Read Zeme Naga JEREMIA 23 Bible Online

JEREMIA 23 - Zeme Naga bible

JEREMIA 23

¹“Melireîme a gu melitaning ge meli ramme je tew’nsia ze hûtimraripkaime hangge penui duângga gu lei!” ze Tingwang ne kacheu de lei.

²Chipauziegene Tingwang Israelme Rapeu ne melireîme a gu ziemmename je katinggeume tedeu ge aigum ze rang lei: “Ningnui ne a gu melidung je hûtimra gai bei de lei, zai penui je kumtua kam ’ndi de lei, zai penui dage ningnui tatwang gai mak lei. Pie le lau, ningnui kesiabe ramme tewbe hangge I ningnui dage tatwang gai gu lei.

³Dezaine a gu melidung penui je I ne heram leine gene kumtuagai’ndime ruagene ’nsakpatme je perielung ge gekumwang gai dai gu lei, zai penui heluîhing ze misongga pungpat ku lei.

⁴Penui peireige penui je reî ra melireîme je I ne sum gai gu lei, zai penui hing ta du lei, zai penui duângga ta du de lei, zai katte ga ta du de lei, ze Tingwang ne kacheu de lei.

⁵“Pie le lau, patingnaimikpui ramme wang mui de lei, ze Tingwang ne kacheu de lei, Dabidbe hangge kapelingbe Hingbangkiâng I tei chu gai dezai, pa ne heguang gum ze samram gu, zai ningching ze tâtew gai gu lei, zai heram ge samram ka’nzeibe benai kapelingbe tew gai gu lei.

⁶Pa ring ze bambe ting ge Juda je tew’nring gai gu lei, zai Israelme lungzeunetew ze bam gu lei. Zai aipau ji zene pechu kûrabe de lei, ‘Tingwang â anui gu kapelingbe de lei,’ kacheube zeu.

⁷“Chidaze pie le lau, beting â wang mui de lei, ‘Tingwang Ijipram gene Israel name je nguapatpeu bam-bambe ziegeneu,’ acheu ze ziemmename ne sa ta di ze,

⁸kane, ‘Israelbe ki chaname je pa ne kelipatkai’ndibe bâm ’nreibe heram benai heram leine gene penui je nguapatpeu Tingwang bam-bambe ziegene,’ acheu sarabe ting zeu,” ze Tingwang ne kacheu de lei.

⁹Kemeume tedeu ge: A dagene a lung ze pâng kam de lei, a ra ramme kechuîhiang la de lei; I â kameneupeu gum la de lei, wain ne duî’ndibe ziemmena gum la de lei, Tingwang ziegene benai pe sam ramme ka’nchibe ziegeneu.

¹⁰Heram ze kahemame ne pui de lei; desetkaibe ziegene heram ze kadesung de lei, zai hênamkang hereubuâ ramme ze lai kam de lei. Penui tatbe tak ze sia lei, zai penui gu heranchibe ze ’nzei mak lei.

¹¹“Kemeume benai tingkume Hera telung lung mak lei; a ki ge ’nsangdu penui lungriaksiabe tak ngaudau lei, ze Tingwang ne kacheu de lei.

¹²Chipauziegene penui hangge penui ’mpuî ze kemuîbe ge ka’nneibe ’mpuî ramme gum chang gu lei, chige penui je kumpat kai ze kâukâurabe hangge zeu; penui je tewsabe kum dezai, penui peireige kesiabe I teiwang gai gu lei, ze Tingwang ne kacheu de lei.

¹³Samaria gu kemeume dage katenetbe merua I ngau lei; Baal ji gene penui kemeu sam pau lei, zai a gu ziemmena Israelme je ngualietat lei.

¹⁴Kane Jerusalem gu kemeume dage mâ mi ngauhingbe I ngau de lei: Penui hema ze kechoabe ge tat lei; kesiabe tewme baran penui ne tew ka’nchi lei, dezai mige du pe lungriaksiabe tak gene helatwang mak ra hangge zeu; a hangge penui ’nteumena Sodom gum ze chang di de lei, zai chige lungme Gomorra gum di de lei,” kacheu de lei.

¹⁵Chidadege Baudime gu Tingwang ne kemeume tedeu ge aigum ze rang lei: “Pie le lau, penui je gekabe zat ne I guî gu lei, zai chairabe hedui penui je sak ra I pei gu lei; Jerusalem gu kemeume dagene heratelung-zat-makbe ge heram pelane tatkamdibe ziegeneu,” ze acheu zeu.

¹⁶Baudime gu Tingwang ne aigum ze rang lei: “Kemeume ningnui dage sam paugaime sam ramme ’ngking se lau, peruânggabe kaheguîbe ne ningnui dage tewpuigaime jeu; penui runne penui lung gene ngaube, Tingwang mui gene patbe-makbe penui sa de lei.

¹⁷Tingwang sam ze lugailakme dage, ‘Ningnui hangge yirabe kau lei,’ acheu ze penui sa ’nduâtat bam lei; zai haimena pe ka’nningbe runne tewbe kau dage penui ne, ‘Mâ-kesiabe ningnui peireige wang ra mak lei,’ kacheu de lei,” ze acheu zeu.

¹⁸Penui ruage châu Tingwang gu samrambeki ge pe sam ’nningchi ra, zai seu le ra sapkaibe kau la lau, makchai châu pe sam ze ’ngking’mmi gai ze ’nninggaibe kau la lau?

