Read Zeme Naga JEREMIA 15 Bible Online

JEREMIA 15 - Zeme Naga bible

JEREMIA 15

¹Dadege Tingwang ne achu rang ze, “Mosabe benai Samuelbe ne a suage sap leusedu, aipau ziemmename lam a lung ’nreiwang ra mak lei, a mikngau gene penui je kelitua ne zu lau, zai peize penui tatchu lau!

²Zai ‘Anui ’ndai’ngge tat kai ra lau?’ ze penui ne ningchu ’nneu dezai penui je nang acheu be lau, ‘Tingwang ne aigum ze rang lei: “Herarît kechibe gene chairame herarît gene chai gu, hiazutkie gene chairame hiazutkie gene chai gu, herakûm gene chairame herakûm gene chai gu, zai kebang changrame je kebang hang nîmtat ku lei,” acheu zeu’ ze kacheu lei.

³“Penui peireige tew’nsiarabe zat medai I kai gu lei, ze Tingwang ne rang lei: bichat ra hiazutkie, chak desuirui gai ra hetei ramme, zai teu kam ne ra, zai tew’nsia kam ne ra tingkai ge ’nruine liamruabe ramme, kedei ge hekaune ramme je I kai gu lei.

⁴Zai Hezekiabe na Manassebe, Juda gu heguang ne Jerusalem ge ’ndaikau tew gai ’ndi mei be ziegene kedeirei heguangram leine suage mi ngauhingbe penui je I tew gai gu lei.

⁵“Hei Jerusalem gau, châu ne ning peireige ngauka’nggiabe bam ra, zai châu ne ningchu desui ra lau? Châu ne ’nreiwang lu ning deu yirabe ’nneu ra lau?

⁶Nang ne achu tuâpat ’ndi de lei, ze Tingwang ne kacheu de lei, nang â hechai’ngngîntat ze bam di lei; daze ning peireige a ba getuapat kai ze tew’nsia gai de lei. I gesut-lei di de lei.

⁷Heram gu keriekemui ramme gene kakelapbe-kuak ne I ne penui je kelaptua ’nde lei; I ne penui je tewchat ’nda, a gu ziemmename je I ne tew’ngga kam de lei; penui ’mpuî ramme gene penui ’nreiwang mak lei.

⁸Sungkling ge deseî suadu kie ze pe gu kemîpui ramme I ne tew gai de lei; tîngnarî ge tewka’nsiapeu je rehangme ramme pui peireige I teiwang gai ’nde lei; kehapbe benai kehingbe penui peireige wang’nnua ra I ne tew gai de lei.

⁹Hangsename je lungkeupui kadesui de lei; pa pe jiesia di de lei; ’nrîmbeting ge pe gu naimik kêu di de lei; pechu tew’ngngam gai bei de lei, zai pengêu tew’ngga gai bei de lei. Zai kêdame je â, penui teureime suage hiazutkie mui ge I ne pei gai ’ndu lei,” ze Tingwang ne kacheu de lei.

¹⁰A duângga de lei, a pui gau, heram pelane dage ’nggi zai getube kau je nang lungkeugaibe zeu! I hepuk du hepuk kai mak zai ’nteulêu gai mak lei, kane penui ’nteumena achu deset kai lei.

¹¹Hei Tingwang gau, penui keyibe hangge I kie gai mak tizai â, kahereube benai mi duânggabe luage a teureime kelei ge I ning dage kiâm gai mak tizai â, aigum ze peize acheu du lau!

¹²Mige â hegeî tingpeî ’mbia gu chi hetageî kakebutbe hegeî ze tewbetduibe kau la mei?

¹³“Heram leine ge ningnui gu hemui leine hangge, ningnui keheube benai ningnui heurâ ramme, pemî lu mak ze hereichâ hangge I ne pei kam ’ndu lei.

¹⁴Nang ne chimakbe heram ge ning teureime guâ ’nggua ra ningchu I tew gai gu lei, a lumpumbe ziegene hemi’ntau gai ’nde lei, betingbeta ningnui dage tau bam ra hangge zeu,” kacheu de lei.

¹⁵Hei Tingwang gau, nang ne chî lei; achu chibam lau zai achu ’ngkiâmie lau; zai achu tewsâme peireige a kelei ge hekûm lu gai lau; nang liechibe gene achu teitat se lau; ning hang ziegene ka’nrube I liebe ze nang chibam lau.

¹⁶Ning sam ramme ngaudau lu chiramme I teu de lei, zai ning sam ramme a hangge hesuiyibe chang di de lei, zai a lungsuika’ntabe hang chang di de lei; ning ji gene achu kû gai bei daseu, Hei Tingwang, baudime gu Hera gau.

¹⁷Penui suiyika’ntame ruage I ’ntau gai mak lei, zai a suiyi’ntagaihâ mak lei; a runne I ka’ntau lei, a peireige ning ba bambe ziegeneu, nang ne a dage ning lumpumbe kaipuigitkai’ndibe ziegeneu.

¹⁸’Ndaitew ze I geteube ze sau mak lau, ’ndaitew ze a jâm tew’mmichi lak lau, ’ndaitew ze tew’mmigailak bam lau? A hangge nang â, ’nnumtew-ra-gabe ’nggeubak chang de ra de mei, hedui chiptibe gum chang de ra de mei?

¹⁹Chidadege Tingwang ne aigum ze rang lei: “Nang ne helatwang bei zai â, ningchu I teiwang gai dai gu lei, zai nang a masuage sap ku lei. Pemîgabe sam nang sa mak ze pemîhungbe sam nang sa dizai â, nang ze a mui gum chang gu de lei. Penui ning tailam ’nreiwang gu, kane penui tailam nang ’nreiwang ra mak lei.

²⁰Zai aipau ziemmena ramme dage kangngâgeî ne tewlube keriengdi gum ze ningchu I tew gai gu lei; penui ne ningchu ’nggi gu, kane ning peirei penui ne wang ra mak lei; I ning dage bam daseu, ningchu tew’nring gai ze ripat kai ra hangge zeu, ze Tingwang ne kacheu de lei.

²¹Helungriaksiame ba gene I ningchu lupat kai gu lei, zai katîmphime dagene ningchu I meupat kai gu lei,” ze acheu zeu.