Read Zeme Naga JEREMIA 25 Bible Online

JEREMIA 25 - Zeme Naga bible

JEREMIA 25

¹Josiabe na Jehoiakimbe Juda gu heguang changbe pamedaibe tingkum ge, Judame tedeu ge Tingwang dagene Jeremiabe dage sam wangchang de lei. (Chize Nebukadrezzarbe Babilonme gu heguang, heguangchuraîlangbe tingkum de lei),

²Juda benai Jerusalem ge lungme leine dage Jeremiabe ne sam saliabe zeu.

³“Tingkum ’ngkai ze kechum Josiabe Amonbe na, Juda gu heguang changbe kum pakereu ze kechum kum gene nemai riâ changbe, Tingwang ne achu ’mpau ze bam lei, zai pa ne ’ndaikau sa mei be mâdau de ningnui dage I saliasau mak lei, kane ningnui â ’ngking mak lei.

⁴Tingwang ne pe guâ ka’ngguame kemeume je ningnui dage lang gai bam leusede ningnui ’ngking gai mak zai ningnui kun ’ndualie gai mak lei.

⁵Penui ne ningnui je, ‘Ningnui kesiabe ’mpuî gene benai mâ-kesiabe tâ ningnui tewbe gene heli de lau, zai Tingwang ne betingbeta ningnui benai ningnui paume hangge peigaibe heram ge lung bam lau;

⁶kêdabe hera ramme je ’nggua ze kellum ra hangge peutat se lau, makchai ningnui ba ne tewbe tâ ramme zene a lumpum ra tew gai se lau; chidezai I ne ningnui je tew’nsia gai ra mak lei,’ kacheube zeu.

⁷Sedu ningnui achu ’ngking mak lei, ze Tingwang ne kacheu de lei, dezai ningnui ba tatew ne ningnui je tewhereu gai lu a lumpum tewpat kai ra hangge zeu.

⁸“Chidadege baudime gu Tingwang ne aigum ze rang lei: Ningnui ne a sam ramme pheumakbe ziegene,

⁹pie le lau, tingpeî ’mbia bambe zat leine hangge I lang gai gu lei, ze Tingwang ne kacheu de lei, zai Nebukadrezzarbe Babilon gu heguang, a guâ ka’ngguapeu hangge zeu, zai penui je I aipau heram benai chige lungme je ’nggi ra teiwang gai gu lei, zai aige lungguâbe heram leine je ’nggi ra hangge zeu; I ne penui je tew’ngga kam ’ndu lei, zai penui je mi ngauhingbe, mi kateruibe, zai betingbeta ngaugailak bam ra I tew gai gu lei.

¹⁰Chipau peireige du mi suiyi ka’nnuibe kuâ benai hesuiyibe kuâ, henâukupeu kuâ benai meipui kuâ, zai chêu niakbe chukâng ’ncheu zai hemibung kebabe penui dagene I tew’ngga ’ndu lei.

¹¹Aipau heram pelane sia kam du zai sâuhammuî gai gu lei, zai aipau heramzatme ne Babilon heguang guâ kum riaksena ’nggua gu lei.

¹²Tingkum riaksena kamdibe châng dezai, Babilon heguang benai chipau heramzat, Kaldiame ram ze penui gu hemui-helut ziegene heram ze betingbeta sâuhammuî de ra tew gai ze I tewsâ gu lei.

¹³Chipau heram peireige penui deu ze I sam sapatkai’ndibe sam leine, aipau leisikuak ge rawgai’ndibe leine, Jeremiabe ne heram leine ge paugai’ndibe ze I teiwang gai gu lei.

¹⁴Zai heramzatme misonggame benai heguang kedime ne penui je kebang hang tew gai gu lei; zai penui tâtewgaibe benai penui batâ ramme luigum ze I penui je peiruî gu lei,” ze Tingwang ne kacheu de lei.

¹⁵Aigum ze Tingwang Israelme Rapeu ne achu rang lei: “Aipau helumpumbe wain piak ze a ba gene tei lu ze ningchu I langgaibe heramzatme je sak ra tew gai be lau.

¹⁶Penui sak lu kezitsiam bam gu lei, zai penui ruage hiazutkie I langgaibe ziegene penui mie du lei,” acheu zeu.