¹⁹Pie le lau, Tingwang gu tingkai kechibe jeu! Helumpumbe zuapat te lei, natri kechibe zeu; kesiame peî ge chize keu gai gu lei.

²⁰Tingwang lumpum ze â, pa tew ra ka’nningbe ze tewpui gai mak tâne ’ngngîn dai ra mak lei. Beting nâlangbe ge ningnui chize chî’nchichiak ku lei.

²¹“Kemeume je I lang gai me lei, sede penui pak lei; penui je I ’mpau me lei, sede penui kemeu sam pau lei.

²²Kane a gu samrambeki ge penui sap lu laîzaine â, penui a gu ziemmena ramme dage a sam ramme paurua gai gu de lei, zai penui gu kesiabe ’mpuî gene, benai penui kesiabe tâtewbe gene penui heli du de lei.

²³“I â kedeu ’mbe bambe Hera makse, kenahia ge bambe Hera mak mei? ze Tingwang ne kacheu de lei.

²⁴I pechu ngauchi lak ra ziemmena pe runne nuksing ge ’mbaichi duî mei? ze Tingwang ne kacheu de lei. I ne tinggîm benai kedei bampui mak mei? ze Tingwang ne kacheu de lei.

²⁵A ji gene kemeume karasa ne, ‘I hemang ka’mmi lei, I hemang ka’mmi lei!’ ze acheu ze kemeume sam paube kuâ I seu lu de lei.

²⁶’Ndaitie ge kemeume karasa paume lung ge karasa bam ra lau, penui lungge kechoabe paume,

²⁷a gu ziemmename je penui mang kat-kat dage salia ze, a ji ’ngngaî ’nde ra tew gai ra ka’nningme, penui peume ne du Baal ziegene a ji ’ngngai’ndime lungge ’ndaitie ge karasatewbe bam ra lau?

²⁸Peize kemeume hemang ka’mmipeu ne hemang ze salia lau, kane mige a sam teime a sam ze peize peling gene sa lau. Megau benai dekuîmeu ze ’ndaikau ka’nzuâbe la lau? ze Tingwang ne kacheu de lei.

²⁹A sam ze hemi gum mak mei zai tingchukâng kedeîdesuiruigaibe tediak gum mak mei? ze Tingwang ne kacheu de lei.

³⁰Chidaze pie le lau, kemeume je I ka’nggi lei, kat-kat dagene a sam ramme kahegame zeu, ze Tingwang ne kacheu de lei.

³¹Pie le lau, kemeume je I ka’nggi lei, penui lei gene, ‘Tingwang ne rang lei,’ ze same zeu, ze Tingwang ne kacheu de lei.

³²Pie le lau, karasa mang ramme I ne lang gai mak, zai die de die gai mak ze penui runne penui gu karasa mang ramme gu sampaube penui dage pau ze a gume je penui karasatewgaibe benai ketakedautewbe gene ngualietatkaime je I ne ka’nggi lei, ze Tingwang ne sa lei. Chigum ze penui ne aime hang yirabe tewgaibe mâ de ga lei, ze Tingwang ne kacheu de lei.

³³“Aime ruage mige ne mei nune kemeu’mpeu ne mei nune tingkupeu ne mei ze ningchu, ‘’Ndaikau ze Tingwang gu heputkeritbe lau?’ acheu ze ’nneu dezai â, ‘Ningnui ze heputkeritbe de lei, zai I ne ningnui je tuâpat ’ndu lei, ze Tingwang ne rang lei,’ ze nang salia ra lei.

³⁴Zai kemeu’mpeu mei nune tingkupeu mei nune mige ne mei ze ‘Tingwang gu heputkeritbe ze,’ ze kacheume je, I ne pa benai pe kibaume je tewsâ gu lei.

³⁵Chigum ze ningnui hangkat-katne pe kiningme benai pe sikiname dage, ‘Tingwang ne ’ndaikau kak kai lau?’ ze mei nune ‘Tingwang ne ’ndaikau sa gai lau?’ ze acheu ra lei.

³⁶Kane ‘Tingwang gu heputkeritbe,’ kacheube ze nang kûpat dai ta ra lei, heput ze â haimena sam di daseu, zai baudime gu Tingwang, anui Rapeu keringbe Rapeu sam nang tewkakedet daseu.

³⁷Aigum ze kemeu’mpeu je nang salia ra lei, ‘Tingwang ne ningchu ’ndaikau kak lau?’ ze mei nune, ‘Tingwang ne ’ndaikau sa gai lau?’ acheu zeu.

³⁸Kane nang ne, ‘Tingwang gu heput keritbe,’ acheu dizai â Tingwang ne aigum ze rang lei, ningnui ne aipau sam ramme sabeibe ziegeneu, “Tingwang gu heput keritbe,” kacheube sam zeu, I ningchu langgaibe luage, “Nang acheu sa me ra lei, ‘Tingwang gu heput keritbe’ ze kacheube zeu,”

³⁹chidaze pie le lau, a dage ningchu I ne teichu lu tuâpat ’ndu lei, nang benai namdi, ningchu benai ning peume je I ne peibeibe ze tuâpat ’ndu lei.

⁴⁰Zai mâdau de ’ngngaîtarabe ’ngngiam-bamrabe benai ’ngngam-bamrabe ningnui peireige I teiwang gai gu lei, ze kacheu de lei.