Read Zeme Naga JEREMIA 21 Bible Online

JEREMIA 21 - Zeme Naga bible

JEREMIA 21

¹Heguang Zedekiabe ne Pashhurbe Malkhiabe na benai Zephaniabe Tingkupeu Ma-aseiabe na je Jeremiabe dage sam lang gai ze

²“Anui deu ge Tingwang je kemêt kai lau, Babilon gu heguang Nebukadrezzarbe ne anui je herei la daseu; Tingwang ne pe gu ningdaulakbe tâ ramme luigum ze anui dage tew gai leu gu de lei, zai pechu anui dagene ’mbia de ra tew gai leu gu de lei,” ze kacheube luage Tingwang sam pe dage wangchangbe ze ai lei.

³Dadege Jeremiabe ne penai je,

⁴“Aigum ze Zedekiabe je ningnai salia ra lei, ‘Tingwang, Israelme Rapeu ne aigum ze rang lei: Pie le lau, Babilon gu heguang benai Kaldiabe ningnai je kerie hela ’mbe tuaguame je ka’nggibe benai ’nggirabe herei merua ningnai ba ge bambe ramme ze I tei’mbia ’ndu lei, zai namdi zuilung ge I ne penai je teiwangherua gai gu lei.

⁵I ne ningnai je I sing ne heba hualimra lu a ranchibe ba ne, a lumpumbe gene a laîpat ze, zai a lumpum-kadesangbe gene ’nggi gu lei.

⁶Zai aipau namdi ge lungme leine je I ne tewchat kai gu lei, ’mpeumi benai hekaune jeu; zai herarît kechibe gene penui chai gu lei.

⁷Bechâng dezai Zedekiabe Juda gu heguang je zai pe guâ ka’ngguame zai aipau hekuînâm ge ziemmename ramme herarît gene, hiazutkie gene, herakûm gene ringpatme je, Babilon gu heguang Nebukadrezzarbe ba ge zai penui teureime ba ge, penui keringbe peume ba ge I ne pei gai gu lei. Pa ne penui je hiazutkie mui ne bi’ndu lei; pa ne penui je ’nggia ra mak lei, zai penui je ’nzâ ra mak lei, zai penui je ngau’nggia gai ra mak lei,’ ze acheu zeu.

⁸“Zai aime je nang salia lau: ‘Tingwang ne aigum ze rang lei, pie le lau, ningnui suage keringbe ’mpuî benai kechaibe ’mpuî I kai ’nde lei.

⁹Aipau namdi ge bambe kau â, hiazutkie gene, herakûm gene, zai herarît gene chai gu lei; kane mige zuapat lu Kaldiame ningnui je tuaguâ ze bamme dage pakkaime â ring gu lei, zai pa keringbe ze herei gu hetoahi ngaube gum ze sapbam gu lei.

¹⁰Aipau namdi peireige keyibe hang ne mak ze kesiabe hang ne a marak I kai ’nde lei, ze Tingwang ne kacheu de lei: Chize Babilon gu heguang ba ge peipat kai ’ndu, zai pa ne hemi ne rû gu lei,’ acheu zeu.

¹¹“Zai Juda heguang ki ge, ‘Tingwang sam seu le lau,

¹²Hei, Dabid ki gau! Aigum ze Tingwang ne rang lei: “ ‘Hechua ge samramka’nzeibe tew gai zu lau, zai nîmtattipeu je kategame ba gene ’nripat kai zu lau, a lumpumbe hemi gum ze pat mak ra hangge zeu, zai ningnui kesiabe tâ tewbe ramme ziegene mî de tew ’mmit lak ze tau bam ra hangge zeu,’ ze acheu salia lau,” kacheu de lei.

¹³“Pie le lau, Hei bekâm ramme ge bamme gau, Hei, peningkâm ge tingchutum gau, ningnui je I ka’nggi lei, ze Tingwang ne kacheu de lei; ‘Châu ne anui je ’nggi ra wangkeu ra lau, zai anui lungbe bâm ge châu gut ra lau?’ ze kacheume gau.

¹⁴Ningnui tâtewbe rachî luigum ze ningnui je I tewsâ lei, ze Tingwang ne kacheu de lei; pe gu ’nrêu ge I hemi’ntau gai gu lei, zai pechu lungguâme leine je tew’ngga kam ’ndu lei,” ze kacheu de lei.