Read Zeme Naga JEREMIA 31 Bible Online

JEREMIA 31 - Zeme Naga bible

JEREMIA 31

¹“Chipau ting ge â, Tingwang ne kacheu de lei, Israelme kibau leine Rapeu I ne chang gu, zai penui ze a gume chang gu lei,” zeu.

²Aigum ze Tingwang ne rang lei: “Hiazutkie gene ringpatlume tingkangram ge ka’nggiabe ngau lu de lei; Israelme sau ra peube luage zeu,

³Tingwang ne achu kedeu ’mbene lia de lei. Betunmakbe kehungbe ne ningchu I hung bei de lei; chidadege ningchu I ’nnum’mmi bam de lei.

⁴Ningchu I teichu gai dai gu lei, dezai ningchu teichu gai bei ze bam gu lei, Hei Israel leusang ka’nchipui gau! Nang keru dai ze keriang-riangbe ’nsumkuak tei gai lu pe suiyika’ntame kelimbe bâm ge nang zuapat ku lei.

⁵Samaria loa ramme ge nang grepchî merie tew dai gu lei; mâ-kiak taume ne tau gu, zai pe rachî teu gu lei.

⁶Ephraim peloaram ge hekêtkaime ne, ‘Chu lau, zai Zaion ’mbe anui hang kei lei, Tingwang anui Rapeu dageu,’ ze acheu kûgairabe tingnaimikpui wangchang gu lei,” ze kacheu de lei.

⁷Tingwang ne aigum ze rang lei: “Jakobbe hangge hesuiyibe ne leutew’nchi lau, zai heram ge kedime hangge ’ngkiak chu lau; sa lau, getoabe pei lau, zai ‘Israelme ’nsakpatme, pe gume je Tingwang ne tew’nring gai bei de lei,’ ze sa lau.

⁸Pie le lau, tingpeî ’mbia heram gene penui je I nguawang gu lei, zai kedei deulangbe bâm gene penui je gekumwang gu lei. Penui ruage pe mikchitme, pepîsiame, ’mpuimi ka’mpungme, zai henalung ra kakerime, baukattew ze gekumwang gu lei; pebau kedibe, penui aige helatwang gu lei.

⁹Hap ze penui wang gu lei, zai penui je tum gai ze I nguatat kai dai gu lei, ’nggeuterak hedui bambe gene pei tat ra penui je I tew gai gu lei, penui kâumakrabe ’mpuî ka’nzeibe ge zeu; Israelme hangge I ne hêpeu chang daseu, zai Ephraim ze a na meraibe lei.

¹⁰“Hei heramzatme gau, Tingwang sam seu le lau, zai ’nggeukâm kedeube ge du chize saba gai lau; ‘Israelme je hûtimraripkaipeu ne pechu gekumwang gu lei, zai melireîpeu ne melidung je reî gum ze pechu reî gu lei,’ ze sa gai lau.

¹¹Jakobbe je Tingwang ne hemi ne ripat kai de lei, zai pe hang peranchizûdibe ba gene pechu ’nripat kai bei daseu.

¹²Zaion loa hube ge penui wang ze heleutew’nchi gu lei, zai Tingwang gu keyibe peipatbe chêu peireige, grepchî dui peireige zai taudui peirei ge, zai melipoine dung peireige benai getumseipoine dung ramme peireige penui suiyi’nta bam gu lei; penui keringbe ze heduizuâbe merie gum bam gu lei, zai penui duângga dai ra mak lei.

¹³Dezaine heleume ramme lim ze penui suiyi’nta gu lei, zai rehangme ramme benai gechîngme penui suiyi ’ngnguplai bam gu lei. Penui kadesuibe ze hesuiyika’ntabe hang tewkedet kai gu lei, penui je I tum gai gu, zai penui je hesuisiabe kelei ge hesuiyibe pei gai gu lei.

¹⁴Tingkume lungsui ze I ne puî’ntaza gai gu lei. Zai I keyibe ramme ge a gu ziemmename lungwângchang ze bam gu lei,” ze Tingwang ne kacheu de lei.

¹⁵Aigum ze Tingwang ne rang lei: “Rama gene puîhapbe benai hap-kadesangbe kuâ seu lei. Rakelle pe name hangge hap bam lei; pe name gadibe ziegene pechu peize tumgaimeu lei,” ze acheu zeu.

¹⁶Tingwang ne: “Ning kuâ happat ta zu lau, zai ning mikdui peize pat ta zu lau, kacheu de lei; ning name peireige nang tâtewgaibe herêu mî pei dai gu lei, ze Tingwang ne kacheu de lei, zai heteurei ram gene penui wang gai dai gu lei.

¹⁷Ning gu hesua hangge kaheguîbe lamui lei, ze Tingwang ne kacheu de lei, zai ning name penui ram ge wang dai gu lei.

¹⁸Ephraim kehapbe kuâ I seuchang de lei, ‘Nang ne achu laddei gai de lei, zai I ’nchi de lei, getumpoine chin-gaimakbe kau gum zeu; achu teiwang gai dai lau, dezai I rechi dai de ra hang, nang â Tingwang a Rapeu daseu.

¹⁹I ’nnuktibe châng gene I kaheli lei; zai achu geteigaibeibe châng dege I a nie kagepei de lei; I ’ngngam di de lei, zai a lung sia-desang di de lei, I hena’ngka ting gu ka’ngngambe pung daseu,’ ze acheu zeu.

²⁰Ephraimbe a na kehungpeu mei? Pa I ka’nraibe poine mei? Pechu I saka’nsia tânege, pechu I chî bam lei. Chidadege pe hangge a lung pei gai lei; pe peireige I ngau’nggia sing gu lei, ze Tingwang ne kacheu de lei.

