Read Zeme Naga JEREMIA 14 Bible Online

JEREMIA 14 - Zeme Naga bible

JEREMIA 14

¹Tingwang gu sam naichiê- rakûm tedeu ge Jeremiabe dage wangbe:

²Juda ne desui ze bam lei, zai pe gu keriekemui ramme peran-gakeu de lei; Pe gu ziemmena kedei ge heu ze hap bam lei, zai Jerusalem ka’nrungbe kuâ chu de lei.

³Pe gu ziemmena kedime ne penui gu tiâkelame je heduituak ra lang gai lei; penui dekuaki ge wang da, penui hedui ngau mak lei, penui gu heli ramme perua ze penui helatwang kadai lei; penui ’ngngam di, zai ’nningchi ta di ze penui peî ramme ’ngkumnam de lei.

⁴Kedei peduângga di de lei, heram peireige tingruibe ’nggadibe ziegene helu tâ tewme ka’ngngam de lei, penui peî tapchim de lei.

⁵Reheuneu ’nggabe zieggene, peningkâm ge hetipui du pe poine lungkeu karchibe je put kai ’ndi de lei.

⁶Hênam-hekunmerâng’nsei ramme peloa’ntûm ’ndupuangbe ge sap lu, munserung gum ze tingkai ’mmua ze bam lei, reheuneu gadibe ziegene penui mik ran-ga de lei.

⁷“Anui gu hemui-helut ne anui je kesia’ndam gai leusedu, Hei Tingwang, ning ji gene tâtew gai lau; anui hechai’ngngîndibe kie-desang de lei, ning dage anui ne hemui gai ’nde lei.

⁸Hei nang Israelme kaheguîpeu, kahereube luage pechu ’nripatpeu, ’ndaitew ze nang heram lungge hesang’mpeu gum ze bam ra lau, tebeîtewpeu himmui de ra kezitkuapeu gum zeu?

⁹’Ndaitew ze nang ziemmena mâ-’nningchitadipeu gum bam ra lau, ziemmena peranchipeu tew’nringchilakpeu gum zeu? Sedu Hei Tingwang gau, nang â anui ruage lamui lei, zai ning ji ne anui je ku gai lei; anui je sâu gai se lau,” kacheu de lei.

¹⁰Aipau ziemmename tedeu ge Tingwang ne aigum ze rang lei: “Aigum ze kezitrua ra penui ’nchâ di de lei; penui pî ramme penui tatsau mak lei; chipauziegene Tingwang ne penui je lu gai mak lei, chuna â penui gu hemui-helut pa ’nningdau gu, zai penui gu hemui ziene tewsâ gu lei,” zeu.

¹¹Tingwang ne achu rang lei: “Aime hangge yirabe hangge kellum se lau.

¹²Penui teseurei leusedu, penui ka’nrungbe I ’ngking ra mak lei, zai rûkambe-râtewbe benai mâ-himlei-râtewbe peipat leusedu, chiramme ze I lu ra mak lei; kane chiramme ze hiazutkie ne, herakûm ne, zai herarît kechibe ne I ne tew’ngga kam ’ndu lei,” kacheu de lei.

¹³Chidadege I ne sa ze: “Hei Tingwang Hera gau, pie le lau, kemeume ne penui je rang lei, ‘Ningnui hiazutkie mei nune, herakûm mei je du ngau ra mak lei, kane aipau bâm ge ningnui je I lungkatemibe pei ’nde lei,’ zeu,” ze kacheu de lei.

¹⁴Zai Tingwang ne achu rang lei: “A ji gene kemeume ramme karasa ne sampau lei; penui je I lang gai mak, sam du die gai mak, penui je ’mpau de ’mpau gai me lei. Ningnui je penui â keliâbe karasa pau ka’nzie lei, pemîgabe hedachakbe, zai penui ka’nningbe ramme kechoabe geneu.

¹⁵Dadege kemeume ramme I ne penui je lang gai mak sedu a ji gene sampaume, ‘Hiazutkie benai herakûm aipau heram ge wang ra mak lei,’ kacheume tedeu ge Tingwang ne rang lei: Hiazutkie benai herakûm gene chi kemeume ramme je tew’ngga kam ’ndu lei.

¹⁶Zai kemeume ne sampaugaibe ziemmena ramme je â Jerusalem ’mpuîhimdi ge tuâpat kai gu, herakûm benai hiazutkie gene chaime chang gu lei, mî de penui je bairabe kau ga gu lei—penui, penui nâume, penui na rehangme zai penui na heleume leine jeu. Penui peireige penui kesiabe I ruîpat kai gu daseu.

¹⁷“Aipau sam ze penui je nang salia ra lei: ‘Peize kemuî-keba a mik ge hemikdui ne lua bam lau, zai peize chize sau se lau, a gu ziemmename na ’mpuimi leusangka’nchipui je hejâm kedibe ne, pecheu chi-kadesangbe ne tew’nteu gai bei daseu.

¹⁸Peningkâm ’mbe I zuapat dege, pie le lau, hiazutkie ne bibeime je ngau de lei, zai namdi ’mbe I gut dege, pie le lau, herakûm gu herarît bam de lei, kemeume benai tingkume heram pelane ge penui helîkahedet te lei, zai penui mâ-gechîbe ga lei,’ zeu,” ze acheu zeu.

¹⁹Juda je nang tuâpat ’ntie di de mei? Zaion je ning gu keringbe ne ngautenet ti de mei? Anui je tew’mmi lak ra ’ndaitew ze nang anui je lak lau? Lungkatemibe ze anui peu da kane keyibe wang mak lei, tewka’mmibe ting ze peu da, kane pie le lau, mi kehingbe ngau lei.

²⁰Anui kesiabe anui chiliâ gai lei, Hei Tingwang gau, zai anui peume gu hemui-helut chiliâ gai lei, ning dage anui hemui gai ’ndi daseu.

²¹Ning ji hanggene anui je tuâpat kai se lau; ning gu heguang-bamrâ pengêudibe ze pengêu tew’ngga se lau, chibam lau, zai anui dage ning gu samhatkaibe ze tewtap se lau.

²²Heramzat ramme gu hera karasame ruage mige â, tingruibe teiwangduime la mei? Makchai tinggîm ji ne tingsim peichiduime la mei? Hei! Tingwang anui Rapeu gau, chipaupeu ze nang de mak ti lau? Ning dage anui kaheguîbe kai lei, airamme leine nang ne tew gai daseu.