melidung je kebang nîmtattibe ziegeneu.

¹⁸Heguang benai heguangpui je salia be lau: “Bâm kenabe ge ’ntau lau, ningnai peî gene ningnai gu heguang peichûp peluîyibe ze ’ngngaîkeu di daseu,” acheu zeu.

¹⁹Negeb gu namdi ramme â kainam ’nda, mî de latpatrabe kau ga lei; Juda leine je kebang hang nîmtat ’nda, kebang hang nîmtat ’nzâu de lei.

²⁰“Ningnui ma ’ngngangchu lu ze tingpeî ’mbia gene wangme je pie gai ni lau. ’Ndaige ningchu pei bei be, ning gu peluiyibe melidung ze la lau?

²¹Ning kangme chang ra nang ne geteiliagaibeime ne ning peireige bam ra penui ne tewgaibeibe luage nang ’ndaikau tew lei acheu ra lau? ’Mpuimi henalung ra kakeribe gum ze nang beted’nsî mak ta ra se mei?

²²Zai ‘’Ndaitew ze airamme a peireige wang lau?’ ze ning lung ge acheu sa dezai, chize â ning gu hemui-helut zene lei, ning nî gâu’ndibe benai ka’nggibe liebe zeu.

²³Ethiopiame penui geî helei dui gu mei, makchai keriakkau ne pe giak ramme helei dui mei? Chidezaine ningnui tâ-kesiabe tewpenîmtew-ze-bamme du tâ-keyibe tewchi du dezei lau.

²⁴Chêurie tingkangram ge tingkai ne guitua gum ze ningnui je I ne gechaîrarip kai gu lei.

²⁵Aipau ze ning gu hedam lei, hedam ningchu I ’ndetpatkaibeibe zeu, ze Tingwang ne kacheu de lei, nang ne achu ’ngngaî nan ze karasa ge ’nnumtewbe ziegeneu.

²⁶I ne ning nî ramme ning ju ge gâuchu gai gu lei, dezai ning gu ka’ngngambe ngau de ra hangge zeu.

²⁷Ning gu mi ngauhingbe katenetbe ramme, nang kahemabe ramme, zai hekunsei kuâ ramme, nang peningkâm ge, zai peloa ramme peireige peluîyibe heraluîtewbe ramme I ngau lu de lei. Ning duângga gu lei, Hei Jerusalem gau! Ningchu ’ntew’nchi gai ra ’ndaitie beting bam gai ra rei lau,” ze kacheu de lei.