Read Zeme Naga JEREMIA 16 Bible Online

JEREMIA 16 - Zeme Naga bible

JEREMIA 16

¹Tingwang gu sam a dage wang ze acheu sa ze:

²“Ning nâu kû mak ra lei, ning na ’mpeumi mei nu ’mpuimi mei du aipau bâm ge bam mak ra lei.

³Aipau bâm gene lungkeume na rehangme zai heleume deu ge, zai aipau heram ge hêpuime penui je lungkeume zai hêpeume penui je piakeume deu ge aigum ze Tingwang ne rang daseu:

⁴Herarît kesiabe gene penui chai gu lei. Penui je puîhap kai ra mak zai bai de bai ra mak lei; penui â kedei ge keratum gum gu lei, hiazutkie gene benai herakûm wangbe gene penui ga kam gu lei, zai penui kechaipum ramme ze â liamruabe ’nruine ramme benai kedei ge hekaune hetak hang chang gu lei.

⁵“Aigum ze Tingwang ne rang daseu: kadesuime ki ge gut se lau, zai puîhap kai ra tat ze penui je puîhap se lau; aipau ziemmename dagene a gu desieyibe I teitat ’ndaseu, ze Tingwang ne kacheu de lei, a gu hungka’ntipbe benai ngauka’nggiabe zeu.

⁶Aipau heram ge kedi-kecheime chai gai gu lei; penui je bai gai ra mak lei, zai penui hangge mî ne de puîhap kai ra mak lei, zai penui hang ziegene mî du penui runne penui peîtam chiap ra mak, zai penui peî gut ra mak lei.

⁷Penui kechaikadesuime je tum gai ra hang mî ne du tingku tiapat kai ra mak lei; penui peu hang mei nu penui pui hang mei du mî ne penui je tumgairabe-piak sak ra pei mak ra lei.

⁸Luube-ki ge penui je ngua’ntau ze, teu ze sak ra du nang tat mak ra lei.

⁹Baudime gu Tingwang Israelme Rapeu ne aigum ze rang lei: Pie le lau, ka’nnuibe kuâ benai hesuiyika’ntabe kuâ, henâukupeu kuâ benai meipui kuâ aipau bâm gene sauzîng de ra ningnui mikngau ge benai ningnui ting ge I tew gai gu lei.

¹⁰“Zai aipau sam ramme aime je nang salia dezai, penui ne ningchu, ‘’Ndaitew ze ai kesiabe kedibe Tingwang ne anui peireige sa gai lau? Anui gu hemui-helut ’ndaikau la lau? Tingwang anui Rapeu dage ’ndaikau hemui tâ anui ne tew gai ’ndi lau?’ acheu dezai

¹¹penui je nang acheu ra lei: ‘Ningnui peume ne achu putkai’ndibe ziegene, zai hera kêdabe ramme je suitat ze penui guâ ’nggua zai kellum di, zai achu put kai lu, a gu hingde tei mak,

¹²zai ningnui peume suadu ningnui kesiabe tew’ngkeudibe ziegene, pie le lau, haimena pe gu kesiabe suî’nning sui di, a kuâ ’ngkingmeu lei;

¹³chipauziegene ningnui je aipau heram gene I ne tuâpat ’ndu lei, ningnui mei nu ningnui peume mei ne chimakbe heram geneu, zai chige ningnui kemuî-keba hera kêdabe ramme guâ ’nggua gu lei, ningnui je I ngau’nggia ra mak daseu, acheu ze Tingwang ne rang lei,’ ze kacheu lei.

¹⁴“Chidaze pie le lau, ‘Ijipram gene Israel ki chaname je nguapatkaipeu Tingwang bam-bambe ziegene’ acheu ze sa ta di ze,

¹⁵kane ‘Pa ne penui je kelipatkaibe bâm ’nreibe heram benai heram ramme leine gene Israel ki chaname je nguapatkaipeu Tingwang bam-bambe ziegene’ acheu sarabe ting ze wang mui de lei, ze Tingwang ne kacheu lei. Penui pau-paime je I peigaibe penui ram singbe ge I ne penui je nguawang gai dai gu dadegeu.

¹⁶“Pie le lau, hekâ nîmme misongga wang ra hangge I lang gai gu lei, zai Tingwang ne kacheu de lei, zai chime zene penui je nîm gu lei; zai chipau chângge hênamruame misongga wang ra I kelau gai gu lei, zai penui ne chime je kedeiloa’ntûm leine ge zai peloangria leine ge, zai tingchu teria limkak gene heteugua gu lei.

¹⁷A mik â penui ’mpuî leine ge la daseu; chiramme ze a dagene ’mbai mak, penui gu hemui-helut ramme ze du a mikngau gene ’mbai ra mak lei.

¹⁸Zai penui gu hemui-helut ramme benai hemui ze dêt na I peiruî gu lei, penui ne a gu heram ze ngaukatenetbe heraluîtewbe gu herum ramme ne tew hebâ kam’ndibe ziegeneu, zai penui gu ngaukatenetbe ramme ne a heurâ ramme ge kaipui’ndibe ziegeneu,” ze kacheu de lei.

¹⁹Hei Tingwang, a ranchi benai a gu keriengdi, kahereube mai ge a ’mbaibâm gau, ning dage kedei deulangbe gene heramzat ramme wang lu ze: “Anui peume ne karasa benai pemîgabe ramme chige pegiêgabe zangno mâ de nguaheu mak lei.

²⁰Ziemmena ne pe runne pe hangge hera ramme chiamchi duî mei? Chiramme â hera ramme mak lei!” ze acheu gu lei.

²¹“Chidaze, pie le lau, penui chî ra I tew gai gu lei, aize lua kat a gu tâtewchibe benai a ranchibe penui chî ra I tew gai gu lei, dezai a ji â Tingwang lei be penui chî gu lei,” kacheu de lei.