Read Zeme Naga JEREMIA 19 Bible Online

JEREMIA 19 - Zeme Naga bible

JEREMIA 19

¹Aigum ze Tingwang ne rang lei: “Tat chu lau, hegamli tewpeu gu hegambung lui le lau, zai baudime gu gechîngme benai tingku tewchîngdime hanggesame je ngua le lau,

²zai tingbia ’mbia keriekemui gutbe ge Hinnom na kâm ’mbe pat chu lau, zai chige ningchu sam ramme I saliabe ze sa gai lau.

³Nang acheu sa ra lei, ‘Baudime gu Tingwang Israelme Rapeu gu sam ’ngking le lau, Hei Juda gu heguangme benai Jerusalem ge lungme gau. Aigum ze baudime gu Tingwang, Israelme Rapeu ne rang lei, pie le lau, aipau bâm peireige aigum ze kesiabe chize keseume kun leine seubîng gai ra I ne teiwang gai mui de lei.

⁴Penui ne achu sâu gai nan ze penui pau-paime benai Juda gu heguang ramme ne chize chimakbe hera kêdabe ramme dage mâ-perîmyibe ramme chige ’ntau gai ze aipau bâm tewhebâgai’ndibe ziegene de lei; zai pemâugame jai ne aipau bâm ge tewpui gai de lei,

⁵zai a lung ge I ne ’nningdaugaimakbe zai I ne tew ra diegaimakbe Baal-râ hangge rûkambe-râtewbe hangge penui name je rû gai ra, Baal râ je kellum ra, pebâm hube ramme tewgaibeibe ziegene lei;

⁶chipauziegene pie le lau, aipau bâm je Hinnom na kâm mei nune Topheth acheu kû ta ra, kane kegîbe kâm, ze kû ra beting hang wang mui de lei, ze Tingwang ne kacheu de lei,

⁷Zai aipau bâm ge Juda benai Jerusalem gu mâ-’nsapka’ntuabe tew’ngga kam gai gu lei. Zai penui gu ziemmename je penui teureime suage hiazutkie gene, zai penui je tewchat ra penui ba gene kau ra tew gai gu lei. Zai liamruabe ’nruine ramme benai kedei ge hekaune ramme hetak hangge I pei ’ndu lei.

⁸Zai aipau namdi ze mi kehingbe mi ngauteruigau ra hang I tew gai gu lei; mi-mige chige tatka’ngguakme ne mi duânggabe daube ngau lu ningdaulak ze penui peî kezinkeluak bam gu lei.

⁹Zai penui name ’mpuimi benai ’mpeumi ramme je penui ne teu ra I tew gai gu lei, zai haimena tuaguâ’ndibe benai lungkahereube gene pe kiningme ji teu gu lei, penui teureime benai penui keringbe peume ne penui je tewsâ gu lei,’ ze acheu zeu.

¹⁰“Dezaine ningchu nguatatme ramme mikngau gene hegambung tewpâng gai ra lei,

¹¹zai penui je, ‘Baudime gu Tingwang ne acheu ze rang lei: aipau ziemmename benai aipau namdi ze I tewpâng gai gu lei, hegamli tewpeu gu heli mige ne tewpâng gum zeu, dezai chize mâdau de teleu’nchi dai lak ra hangge zeu. Kêdabe bâm ge bai gai ra gadibe ziegene ’mpeumi ramme zene Topheth ge bai gai gu lei.

¹²Aipau bâm benai chige lungme hangge aipau namdi ze Topheth gum ze bam ra I ne tew gai gu lei, ze Tingwang ne kacheu de lei.

¹³Jerusalem gu heki ramme benai Juda heguangme gu heki ramme—penui ki ’mpûm ramme gene tinggîm baudime leine dage mâ-perîmyibe rûgaime ki leine, zai kêdabe hera ramme dage sakbe-râtewbe ruîpatkaime—Topheth bâm je gum ze tewhebâ ’ndu lei,’ acheu ze salia lau,” ze acheu zeu.

¹⁴Dadege Tingwang ne pechu sam pau gai ra langgaibe bâm Topeth gene Jeremiabe wang de lei, zai Tingwang ki kiziêsua ge sap lu ziemmena leine dage salia ze:

¹⁵“Aigum ze baudime gu Tingwang, Israelme Rapeu ne rang lei, pie le lau, aipau namdi peireige benai pe gu namdi ramme peireige kesiabe leine I sabagai’ndibe ze I teiwang mui de lei, penui ne penui kunrachi ze a sam ramme seugailakbe ziegeneu,” ze kacheu lei.