Read Zeme Naga JEREMIA 26 Bible Online

JEREMIA 26 - Zeme Naga bible

JEREMIA 26

¹Juda gu heguang, Josiabe na Jehoiakimbe heguangchube pîbang ge aipau sam ze Tingwang dagene wangchang de lei,

²“Tingwang ne aigum ze rang lei: Tingwang gu hekisiâm ge sap kai lu, zai Juda namdi leine, Tingwang ki ge kellum ra wangme leine dage pau gai ra ningchu I samdiegaibe leine ze sa gai lau; samkie kat du sâu gai se lau.

³Penui ’ngking lêu gu lei, zai haimena pa kesiabe ’mpuî gene heli de lêu gu lei, dezai penui kesiabe tewbe ziegene penui dage I kesiabe tew gai ra ’nsapkaibe gene I heli de ra hangge zeu.

⁴Penui je nang salia ra lei, ‘Aigum ze Tingwang ne rang lei: Ningnui suage I ne a gu hingde kaibeibe luî ge ningnui tat ra hangge a kuâ ’ngking makchai â,

⁵zai kemeume a guâ ka’ngguame ’nnang-desang ze ningnui dage I langgaime sam ramme lutei makchai â, ningnui ne ’ngking mak sedu,

⁶I aipau ki ze Shilo gum ze tew gai gu lei, zai aipau namdi ze kedeirei gu heramzat leine hangge desetkaibe I tew gai gu lei,’ zeu,” ze acheu zeu.

⁷Tingkume benai kemeume zai ziemmename leine aipau sam ramme Tingwang gu heki gene Jeremiabe ne sabe seu kam lei.

⁸Zai Tingwang ne baudime suage sa ra samdiegaibe leine Jeremiabe sa kam lu dege, tingkume zai kemeume zai ziemmename leine ne pechu nîm lu, “Nang chai gu lei!

⁹’Ndaitew ze Tingwang ji gene nang ‘Aipau ki ze Shilo gum gu lei, zai aipau namdi ze mige du lungme ga ze sâuzîng gai gu lei,’ ze kacheu lau?” ze kacheu de lei. Zai ziemmena leine Tingwang gu heki ge Jeremiabe dage guâwang de lei.

¹⁰Juda gu heguangsinme airamme seu lu dege, heguangki gene Tingwang gu heki ’mbe penui hang lu Tingwang gu heki Keriekemui Karchibe ge gut lu penui ka’ntau de lei.

¹¹Dadege tingkume benai kemeume ne heguangsinme benai baudime je salia ze, “Aipaupeu je chai ra samram gai kezei lei, pa ne aipau namdi ze siarabe hang pau’ntua gai bei daseu, ningnui kun ne ningnui seulube luigum zeu,” ze kacheu de lei.

¹²Dadege Jeremiabe ne heguangsinme benai baudime leine dage salia ze, “Tingwang ne aipau ki benai aipau namdi ze ka’nggibe ningnui seulube sam leine pau gai ra achu lang gai lei.

¹³Chidaze chunage ningnui ’mpuî ramme benai ningnui tatew leine teleu’nzei zu lau, zai Tingwang ningnui Rapeu kuâ pheu zu lau, zai kesiabe ningnui dage pa paugaibe gene Tingwang heli du lei.

¹⁴Kane a tedeu ge â, pie le lau, I ningnui ba ge lamui lei. Ningnui ne achu tew ra yi-yibe zai ka’nzeibe tak tew du lau.

¹⁵Ningnui ne achu tewchat dizaine â, ningnui ne ningnui peireige benai aipau namdi zai chige lungme leine peireige pemâugame jai teiwang gai gu lei be chî le lau, aipau sam ramme leine ningnui kunseu ge salia ra Tingwang ne achu lang gai sing daseu,” ze kacheu de lei.

¹⁶Dadege heguangsinme benai baudime leine ne tingkume benai kemeume je, “Aipau peu je chai ra samram gai ra bui me lei, Tingwang anui Rapeu ji gene pa anui dage sa daseu,” ze kacheu de lei.

¹⁷Zai chi heram ge gechîngme, hanggesame chu lu ziemmena wangka’nduime dage sa ze,

¹⁸“Juda gu heguang Hezekiabe ting ge Mikabe Moresheth’mpeu kemeu sam pau gai ze, ‘Baudime gu Tingwang ne aigum ze rang lei, Zaion je â hening lu gum ze pu gu lei; Jerusalem ze â siakamdibe chutrie chang gu, zai heki bambe deiloa ze ’nrêutum chang du lei,’ ze Juda ge bamme dage salia de lei.

¹⁹Hezekiabe Juda gu heguang benai Judame leine ne pechu tewchat ’ndi mei? Pa Tingwang je hing zai Tingwang ngauka’nggiabe kie mak mei, zai kesiabe penui dage pa paugaibe gene Tingwang heli dai mak mei? Kane anui â anui runne anui peireige kesiabe kedibe teiwang gai ra tew zeu,” ze kacheu de lei.

²⁰Mihangkat kêdapeu, Uriabe Shemaiabe na Kiriath-jearim’mpeu Tingwang ji gene kemeu sampaupeu bam lei. Jeremiabe gu sam ramme gum ze aipau kedei ge benai aipau namdi peireige kemeu sam pa pau gai de lei.

²¹Zai heguang Jehoiakimbe benai pe gu hereime zai heguangsinme ne pe sam ramme seu lu dege, heguang pechu tewchat ra peu de lei; kane chize Uriabe seu lu dege pa hing di ze Ijip ’mbe pak’mbia gai di de lei.

²²Dadege heguang Jehoiakimbe ne ziemmena ramme Akborbe na Elnathanbe benai pe dage kêdame bamme je Ijip ’mbe lang gai de lei,

²³zai penui ne Uriabe je Ijip gene nîmwang lu heguang Jehoiakimbe, pe chu hiazutkie ne bichat kai lu pe pum kechaipum ze ’nteumena je bigaibe bâm ge tuâgaibeipeu, dage pechu nguawang gai bei de lei.

²⁴Kane Shaphanbe na Ahikambe ba kena ze â Jeremiabe dage bam lei, chidezai tewchat ra hangge baudime ba ge pechu pei gai mak ta ra hangge zeu.