Read Zeme Naga JEREMIA 24 Bible Online

JEREMIA 24 - Zeme Naga bible

JEREMIA 24

¹Babilon gu heguang, Nebukadrezzarbe ne Juda gu heguang, Jehoiakimbe na Jekoniabe je benai Juda gu heguangsinme hechiâm chiamchime, hegeî kahekime, je Jerusalem gene kebang nîmtat ze, zai penui je Babilon ge teiwanggailube chângge, Tingwang ne aipau keliâbe achu teilia de lei: Pie le lau, Tingwang gu kellumki suage ’mbeuchî ’ntui kena dung gai ’nde lei.

²’Ntui kat â ’mbeuchî keyibe ramme, meipatraibe ramme lei, kane kêdabe ’ntui ge â ’mbeuchî siabe la lei, sia-kadesang dadege chiramme â teudau lak lei.

³Zai Tingwang ne achu rang ze, “Jeremiabai, ’ndaikau nang ngau lau?” kacheu de lei. I ne, “’Mbeuchî ramme yi-kadesangbe lei, zai ’mbeuchî siabe ramme â sia-kadesang lei, sia-kadesang dadege chiramme ze teudau lak lei,” acheu bei de lei.

⁴Dadege Tingwang sam a dage wang de lei:

⁵“Aigum ze Tingwang Israelme Rapeu ne rang lei: Aipau ’mbeuchî keyibe ramme gum ze, Juda gene kebang nîmtatme je keyibe hangge I riam gai gu lei, aipau bâm gene Kaldiame gu heram ’mbe I ne langtua’ndime zeu.

⁶Penui peireige yirabe hangge a mik pie bam gu lei, zai aipau heram ge penui je I nguawang dai gu lei. Penui je I teichu gu, zai tewkau ra mak lei; penui je I sum gai gu, zai tuktuâ dai ra mak lei.

⁷I â Tingwang lei be chî ra penui lung ge I pei gu lei; zai penui ze a gume chang gu zai I penui Rapeu chang gu lei, penui lung leine ne a dage penui helatwang gu daseu.

⁸“Kane aigum ze Tingwang ne rang lei: ’Mbeuchî kesiabe ramme sia-desang di ze teudaulaktibe gum ze, Zedekiabe Juda gu heguang, pe gu heguangsinme, Jerusalem ge ’nsakpatme, aipau heram ge bamgaime zai Ijip gu heram ge lungme peirei du chigumbe hangge I tei gai gu lei.

⁹Kedeirei heguangram leine ge mi ngauhingbe penui je tew gai gu lei, ’nrû ze bam ra, kesiabe sa’nda ra, sahenuitew ra, zai penui je I ne kelipatkairabe bâm leine ge desetkaibe chang ra I tew gai gu lei.

¹⁰Zai hiazutkie, herakûm, herarît, penui peireige I lang gai gu lei, penui benai penui peume je I peigaibe heram gene penui je I tew’ngga kam mak tânege zeu,” ze kacheu de lei.