Read Zeme Naga JEREMIA 29 Bible Online

JEREMIA 29 - Zeme Naga bible

JEREMIA 29

¹Airamme ze kebang hang tîm’ndime ruage gechîngme, zai tingkume, kemeume, zai Jerusalem gene Babilon ’mbe Nebukadnezzarbe ne kebang nîmtatme baudime dage kemeu’mpeu Jeremiabe ne Jerusalem gene langgaibe samkela leisikuak gu sam ramme de lei.

²Aize Jekoniabe, zai heguangpui, kahetiâme, Juda benai Jerusalem gu heguangsinme, hechiâmchiamme, zai hegeî kahekime, Jerusalem gene tatrimnadibe chângge de lei.

³Samkela leisi ze Shaphanbe na Elasabe benai Hilkiabe na Gemariabe, Zedekiabe Juda gu heguang ne Babilon gu heguang Nebukadnezzarbe dage langgaime ba ge ’mput kai de lei.

⁴Chige acheu rang gai ze, “Baudime gu Tingwang Israelme Rapeu ne aigum ze I ne Jerusalem gene Babilon ’mbe kebang hang langgaime kebang changme leine dage rang lei:

⁵Heki ramme tew lu chiramme ge lung zu lau; merie ramme tew lu chiramme gene ’nchipatbe ze raiteu zu lau.

⁶Kelaktew lu napoine ’mpeumi benai ’mpuimi ramme lungkeu zu lau, ningnui name nâu ku zu lau, zai ningnui na heleume ramme je tew’mmei zu lau, dezai penui ne ’mpeumi benai ’mpuimi lungkeu ra hangge zeu; zai chigene tewpung zu lau zai tew’nsîn se lau.

⁷Kane ningnui je I kebanglanggaibe namdi ge yirabe hang peu lau, zai Tingwang je chipau hangge kie lau, chige keyibe gene ningnui du keyibe ngau gu daseu.

⁸Baudime gu Tingwang Israelme Rapeu ne aigum ze rang lei: Ningnui ruage kemeume benai hedachakme bamme ne peize ningnui je duai se lau, zai penui ne hemang ka’mmibe hemang sam ’ngking se lau,

⁹ningnui dage penui a ji gene kemeusampaube ze â karasa sam daseu, penui je I ne lang gai me lei, ze Tingwang ne kacheu de lei.

¹⁰“Aigum ze Tingwang ne rang daseu: Babilonme hangge tingkum riaksena kam dezai, ningnui dage I ’ngkiâmie gu lei, zai ningnui dage I a gu samhatkaibe I tewpui gai gu, zai aipau bâm ge I ningnui je nguawang gai dai gu lei.

¹¹Ningnui hangge tâtewgairabe chî lei, kesiabe hangge makse yirabe hangge ’nsapkaibe, ningnui je ’nchuamai ge betingyibe peirabe zeu.

¹²Dezaine ningnui achu kû gu, zai wang ze achu kellum gu lei, zai ningnui kuâ I ’ngking gu lei.

¹³Ningnui achu peu gu, zai achu peudau gu lei; ningnui ne achu ningnui lung leine ne peu gai dezai,

¹⁴ningnui ne achu peudau gu lei, ze Tingwang ne kacheu de lei, zai ningnui paukaregabe I ne pei gai gu zai heram leine benai pebâm leine ge I ningnui je kelipatkai’ndibe bâm gene ningnui je gekumwang’ndui gai gu lei, zai ningnui je I ne kebanglanggaibe bâm gene ningnui je I teiwang gai dai gu lei, ze Tingwang ne kacheu de lei.

¹⁵“ ‘Tingwang ne Babilon ge anui hang kemeu’mpeu teichu gai ’nde lei,’ ze ningnui kacheube ziegene—

¹⁶Tingwang ne Dabidbe gu heguang-bamrak ge ka’ntaupeu tedeu ge, zai aipau namdi ge ziemmena bamme leine tedeu ge, ningnui puiname ningnui kebang tewtatbe ge tatmakme tedeu ge aigum ze rang lei:

¹⁷‘Baudime gu Tingwang ne aigum ze rang lei, pie le lau, penui peireige hiazutkie, herakûm, zai herarît, I lang gai de lei, zai penui je ’mbeuchî kesiabe sia’nteu nan ze teudaulaktibe gum ze I tew gai gu lei.