¹⁷Dadege Tingwang ba gene I hepiak tei lu ze, Tingwang ne achu langgaibe heramzat leine je sak ra tew gai de lei:

¹⁸Jerusalem benai Juda gu namdi ramme pe gu heguangme benai heguangsinme ne penui je gua’mpie gai ze, put-hâmmuî gai ra, mi ’nseî lei acheu ra, zai deset kai ra hangge zeu, chuna ting ge bambe gum zeu,

¹⁹Ijip heguang Pharaobe, pe guâ ka’ngguame, pe gu heguangsinme, pe gu ziemmename leine,

²⁰zai penui ruage hesangme leine; Uz gu heram ge heguangme leine, zai Philistin ge heguangme leine (Ashkelon, Gaza, Ekron, zai Ashdod gu ’nsakpatme);

²¹Edom, Moab, zai Amonbe name;

²²Tira gu heguangme leine, Sidon gu heguangme leine, zai sungkling ka ze ’nggeukung ge heguangme ramme;

²³Dedan, Tema, zai Buz, zai penui peî rimme;

²⁴Arabia gu heguangme leine zai tingkangram ge hepûm-hechut lungme heguangme leine;

²⁵Zimribe gu heguangme leine, Elam gu heguangme leine, zai Media gu heguangme leine;

²⁶Tingpeî ’mbia gu heguangme leine, kedeube benai kenahia ge bamme, pesin-perin zai kedei ge bambe kedeirei ge heguangme leine zeu, zai penui chângge Babilon gu heguang ne sak ku lei.

²⁷“Dezai penui je nang salia ra lei, ‘Baudime gu Tingwang, Israelme Rapeu ne aigum ze rang lei: Sak kai zu lau, meneu ze ’nruî zu lau, kâu-kâu lu zuachu dai se lau, ningnui ruage hiazutkie I langgairabe ziegeneu,’ acheu zeu.

²⁸“Zai ning ba gene hepiak ze sak ra penui lumeu dizaine â, penui je nang acheu ra lei, ‘Aigum ze baudime gu Tingwang ne rang lei: ningnui sak sing ra lei!

²⁹Pie le lau, a ji ne kûgaibe namdi ge kesiabe tâ I tewchu gai gu de lei, dezai ningnui je tewsâ mak dau dui mei? Ningnui je tewsâ mak ta ra mak lei, kedei ge bamme leine je ’nggi ra hiazutkie I teiwang’ndui gu lei, ze baudime gu Tingwang ne rang lei,’ acheu zeu.

³⁰“Nang chidaze aipau sam ramme ze penui dage pau gai ze, penui dage salia gai lau: ‘Kehu ’mbene Tingwang ’nrung gu lei, zai pebâm ka’nchibe gene pe kuâ’nrungpat ku lei; pe gume peireige pa ’nrahim gai gu, zai grepchî neime gum ze kedei ge lungme leine dage pa ’nrung gai gu lei.

³¹’Nrungkehuachunbe kedei mik deulangbe chang ze kehuatat ku lei, heramzatme je Tingwang ne kesia’ndam gai ’ndi daseu; hemeipum leine dage pa samrambe teigut te lei, zai kesiame je hiazutkie ge pei gai gu lei, ze Tingwang ne rang lei,’ ze acheu zeu.

³²“Baudime gu Tingwang ne aigum ze rang lei: Pie le lau, heramzat kat gene kêdabe heram ge kesiabe zuapat te lei, zai kedei deulangbe gene tingkaikechibe gui’nrui mui de lei!

³³“Zai chipau mai ge Tingwang ne tewchatkaime ne kedei katlam gene kêda ’mbia riâ chang gu lei, penui je puîhap ra mak lei, makchai teiwang’ndui gai ra mak lei, zai bai du bai ra mak lei; penui kedei ge kerachut chang du lei.

³⁴“Hap’nrung zu lau, ningnui melireîme gau, zai hapchu lau, zai timbun ge ’nnia zu lau, melidung gu pa’mpaume gau, ningnui je gîchatkairabe benai kelituarabe tingnaimikpui ramme wang mui de lei. Zai meli’nsei peleuyibe ramme gum ze ningnui kau gu lei.

³⁵Melireîme hangge ’nseurabe bâm ’nsak kai ra mak lei, melidung gu pa’mpaume du pak’mbia ra mak lei.

³⁶Melireîme ka’nrungbe kuâ, zai melidung gu pa’mpaume puîhapbe kuâ ze seu le lau! Penui gu hereubuâzeu ze Tingwang ne tew’nsia kam daseu,

³⁷zai ’ndeuhuibe melidung je tew’nsia kam de lei, Tingwang pe lumpum-kadesangbe ziegeneu.

³⁸Duilui gum ze pa ne pa ’mbaibâm ze sâu gai ’ndi de lei, teleugaime gu hiazutkie ziegene benai penui lumpum-kadesangbe ziegene penui gu heram ze put-hâmmuî gai bei de lei,” ze acheu zeu.