Read Zeme Naga JEREMIA 18 Bible Online

JEREMIA 18 - Zeme Naga bible

JEREMIA 18

¹Tingwang dagene Jeremiabe dage sam wangchangbe ze:

²“Chu lau, zai hegamli tewpeu ki lam’mbe wangkeu zu lau, zai chige nang a sam ramme seu ra I pei gu lei,” kacheu de lei.

³Dadege hegamli tewpeu ki lam’mbe I tatkeu de lei, zai chige pa pe gu hegamli kateleube mâ-gua tei lu laleu lei.

⁴Zai hegamli tewpeu ba gene pa depungkâng ne heli chiambe ze sia kam di de lei, zai chize pa kêdabe heli hangge tew kadai de lei, hegamli tewpeu dage tew ra yi-yibe tak geneu.

⁵Dadege Tingwang sam a dage wangchang de lei.

⁶“Hei Israel kibau gau, aipau hegamli tewpeu ne tew gum ze ningnui dage I tewchi lak mei? ze Tingwang ne kacheu de lei. Pie le lau, hegamli tewpeu ba ge depungkâng bam gum ze ningnui du a ba ge la lei, Hei Israel kibau gau.

⁷Heramzat mei nune heguangram mei je I ne tukpat lu zai tewkau lu, zai chize tew’nsia dui lei, ze I sabagaibe luage,

⁸zai chipau heram ge I ne saliagai’ndibe tedeu ge, penui kesiabe gene heliwang bei zai â kesiabe tew gai ra I ’nninggaibe gene I heli du lei.

⁹Zai heramzat mei nune heguangram mei ze I ne tew gai gu lei, zai sum gai gu lei, ze sabagaibe luage,

¹⁰chize a kuâ seu mak ze a mikngau ge kesiabe tew dizai â keyibe tew ra ’nninggai’ndibe gene I heli dai du lei.

¹¹Chunage chidaze Juda gu ziemmena benai Jerusalem ge lungme dage salia lau: ‘Aigum ze Tingwang ne rang lei, pie le lau, ningnui peireige tew’nsia ra I chiam la de lei, zai ningnui peireige tew gai ra ’ndei la de lei. Heliwang de lau, haimena pa kesiabe ’mpuî geneu, zai ningnui ’mpuî ramme benai ningnui tatew ramme teleu’mmi zu lau,’ zeu.

¹²“Kane penui ne, ‘Chize â peruânggabe lei! Anui runne ka’nsapbe anui â sui gu lei, zai anui kesiabe helung keikeulakbe luigum ze haimena tew gu lei,’ kacheu de lei.

¹³“Chidadege Tingwang ne aigum ze rang lei: heramzatme ruage aigum ze neu gai lau, aigumbe châu seu gai di lau? Israel leusangka’nchipui ne mi kiâkumakbe tâ tew gai ’ndi de lei.

¹⁴Lebanon gu kebun ne Sirion hekâuteria sâu gai ’ndi de mei? Kedeiloa ’ntûm gu hedui chang di de mei, chi hedui kahegeibe duiluabe geuki ramme zeu?

¹⁵Kane a gu ziemmename â achu ’ngngaî ’ndi lei, penui hera karasabe kau ramme dage perîmyibe ka’ntau lei, penui ’mpuî ramme, tingtie ’ngka gu ’mpuî kedibe ramme ge penui kau gai de lei, zai tatpeneimakbe ’mpuî ’mbe tat ti de lei, puidi ge mak zeu.

¹⁶Penui gu heram mi ngauhingbe heram hang tew gai ze, betingbeta ngauteruirabe zat hang tew gai lei; ’nteumena chige tatkame leine ne hingrim ze penui peî kezinkeluak tai de lei.

¹⁷Tingbia ’mbia gu tingkai gum ze heteureime suage penui je I hûtimrarip kai gu lei. A ju mak ze a chai penui je teilia gu lei, penui hereu-kadesangbe tingnaimikpui ge zeu,” ze kacheu de lei.

¹⁸Dadege penui acheu sa lei, “Wang lau, Jeremiabe peireige anui kesia’ndeitew kei lei, tingkume dagene hingde, kaningchingme dagene geteiliabe, zai kemeume dagene sam ze ga dai ra mak daseu, wang lau, anui ne mi lei ne pechu tewkeleu gai kei lei, zai pe sam ramme mâ de anui lutei mak kei lei,” acheu zeu.

¹⁹A kuâ lutei gai lau, Hei Tingwang gau, zai a kiamsam ’ngking gai lau.

²⁰Keyibe hangge kesiabe ne peiruî ra semei? Kane a keringbe hangge rehûmkuiki penui ne su gai de lei. Penui hangge keyibe salia ra ning suage ’ndaigum ze sap mei be ’nningtâu gai lau, penui dagene ning lumpumbe ze tei’mbia ’nde ra hangge zeu.

²¹Chidaze herakûm hangge penui name je peipat kai zu lau; hiazutkie gu rezie ge penui je peipat kai ’ndu lau, peize penui nâu ramme hena bam ta de zu lau, zai peize kemîpui chang de zu lau. Herarît kechibe ne peize penui gu ’mpeumi ramme kechaibe hedau zu lau, penui gu rehangme je herei gene hiazutkie ne bichat ’ndu lau.

²²Penui peireige ka’nggime je nang ne ’nnangkuak ze teiwang gai dezai, penui ki ramme gene ka’nrungbe kuâ seu le ra hangge zeu! Achu lu le ra hangge penui rehûmkuiki rua lei, zai a pî rap ra hangge ’mpia tew gai lei.

²³Sedu, nang â, Hei Tingwang gau, achu tewchat ra kelutewbe leine chî lei. Penui gu hemui-helut ze lun se lau, ning mikngau gene penui gu hemui ze nuitua se lau. Ning suage penui je tuâpat ne lau; ning lumpumbe luage penui dage tâtew gai zu lau.