Read Zeme Naga JEREMIA 3 Bible Online

JEREMIA 3 - Zeme Naga bible

JEREMIA 3

¹“’Mpeumi mige ne pe nâu je tapat kai bei ze chipaupui ze pe dagene tat lu kêdapeu nâutew dizai â chipaupui dage pa helatwang dai gu semei? Chipau heram ze tewhebâ mak ku semei? Nang ne misonggame dage hepumzuateube tâ tew gai lei; zai nang a lam helatwang dai ra mei? ze Tingwang ne kacheu de lei.

²’Ngngangchu ze ketaîloa ramme pie gai ni lau! Nang jeigaimakbe bâm ’ndaikau ge la lau? Arab’mpeu hênamchangbe heram ge heteurik gum ze nang ne ’mpuî’ntai ge nang meraipui ramme je ’ntaukuâ bam lei. Heram ze nang ne hepumzuateube tâ tewbe ne deîhebâ kam de lei.

³Chipauziegene tingsim kedibe tew’nsau ’nde lei, zai keriakting ge tingruikeu mak te lei; acheusedu nang â hepumzuateume gum lei, ka’ngngambe chî mak lei.

⁴Chuna hî ge nang achu kû mak mei? ‘A peu gau, nang â a rîting ge a kangpeu lei—

⁵pa betingbeta pe lumpum gu mei, betun chang ze pa pe lungteu bam ra mei?’ acheu zeu. Pie le lau, nang ne sa lu kane nang ne kesiabe tewchiduibe leine nang ne tew ’nde lei,” zeu.

⁶Heguang Josiabe ting ge Tingwang ne achu rang ze, “Neimakpui Israel ne peloa kehube leine ge zai hingbang ’ndiakribe leine kangge tat-hang ze chige pa ne hepumzuateube tâ tewgaibe nang ngau mei?

⁷Zai ‘Aigumbe leine pa tewlube chângge a lam helatwang gu lei’ ze I ’nning gai lei; kane pa helatwang mak tai lei, zai pe sipui karasatewpui Juda ne chize ngau lei.

⁸Pa, chi keneibe gabepui Israel gu kahemabe tâ tewbe ramme leine pa ngau lei, I ne pechu tapatkaibe leisi pei gai lu langtua ’ndi de lei; acheusedu pe sipui karasatewpui, Juda ne hing mak ze pa du chige tat ze hepumzuateube tâ tew lei.

⁹Hepumzuateube tâ pa ne mâ-hangge du ’nninggaimakbe ziegene heching-tingchu peireige du kahemabe tâ tew gai ze heram ze pa ne tewhebâ gai ’ndi de lei.

¹⁰Airamme leine tew lu sedu pe sipui karasatewpui, Juda â perutewbe runne zangno pe lung leine ne a lam helatwang mak lei,” ze Tingwang ne kacheu de lei.

¹¹Zai Tingwang ne achu, “Keneibe-gapui Israel â karasatewpui, Juda suane â pe mâu chambe hangge pe runne pechu teilia lei.

¹²Tat ze aipau sam ramme tingpeî ’mbia pau gai lau, zai acheu sa gai lau, ‘Helatwang lau, Israel keneibe gabepui gau, ze Tingwang ne kacheu de lei. A lumpumbe ne ningchu I pie ra mak lei, I â ka’nggiabe kau daseu, ze Tingwang ne kacheu de lei; betingbeta I a lumpum bam ra mak lei.

¹³Tingwang ning Rapeu je nang ’nggigai’ndibe ning mâu ze nang ’nningtâu gai lau, zai hingbang ’ndiakribe leine kangge hesangme dage nang ka’nchâbe ramme benai ningnui ne a kuâpheumakbe ze rangpat kai lau, ze Tingwang ne rang lei.

¹⁴Hei, keneibe ’nggame bau gau, helatwang dai lau, ze Tingwang ne rang lei. I â ningnui je kereîpeu lei. Namdi gene hangkat zai kelak kat gene hangna je I ne ngua gu lei, zai I ne ningnui je Zaion ’mbe ngua gai gu lei.

¹⁵“ ‘Zai a lung chîbe kau melireîme kaningchingbe benai mâ-’nningchibe ne ningnui je reîrabe kau I ne ningnui je pei gu lei.

¹⁶Zai ningnui heram ge pung-ze-sapat dezai, chipau ting dezai â penui ne, “Tingwang gu samhatkaibebung,” kacheube sachu dai ra mak lei, ze Tingwang ne kacheu de lei. Chize penui ne ’nningdau dai ra mak nune chibam ra mak, nune ’ngngaî ’ndu lei; chize tew gai dai ra mak lei.

¹⁷Chipau ting ge Jerusalem je Tingwang gu heguang-bamrak, acheu ze kû gu lei, zai Tingwang bambe bâm Jerusalem ge heram leine wang’ndui gu lei, zai penui lungriaksiabe tak ze penui lungchibe ne sui ta du lei.

¹⁸Chipau ting ge Juda ki ze Israel ki ge herua gai gu, zai penai herua lu ze tingpeî ’mbia gu heram gene ningnui peume hang I ne peigairabe heram ’mbe wang gu lei.

¹⁹“ ‘’Ndaigum ze a na ’mpeumime ruage ningchu I kai ra mei, zai heram leine ruage peluî yilangbe heram, mi suiyika’ntaberam ze ningchu I ne pei gai ra mei ze I ’nning bam lei. Zai a chai suibe gene ’nreitat dai ta di ze achu nang ne, a peu acheu kû ra hangge I ne heguî bam lei.

²⁰Gesangsing ze, lungsanggapui ne pe napeu je meu gai gum ze, ningnui achu lungsangtew mak ze bam lei, Hei, Israelme kibau gau,’ ze acheu zeu,” ze Tingwang ne kacheu de lei.

²¹Ketaîloa ramme gene hekuâ seu lei, Israel na ’mpeumime hap ze gekiebe kuâ zeu, penui ne penui ’mpuî tat’nsia’ndibe ziegene Tingwang penui Rapeu je penui ’ngngaî ’ndi de lei.

²²“Helatwang lau, Hei neimakme name gau, ningnui keneibe gabe ze I ne tew’mmi gai gu lei.” “Pie le lau, ning dage anui wang lei, nang â Tingwang anui Rapeu daseu.

²³Pelingsing ze peloa ramme ze kechoabe lei, peloa’ntûm ramme ze katelupbe lei. Pelingsing ze Tingwang anui Rapeu ge Israelme hang tewka’nringbe la lei.

²⁴“Kane anui rîting gene mi ka’ngngambe tâ tewgai’ndibe ramme zene anui peume tâ tewhereugaibe penui gu melidung, getumdung, penui na ’mpeumi ramme, benai ’mpuimi ramme leine je tew’ngga kam ’nde lei.

²⁵Mi ka’ngngambe gene anui jeikeu lei, zai peize anui luîlabe ne anui je tapchim be lau; Tingwang anui Rapeu dage anui hemui gai ’ndi daseu, anui zai anui peume, anui rîting gene chuna ting riâ ge zeu; zai anui ne Tingwang anui Rapeu kuâ pheu mak daseu.”