²¹“Ning gu ’mpuîki hangge pîtrâng ramme kai le lau, ’mpuî gechiauliâbe chia ramme sum lau; himdi’mpuî ze ’nning’mmi le lau, nang tatkaibe ’mpuî’mmai zeu. Heletwang lau, Hei, Israel leusangka’nchipui gau, ning gu namdi ge helatwang dai lau.

²²’Ndaitie ge nang kezairi bam ra lau. Hei ’nnumtewmakpui gau? Tingwang ne kedei ge mâ-karchibe kat ’ndam gai ’nde lei: ’mpuimi ne ’mpeumi je ka’nggum lei,” ze acheu zeu.

²³Baudime gu Tingwang, Israelme Rapeu ne aigum ze rang lei: “Juda gu heram ge benai pe gu namdi ramme ge aipau sam ramme ze penui tei dai gu lei, paukaregabe I ne penui je pei gai dezai neu. ‘Tingwang ne ningchu peize ’nnam gai lau, Hei kapelingbe bambe bâm gau, Hei ka’nchibe loa gau!’ kacheu de lei.

²⁴Juda benai pe gu namdi leine lungherua gu lei, zai helu tâ tewme benai penui gu melidung kereîme leine zeu.

²⁵Leikeudime je I ne helungwângchangbe tew gai gu lei, zai gakeudime lung ze I ne kaipui gai dai gu lei,” ze acheu zeu.

²⁶Chipau chângge â I ’nrakchu lu pie gai de lei, zai I jeibe ge a hangge a sui tewka’ntabe chang lei.

²⁷“Pie le lau, Israel ki benai Juda ki hangge ziemmename benai hekaubena pehaî-pehik puigit bam ra I ne tewgairabe ting ze wangzi gu de lei, ze Tingwang ne kacheu de lei.

²⁸Zai puitua ne ra zai tewkau ne ra, kelitua ne ra, tew’nsia ne ra, zai kesia teiwanggairabe penui peireige I pie bam gum ze, penui je teichu sum gai ra penui peireige I pierabe ting wangchang gu lei, ze Tingwang ne kacheu de lei.

²⁹Chipau ting dezai â, ‘Penui peume ne grepchî hiabe teu bei ze penui name ramme ne penui gêu him lei,’ ze penui acheu dai ra mak lei.

³⁰Kane haimena pe gu-gu hemui gene chai gu lei; grepchî hiabe teu-teume ne pe geu him gu lei.

³¹“Pie le lau, Israel ki benai Juda ki dage samhatkaibe karchibe tâ tewgairabe ting ze wang mui de lei, ze Tingwang ne kacheu de lei,

³²I ne penui napeu chang ze bam bei sedu Ijipram gene penui je I ne penui ba zu ze nguapat ra penui je teibe luage penui paume ne tew’nsia’ndibe samhatkaibe chi penui dage I tewgaibe gumbe makbe zeu, ze Tingwang ne kacheu de lei.

³³Kane aize â chipau chângge Israel ki ge samhatkaibe I tewgairabe ze lei: penui lung ge I a gu hingde kai gu lei, zai penui lungge chize I raw gai gu lei, zai I ze penui Rapeu chang gu zai penui ze a gu ziemmename chang gu lei, ze Tingwang ne kacheu de lei.

³⁴Zai mige ne du pe kining’mpeu zai pe sikina je, ‘Tingwang je chî lau,’ acheu ze geteilia ta du de lei, penui ’nteumena achu chî gu daseu, cheilangbe gene dilangbe chang zeu, ze Tingwang ne kacheu de lei; penui gu hemui-helut I lun gai gu daseu, zai penui gu hemui I chî bam dai ra mak lei,” ze kacheu de lei.

³⁵Aigum ze Tingwang ne rang lei; ’nrîmbeting ge châu ne tingnaimik je kebabe pei, zai tingmuî ge hekêu benai hegi ramme ba ra teleuzun gai bei lau, châu ne sungkling kebut’nrui bei ze hedui-teleu ramme him bam lau— baudime gu Tingwang ze pe ji de lei:

³⁶“Aize pebâm-bâm hang reheîgaibe ramme a masua gene tat kam dizai â, Israelme chaname a masua gene heramzatme chang bambe gene betingbeta hang ga gai du lei,” ze kacheu de lei.

³⁷Aigum ze Tingwang ne rang lei: “Kehu ’mbe tinggîm ze ’ndeuchi lu zai â, zai ’ngkang ’mbe kedeisîng ze peupatchi lu zai â, Israelme chaname leine je I lutua ’ndu lei, penui ne tewgai’ndibe leine ziegeneu, ze Tingwang ne kacheu de lei,” ze acheu zeu.

³⁸“Pie le lau, namdi ze Tingwang hangge Hananelbe gu Heki Kehube gene Kerie mik keriekemui riâ chang ze namdi tewchugaidairabe ting ze wang mui de lei, ze Tingwang ne kacheu de lei.

³⁹Zai ka’ndeube heria ze hela ’mbe ’ndeu’nduâtat ku lei, ’nzeitun ze Gareb loa ’mbe chang gu, zai Goah ’mbia tatzua gai dai gu lei.

⁴⁰Kechaipum ramme benai timbun ramme tuâgaibe bak zai peningkâm leine Kidron geuki chang ze, tingnaimikpat ’mbia Hekun Kemui chang ze, chiramme Tingwang hang ka’nchibe chang gu lei. Betingbeta chize puitua dai ra mak lei, zai tew’nsia dai ra mak lei,” ze kacheu de lei.