¹⁸Hiazutkie, herakûm, zai herarît ne penui je I gua’nsa gu lei, zai penui je kedei ge heguangram leine hangge mi kehingbe tew gai gu lei, desetkaibe, mi kehingbe, mi ka’nseîbe chang ra tew gai gu, zai penui je kelipatkai’ndibe heramzatme ramme ruage ngaugailak ra tew gai gu lei,

¹⁹penui ne a sam ramme ’ngking mak daseu, a gu kebangme kemeume dagene I langgaibambe zeu, ze Tingwang ne kacheu de lei, kane ningnui ne ’ngking nei mak lei, acheu zeu,’ ze Tingwang ne kacheu de lei.

²⁰Tingwang sam ze ’ngking le lau, Ningnui Jerusalem gene Babilon ’mbe I ne kebang langtua’ndime leine gau:

²¹‘Baudime gu Tingwang Israelme Rapeu ne aigum ze Kolaiabe na Ahabbe benai Ma-aseiabe na Zedekiabe ningnui dage a ji gene karasa sampaume tedeu ge rang lei: Pie le lau penui je Babilon gu heguang Nebukadrezzarbe ba ge I bala gai gu lei, zai pa ne penui je ningnui mikngau sing gene tewchat kai gu lei.

²²Penui ziegene aipau desetkaibe ze Babilon ge Juda gene kebang chang ze tatme leine ne tei gu lei: “Tingwang ne ningchu Zedekiabe benai Ahabbe je Babilon gu heguang ne hemi gene ’nringka’ngga gum ze peize tew gai lau,” acheu zeu.

²³Penai ne Israelram ge kemiebe tâ tew gai, penai ram name nâu dage hema gai zai karasa ne sam ramme I ne penai je diegaimakbe a ji gene paube ziegeneu. I ze chîsingbepeu zai I ze sakki de lei,’ acheu zeu,” ze kacheu de lei.

²⁴Shemaiabe Nehelam’mpeu je nang salia ra lei:

²⁵“Aigum ze baudime gu Tingwang Israelme Rapeu ne rang lei: Jerusalem ge bamme ziemmename leine dage, zai Ma-aseiabe na Zephaniabe tingkupeu dage benai tingkume leine dage ning ji gene nang samkela leisi ramme ’mput kai ze,

²⁶‘Tingwang gu heki ge kemieme kemeu sampaume ramme peireige rezietei ra, penui je hekai kai gu zai nîm ra hangge Tingwang ne ningchu tingkupeu hangge Jehoiadabe kelei ge kai lei.

²⁷Chunage ’ndaitew ze Jeremiabe Anathoth’mpeu ningchu sam paugaipeu je nang ’ngngiam mak lau?

²⁸Pa ne anui je Babilon ’mbe lang gai ze, “Ningnui kebang ge bambe ting ze tie gu lei, heki ramme tew lu lung du lau, zai merie tew ze pe rachî teu zu lau,” kacheu daseu,’ ze kacheu de lei,” zeu.

²⁹Kemeu’mpeu Jeremiabe geseube gene aipau samkela leisi ze tingkupeu Zephaniabe ne kiâ de lei.

³⁰Dadege Tingwang sam Jeremiabe dage wang ze:

³¹“Kebang nîmtattime leine dage, ‘Shemaiabe Nehelam’mpeu tedeu ge Tingwang ne aigum ze rang lei: I ne pechu langgaimakbe luage Shemaiabe ne ningnui je sam pau gai ze, ningnui je karasa sam ’nnumtew ra tewgai’ndibe ziegeneu,

³²chidaze Tingwang ne aigum ze rang lei: Pie le lau, Shemaiabe Nehelam’mpeu benai pe haîhikme je I tewsâ gu lei; a gu ziemmename dage keyibe I tewgairabe ngaurame ruage hangkat ringbambe pa ngau ra mak lei, ze Tingwang ne kacheu de lei, pa ne Tingwang dage ka’nggibe sam sa’nsia gai daseu,’ ze acheu ze sam lang gai lau,” ze kacheu de lei.