Read Zeme Naga JEREMIA 22 Bible Online

JEREMIA 22 - Zeme Naga bible

JEREMIA 22

¹Aigum ze Tingwang ne rang lei: “Juda gu heguang ki lam’mbe wangkeu zu lau, zai chige aipau sam ze sa gai lau,

²zai acheu ze rang gai lau, ‘Tingwang sam ’ngking le lau, Hei Juda gu heguang Dabidbe gu heguang-bamrak ge ka’ntaupeu gau, nang zai ning gu kebangme zai ning gu ziemmename aipau keriekemui ramme ge gutme gau.

³Aigum ze Tingwang ne rang lei: Ka’nzeibe benai kapelingbe tew lau, zai kategame ba gene nîmtat’ndipeu je ripat kai lau. Zai hesangme, bepeugabe kau, zai kemîpui peireige yimakbe mei nune ka’nggibe tak mei be tew se lau, zai aipau bâm ge pemâugame jai tewpat kai se lau.

⁴Ningnui ne aipau sam ze pheu sing dizaine â, heguangme Dabidbe gu heguangme bâmrak ge ka’ntaume, hekuntimriang ramme benai hekun ramme peireige chua lu, penui benai penui gu kebangme, zai penui gu ziemmena ramme aipau ki ge keriekemui ramme ge gut ku lei.

⁵Kane ningnui ne aipau sam ramme ’ngking mak tizai â, I ne kadeseu de lei, ze Tingwang ne rang lei, aipau ki ze â putzînggaibe chang gu lei, zeu.

⁶Juda gu heguangme ki tedeu ge Tingwang ne aigum ze rang lei: “ ‘Nang â a hangge Gileadram gum, zai Lebanon loa’ntûm ningsing gum de lei, sedu ningchu tingkangram, mi lungmakbe namdi hang I tew gai sing gu lei.

⁷Ning peireige tewka’nsiame penui gu-gu hereimerua tei lu ze ningchu ’nggi ra I ne teleu gai gu lei; zai nang ne ’nchâlangbe kedarchingbang ramme penui ne kuîkau ’ndu lei, zai hemi ge chiramme tuâ gai ’ndu lei.

⁸“ ‘Zai aipau namdi ze hezat misonggame ne tatpela gu, zai haimena ne pe ramna’mpeu suage, “’Ndaitew ze aipau namdi ze Tingwang ne aigum tew gai lau?” acheu gu lei.

⁹Zai penui ne, “Penui Rapeu gu samhatkaibe penui ne put kai nan ze, hera kêdabe ramme ze kellum zai penui guâ ’ngguadibe ziegene lei,” acheu gu lei,’ zeu,” ze kacheu de lei.

¹⁰Chaidipeu hangge hap kai se lau; desui du desui gai se lau; kane tattipeu hangge hap-desang zu lau, pe ram ze ngau dai ra pa helatwang dai ra mak daseu.

¹¹Aipau bâm gene tattipeu, pe peu Josiabe kelei ge kaheguangpeu Juda gu heguang, Josiabe na Shallumbe tedeu ge Tingwang ne aigum ze rang lei: “Pa â ailia ’mbe helatwang ra mak lei,

¹²kane penui ne pechu kebang nîmtatkai’ndibe bâm, chigene pa chai gu lei, zai aipau heram ze pa mâdau de ngau dai ra mak lei,” acheu zeu.

¹³“Telingmakbe gene pe ki tewpeu, zai pe gu ’nreibe kisîam ramme pelingmakbe gene tewpeu ze pe duângga gu lei; pe ramna’mpeu je ’ntakûne pe guâ ’nggua ra tewgaipeu, zai pe gu hezie hî hangge peimakpeu zeu;

¹⁴‘I a runne heki kedibe chige ’nreibe kisîam peza maîlang ze tew gu lei,’ kacheupeu, zai chiramme hangge kemuicheiki ramme tewput lu kedarching ne kûm lu pegeî giebe ne chize ’nnuk kai lu zeu, ze kacheupeu zeu.

