Read Zeme Naga JEREMIA 20 Bible Online

JEREMIA 20 - Zeme Naga bible

JEREMIA 20

¹Chunage Tingkupeu Pashhurbe, Immerbe na, Tingwang gu heki ge saibe dilangpeu Jeremiabe ne airamme pauruabambe seu lu de lei.

²Dadege kemeu’mpeu Jeremiabe je Pashhurbe ne lak te lei, zai Tingwang ki gu Benjamin keriekemui ’nreibe ge pechu hekai kai ’ndi de lei.

³Bechaibe mai dege hekaikaibe gene Jeremiabe je Pashhurbe ne ’mpat kai dege, Jeremiabe ne pechu, “Tingwang ne ning ji Pashhurbe ze kû me lei, kane Magor-missabibbe ze ku lei.

⁴Aigum ze Tingwang ne rang daseu: Pie le lau, nang ze ning runne ningchu hingpeu hang, zai ning kangme hangge kehingpeu hang I ne ningchu tew gai gu lei, nang piebe luage penui teureime gu hiazutkie gene penui kau gu lei, zai Babilon gu heguangme ba ge Judame leine je I pei gai gu lei; Babilon ’mbe penui je pa kebang nîmtat gu lei, zai hiazutkie ne penui je bichat ku lei.

⁵Chipau peireige namdi heurâ leine, pe gu ngaube leine, pe gu getoabehi ngaulube leine, zai Juda gu heguangme heurâ leine penui teureime penui je tew’nsiarame, zai nîmrame, zai Babilon ’mbe teitatrame ba ge I pei gai ’ndu lei.

⁶Zai nang Pashhurbe, zai ning ki ge bamme leine, kebangtewtat ku lei; Babilon ’mbe nang tat ku lei; zai chige nang chai gai gu lei, zai chige ningchu bai gai gu lei, nang benai ning kangme, nang ne karasa sam paugaibeime leine zeu,” acheu bei de lei.

⁷Hei Tingwang gau, nang ne achu duai de lei, zai achu duai ’ndi de lei; Nang â I suadu ning ranchi lei, zai nang ne duî ’ndi lei. I â nai’nsangne ge teihenuitewrabe zat chang di de lei; haimena ne achu teihenuitew de lei.

⁸I mâ-sam sa tânege I ’nrungkeleu ze, “Tewkakeleube benai tewka’nsiabe!” acheu chêu lei. Tingwang sam ze a hangge tingnaimikpui tâluî ’nrûrabe benai teihenuitewrabe chang di de lei.

⁹I ne, “Pe ji I ne kûchu ra mak lei, zai pe ji gene sa ta de lei,” acheu bei zai â, hemi getaube a ra ramme lung ge bangnam gai bei gum a lung ge bam di tai lei, zai chize I teilei de lei, kane chize I tewdaulak lei.

¹⁰Misongga ze katelumbe kuâ I seu lei. Kehingbe ne guâgit bam lei! “Pechu sa’nsia gai be lau! Kei lei, pechu sa’nsia gai be kei lei!” ze a kangme kahechutme ne acheu ze dam ze, I kâukeurabe piekua bam lei. “Pechu chua lu zai â, pechu anui duî duî lei, zai pe peireige anui kûm lu ra hangge zeu,” ze kacheu de lei.

¹¹Kane Tingwang ne a dage heteureipeu, mi kehingpeu gum ze bam lei; chipauziegene achu tewsâme kau gu lei. Penui ne a peireiwang ra mak lei. Penui ’ngngam-desang gu lei, penui ’nggim ra mak daseu. Penui betun mak helêurabe ze mâdau de ’ngngaî dai ra mak lei.

¹²Hei baudime gu Tingwang, kapelingme je kakedakpeu, helung benai helung ka’nningbe ngaupeu, penui peireige ning gu hekûmtewbe I ngau ra pei lau. Ning dage a damrabe I pei gai ’ndi daseu.

¹³Tingwang dage heleutew lau! Tingwang je toa lau! Pa ne kegame keringbe ze tâ-kesiabe tewme ba gene ’nripat kai bei daseu.

¹⁴Achu lungkeube tingnaimikpui je peize deset kai be lau! A pui ne achu lungkeube tingnaimikpui je peize ’nnam gai se lau!

¹⁵A peu suî tew’nta ze, “’Mpeumi napoine ze ning hang lungkeu la de lei,” acheu ze pauwangpeu je peize desetkaibe chang lau.

¹⁶Chipaupeu je â, Tingwang ne ’nzâ ta di ze tew’nsia’ndibe namdi ramme gum ze peize chang lau; peize pa ne hechua ge ka’nrungbe kuâ, zai tîngna’nding ge kehingbe kuâ seu lau,

¹⁷pa ne a pui lung ge achu tewchat kai mak taibe ziegeneu; chidezai a pui gu henarak zene a raw chang bam de ra hang, zai pe gu henarak ze betun mak ze pengêudi bam gu de lei.

¹⁸Kahereube benai mi suisiabe ngau ra, zai ka’ngngambe I bam bam ra, henarak gene ’ndaitew ra I zuapat nung se lau?