Read Zeme Naga JEREMIA 28 Bible Online

JEREMIA 28 - Zeme Naga bible

JEREMIA 28

¹Chipau tingkum gîm ge, Juda gu heguang Zedekiabe heguangsapchube pîbang, pamedaibe kum gu hekêu pamengeube kêu ge Gibeon gene kemeu’mpeu Azzurbe na Hananiabe ne Tingwang ki ge tingkume benai ziemmename ’nteumena bambe gene achu salia ze,

²“Baudime gu Tingwang, Israelme Rapeu ne aigum ze rang lei: Babilon heguang gu guangkâm I ne tewbet ’nde lei.

³Babilon gu heguang Nebukadnezzarbe ne aipau bâm gene Babilon ’mbe teitattibe Tingwang ki gu kellumki merua leine aipau bâm ge kum na lungge I teiwang gai dai gu lei.

⁴Jehoiakimbe na Jekoniabe, Juda gu heguang zai Juda gene Babilon ’mbe kebangnîmtattime leine je du aipau bâm ge I teiwang gai dai gu lei, Babilon heguang gu guangkâm I tewbet gu daseu,” ze kacheu de lei.

⁵Dadege kemeu’mpeu Jeremiabe ne, kemeu’mpeu Hananiabe suage tingkume bambe gene benai ziemmename ’nteumena Tingwang gu heki ge sap bamme ruagene sa de lei;

⁶zai kemeu’mpeu Jeremiabe ne “Amen! Tingwang ne chigum peize tew ra de lei; nang ne kemeu sam paube sam ramme peize gesang chang ra tew gai ra de lei, zai Tingwang ki gu kellumki kerua ramme benai kebang nîmtattime leine je Babilon gene aipau bâm ge peize teiwang gai dai ra de lei.

⁷Sedu nang geseube ge benai baudime geseube ge aipau sam I sabe ze seu le lau.

⁸Nang benai a suage kemeume tingtie’ngka ge patme ne herei, herakûm, zai herarît, heramzat misonggame benai heguangram kedibe peireige wangrabe pau’ntua gai lei.

⁹Lunghegeikatenaibe bam ra pauka’ntuapeu kemeu’mpeu peireige ze â, kemeu’mpeu gu sam luigum wangchang gai dezai Tingwang ne kemeu’mpeu je langgaibe kau de lei be chî gu lei,” ze kacheu de lei.

¹⁰Dadege kemeu’mpeu Hananiabe ne kemeu’mpeu Jeremiabe guang gene guangkâm kang ramme tei lu, chiramme tewbet kai de lei.

¹¹Zai baudime bambe gene Hananiabe ne sa ze, “Aigum ze Babilon gu heguang Nebukadnezzarbe gu guangkâm ze heramzatme leine guang gene kum na lungge I tewbet kai gu lei, ze Tingwang ne kacheu lei,” ze kacheu de lei. Kane kemeu’mpeu Jeremiabe â pe gu ’mpuî ra ’mbe tat ti de lei.

¹²Kemeu’mpeu Jeremiabe guang gene Hananiabe ne guangkâm tewbet’ndibe chang mâtiegemakse, Tingwang gu sam Jeremiabe dage wang de lei.

¹³“Tat ze Hananiabe je salia lau, ‘Aigum ze Tingwang ne rang lei: nang ne heching kang ramme tewbet ’nde lei, kane chiramme kelei ge hegeî-tang ramme ne tew gai gu lei.

¹⁴Aigum ze baudime gu Tingwang Israelme Rapeu ne rang daseu: Aipau heramzatme leine guang ge Babilon gu heguang Nebukadnezzarbe dage kebang tewbe gu hegeî guangkâm kai ’nde lei, zai penui ne pechu ’nggua gu lei, bekâm ge hekaubena ’nsangdu pechu I pei ’ndi daseu,’ acheu zeu” ze acheu zeu.

¹⁵Zai kemeu’mpeu Jeremiabe ne kemeu’mpeu Hananiabe dage sa ze, “’Ngking le lau, Hananiabai, Tingwang ne ningchu lang gai me lei, zai nang ne aime je karasa sam ge ’nnumtew ra tew gai bei zeu.

¹⁶Chidaze aigum ze Tingwang ne rang lei: ‘Pie le lau, kedeirei gene ningchu I lutua ’ndu lei. Henai kum sing ge nang chai gu lei, nang ne Tingwang je ka’nggibe sam sapat kai bei daseu,’ acheu zeu,” ze kacheu de lei.

¹⁷Chipau tingkum gîm gu pasenabe kêu ge kemeu’mpeu Hananiabe chai di de lei.