¹⁵Kedarching ge nang ne helitlube ziegene nang â, nang heguang de lei ze ’nning gai mei? Ning peu teu sak lu ka’nzeibe benai kapelingbe tew mak mei? Zai pe dage yisang-yi ze bam lei.

¹⁶Pa ne kelaksiame benai kegame deu ge samram zun gai lei; dadege yisang-yi ze bam lei. Aize ne achu chirabe hang mak mei? ze Tingwang ne kacheu de lei.

¹⁷Kane timsangmakbe gene kegiebe ngau ra hangge, pe mâugame jai tewpat kai ra, zai tewsabe tâ tew ra, zai ’nggî-hegeirabe hangge runne ning mik benai ning lung pei gai lei.

¹⁸Chipauziegene Juda gu heguang Josiabe na Jehoiakimbe tedeu ge Tingwang ne aigum ze rang lei: “Penui ne pe hangge puîhap ra mak lei, ‘Hei a sipeu gau!’ mei nune ‘Hei a sipui gau!’ acheu zeu. Penui ne pe hangge puîhap ra mak lei, ‘Hei heguang!’ mei nune ‘Hei pa ne heguang changbe!’ acheu zeu.

¹⁹Hekunmerângnesei je baibe ge pechu bai’mpam gai gu lei, Jerusalem keriekemui ramme hela ’mbe zukereupat lu ze tua ’ndu lei,” acheu zeu.

²⁰“Lebanon ’mbe hang lu ’nrung gai lau, zai Bashan ge ning kuâ’nrungzia gai lau; Abarim gene ’nrung gai lau, nang kehungme leine je â, tew’ngga kam ’ndi daseu.

²¹Nang keheube ting ge ningchu I ka’mpau lei, kane nang ne sa ze, ‘I ’ngking ra mak lei,’ kacheu de lei. Aipau ze nang hena’ngka gene ning tak te lei, nang a kuâpheumakbe zeu.

²²Ning gu melireîme leine je tingkai ne reî gu lei, zai nang kehungme je kebang nîmtat ku lei; dezai nang ’ngngam gu zai ning duângga gu lei, ning lungriaksiabe ziegeneu.

²³Hei Lebanon ge lungme gau, kedarching zeu ge ka’ngkeume gau, ningnui peireige hereu-ka’nnangbe ze, henalung ra kakeribe ge geteubeted gum ze wang dezai, daizeu ge huaipun bam ra lau!” kacheu de lei.

²⁴“I bambe ziegene, Juda gu heguang Jehoiakimbe na Koniabe, a hezat’mbia gu baroine chang leusede ningchu I lutua ’ndu lei.

²⁵Zai ningchu tewchat ra hangge peume ba ge ningchu I pei gai ’ndu lei, nang ne kehingme ba gezeu. Kaldiame benai Babilon gu heguang Nebukadrezzarbe ba ge pei gai ’ndu lei.

²⁶Nang benai ningchu lungkeugaipui je lungkeugaimakbe heram kêda ’mbe I ne ningnai je tuâpat kai gu lei zai chige ningnai chai du lei.

²⁷Kane penui ne helatwang-dai-neibe heram chilia ’mbe penui helatwang ra mak lei,” ze Tingwang ne kacheu de lei.

²⁸Aipaupeu je tuâpatkaipeu, pângdibe heli, heli mî ne de tinggeumakbe heli ze Koniabe de mei? ’Ndaitew ze pa benai pe name ne chimakbe heram ’mbe penui je tuâpat kai ’ndi lau?

²⁹Hei heramme gau, heramme gau, heramme gau, Tingwang sam ’ngking le lau!

³⁰Tingwang ne aigum ze rang ze: “Aipaupeu ze pe na gabe kau, pe ting ge lungchumakrapeu, ze raw gai lau; pe name mige du Dabidbe gu heguang-bamrak ge ’ntau ze Juda ge heguangsap dai ra mak daseu,” ze kacheu de lei.