Read Zeme Naga JEREMIA 27 Bible Online

JEREMIA 27 - Zeme Naga bible

JEREMIA 27

¹Juda gu heguang Josiabe na Zedekiabe kaheguangbe ting ge Tingwang dagene aipau sam ze Jeremiabe dage wang de lei.

²Tingwang ne achu aigum ze rang ze: “Ning hangge meigeiria benai guangkâm teleu lu ze ning guang ge kai lau.

³Edom heguang dage, Moab gu heguang dage, Amonbe name bau gu heguang dage, Tira gu heguang dage, zai Sidon gu heguang dage chi sam ze Jerusalem ge Juda gu heguang, Zedekiabe dage sampaume wangme ba gene lang gai lau.

⁴Aipau sam ranggaibe ze penui gu heguangme hangge penui je pei gai be lau: ‘Baudime gu Tingwang Israelme Rapeu ne aigum ze rang lei: Aize ningnui gu heguangme dage rang gai ra lei.

⁵“A gu tâtewchibe benai a ba ranchibe ne kedei zai kedeirei ge ziemmename benai hekaubena ramme ka’ndampeu ze I lei, zai chize I ne pei gai ra yime je pei gai lei.

⁶Chunage aipau heram leine a guâ ka’ngguapeu, Babilon gu heguang Nebukadnezzarbe ba ge I pei gai ’nde lei, zai bekâmram ge hekaubena ramme du pe guâ ’nggua ra pechu I pei gai ’nde lei.

⁷Heramzat leine ne pa zai pe na zai pe cha guâ ’nggua gu lei, pe ram kâuderabe beting wangchang mak tâneu; dezai heramzatme benai heguangme ne pechu penui gu kebang hang tew gai gu lei.

⁸“ ‘ “Kane heguangram mei nu heramzat mei ze aipau Nebukadnezzarbe Babilon gu heguang guâ ’nggua ze Babilon heguang gu guangkâm pe guang ge dap kai makchai â, chipau heram je hiazutkie, herakûm zai herarît ne I chipau zatme je tewsâ gu lei, pe ba gene I ne chize tew’ngga kam mak tânege zeu,” ze Tingwang ne rang lei.

⁹Daze ningnui gu kemeume, hedachakme, hemangka’ndime, kemeume, heduaîtewme, mei ne ningchu salia dezai ’ngking se lau, ‘Babilon gu heguangpeu guâ ’nggua mak ra lei,’ ze acheu dezai neu.

¹⁰Ningnui je penui pauliabe ze â karasa lei, chipauziegene ningnui ram gene kedeu ’mbene ningnui je tei’mbai ’ndu, zai ningnui je I ne kelipat ’ndu, zai ningnui ga gai du lei.

¹¹Kane Babilon heguang gu guangkâm kangge keikeu ze pe guâ ka’ngguame heramzat je â pe gu heram ge I sâudiak kai gu lei, chige bam ze tâtew ra hangge zeu,’ kacheube zeu” ze Tingwang ne kacheu de lei.

¹²Juda gu heguang Zedekiabe je aipau luirunbe gene I sa lei: “Babilon gu heguang gu guangkâm kangge ning guang keikeu lau zai pa benai pe gu ziemmena guâ ’nggua ze lung bam lau.

¹³’Ndaitew ze nang benai ning gu ziemmename hiazutkie gene, herakûm gene, zai herarît gene chai ra lau, Babilon gu heguang guâ ’ngguamakrabe heramzat tedeu ge Tingwang ne ranggaibe gum zeu?

¹⁴‘Ningnui Babilon gu heguang guâ ’nggua mak ra lei,’ ze ningnui je kacheume, kemeume gu samramme kuâ ningnui ’ngking se lau, ningnui je penui paugaibe ze â karasa sam daseu.

¹⁵Penui je I ne lang gai me lei, ze Tingwang ne rang lei, kane penui â penui deuzie ne a ji gene sam pau lei, chigum ra zai â ningnui je I kelipat ’ndu zai ningnui ga gu lei, ningnui benai kemeume ningnui je paugaime ’nteumena zeu,” acheu zeu.

¹⁶Dadege tingkume benai aipau ziemmename leine dage I salia de lei, “Aigum ze Tingwang ne rang lei: Ningnui gu kemeume ningnui dage sam paugaime, samramme kuâ ’ngking se lau, ‘Pie le lau, Tingwang gu heki kellumki kerua ramme ze chuna mâ-tiegemakse Babilon gene teiwang dai gu lei,’ ze sabe zeu, penui ne ningnui dage sampaube ze karasa sam lei.

¹⁷Penui kuâ ’ngking se lau, Babilon heguang guâ ’nggua ze lung bam zu lau. ’Ndaitew ze aipau namdi ze sauzînggaibe chang ra lau?

¹⁸Penui ze kemeume lei zai â, zai penui dage Tingwang gu sam bam lei zai â, peize penui ne baudime gu Tingwang dage kiegaihâ lau, dezai Tingwang ki ge, Juda heguangki ge, zai Jerusalem ge kakellumbeki gu kerua ramme sâugaibe ze Babilon ’mbe tat mak ra hangge zeu.

¹⁹Baudime gu Tingwang ne, pechia ramme, dekuaki kedibe, pekaira, zai aipau namdi gu kellumki ge kerua sâugaidiakbe

²⁰Babilon heguang Nebukadnezzarbe ne Juda heguang na Jehoiakimbe, Jekoniabe, zai Juda benai Jerusalem ge besuitewme je Jerusalem gene Babilon ’mbe kebang hang nîmtatbe ting ge pa ne teitatmaktadibe zeu.

²¹Baudime gu Tingwang Israelme Rapeu ne kellumki merua, mâ-bung ramme Tingwang gu heki ge, Juda gu heguang ki ge, zai Jerusalem ge sâugaidiak’ndibe tedeu ge aigum ze rang lei:

²²Chiramme ze Babilon ’mbe teitat ’ndu zai chige penui je I tinggeu gai dai mak tâne bam gu lei, ze Tingwang ne rang lei. Chidezai chiramme ze I ne teiwang dai ze aipau bâm ge tei’nsapchu gai dai gu lei,” ze acheu zeu.