Read Zeme Naga JEREMIA 17 Bible Online

JEREMIA 17 - Zeme Naga bible

JEREMIA 17

¹“Juda gu hemui â hegeî gu leisitang ne raw gai ’nde lei; diamond tûnroi ’nrinbe ne penui lungchêu ge benai penui gu herâtewbe-kaira kie ramme ge ’nrit kai ’nde lei.

²Penui na ramme penui gu herâtewbe-kaira benai penui gu Ashera râ ramme je ngaube luage, ’ndiakribe hingbang leine taige benai kedeiloa ’ntûm leine peireige,

³heram ’ndupuangbe kedeiloa ’ntûm peireige zeu. Ningnui keheube benai ningnui heu leine heram leine ge ningnui gu hemui mî hangge, hereichâ hang I pei ’ndu lei.

⁴Ningnui je heram I peibe ningnui ne sâu gai ’ndu lei, zai heram ge ningnui ne chimakme ningnui teureime je ningnui ne ’nggua ra I tew gai gu lei, betingbeta taubamrabe hemi ze a lumpumbe gene I ne ’ntau gai bei daseu,” ze kacheu de lei.

⁵Tingwang ne aigum ze rang lei: “Ziemmena je ’nnumtewme, zai pe ba ranchibe hangge hemeipum ran je ’nnumtewme, Tingwang dagene pe lung ’nnuktime je â deset kai ’nde lei.

⁶Pa â tingkangram ge reheubang gum lei, zai keyibe wangchang be mâ de pa ngau ra mak lei. Pa â hênamchangberam kedei changbe bâm ’nchaîkumberam mî de lungmakbe bâm ge bam gu lei.

⁷“Tingwang ge ’nnumtewbe kau, pa ’nnumtewbe Tingwang ge bambe kau ze yi de lei.

⁸Pa â hedui hiage hingbang taugaibe bang hedui tering geukung ge pemahiampatbe gum lei, kelumbe wangbe ze pa hing mak lei, pebang ge peneu ’ndiakri bam bei dadegeu, zai naichiê-rakûm wangbe tingkum ge pa â ’nninghereu mak lei, pechî ’nchikeusau mak bei dadegeu,” ze acheu zeu.

⁹Mi lung zene mâgetaleine suadu choachi lang lei, zai sia-kadesang lei; châu ne chize chî dui lau?

¹⁰“I Tingwang ne helung ka’nningbe ze peu lei, zai helung ze kakedak lei, ziemmena leine je pa kebambe tak luigum pei be ra, zai pe tatew rachî luigum pei gai be ra hangge zeu.”

¹¹Hekuaipui pa ne gûm’ngkakkaimakbe ruipoine je teiwang gum ze, mige keheube betâumakbe gene ngaupeu ze chigum lei; pe rîting sing ge chiramme ne pechu sâu gai gu lei, zai pe hangge beting hetûnwang dezai, pa kemiebe kau chang gu lei.

¹²Pengêudilangbe heguang-bamrâ bepîbang gene kehube ge bambe ze, anui gu ka’nchibeki bambe bâm de lei.

¹³Hei Tingwang, Israelme gu kaheguîbe bangpui gau, ningchu putkaime leine je â, tew’ngngam gai gu lei; ning dagene ’nnuktattime je â, kedei ge penui ji raw gai gu lei, penui ne Tingwang je put kai ’ndi daseu, keringbe hedui-depin jeu.

¹⁴Achu tew’mmi gai lau, Hei Tingwang gau, dezai I yi du lei; achu tew’nring gai lau, dezai I ring du lei; nang â a gu getoabe bangpui daseu.

¹⁵Pie le lau, penui ne achu, “Tingwang gu sam ’ndaige la lau? Peize chize wang lau!” kacheu de lei.

¹⁶Kesiabe lang gai ra ningchu I ngit me lei, pausiabe tingnaimikpui du I ’nchâ me lei be nang chî lei; chi a mui gene pattibe ze ning masuage lamui lei.

¹⁷A hangge mi kehingbe peize chang se lau; naimikpui siabe mai ge nang ze a ’mbaibâm lei.

¹⁸Achu tewsâme je peize tew’ngngam gai be lau, kane achu â peize tew’ngngam gai se lau; peize penui duângga gai lau; kane achu peize a duângga mak bam lau; penui peireige kesiabe tingnaimikpui teiwang gai be lau; penui je tewka’nsiabe dêt na kai ze tew’nsia gai be lau!

¹⁹Tingwang ne aigum ze achu rang lei “Benjamin Keriekemui ge tat ze sap kai lau, Juda gu heguangme gut-ze-patbe gezeu, zai Jerusalem Keriekemui leine gezeu,

²⁰zai acheu sa gai lau: ‘Tingwang gu sam seu le lau, aipau keriekemui ramme gene gutme ningnui Juda gu heguangme, zai Judaram leine, zai Jerusalem name leine gau.

²¹Tingwang ne aigum ze rang lei: ningnui keringbe hangge ’ntîng le lau, zai ’ntakbambe mai ge heput keritbe pung se lau, zai Jerusalem keriekemui ramme gene du punggut se lau.

²²Zai ’ntakbambe mai ge ningnui ki gene heput keritbe pungtat se lau zai mâ-mâ tâ tew se lau, kane ’ntakbambe mai ze rei’nchichiak ze rei lau, ningnui peume dage I samdie gai ’ndi gum zeu.

²³Sedu penui ne ’ngking mak zai penui kun ’ndualie mak lei, kane penui kunrachi zai geteiliabe ’ngking mak zai lu mak lei.

²⁴“ ‘Kane ningnui ne a kuâ ’ngking, zai ’ntakbambe mai ge aipau namdi gu keriekemui ramme gene heput keritbe ramme teigut mak, kane ’ntakbambe mai ze rei’nchichiak ze chipau mai ge mâ tâ du tew mak tizai â,

²⁵heguangme, Dabidbe gu heguang-bamrâ ge ka’ntaume, hekuntimriang ramme ge benai hekun ramme ge chua lu, penui benai penui gu heguangsinme, Juda gu ziemmena ramme, zai Jerusalem name aipau namdi gu keriekemui ramme gene gut ku lei; zai aipau namdi ge betingbeta lung bam gu lei, ze Tingwang ne kacheu de lei.

²⁶Zai ziemmename Juda gu namdi ramme, zai Jerusalem huâzie ge bambe bâm ramme gene, Benjamin gu heram gene, Shephela gene, zai peloaram gene, zai Negeb gene rûkambe-râtewbe peipatbe ramme, zai herâtewbe ramme, mâ-hîmra peipatbe ramme, zai keruta airamme hesuiyibe-râtewbe ramme tei lu Tingwang gu heki ge wang gu lei.

²⁷Kane ’ntakbambe mai ze rei’nchichiak ze reibam ra, zai ’ntakbambe mai ge heput keritbe pung lu Jerusalem keriekemui ramme gene gutmakrabe sam ze ningnui ne ’ngking mak tizai â, keriekemui ramme ge I ne hemitua gai gu lei, zai chigene Jerusalem gu heguangki ramme rû kam ’ndu, zai chize tew’mmit dai ra mak lei,’ acheu zeu,” ze kacheu de lei.