Read Zeme Naga JEREMIA 32 Bible Online

JEREMIA 32 - Zeme Naga bible

JEREMIA 32

¹Zedekiabe Juda gu heguang kaheguangbe pakereube kum ge Tingwang dagene Jeremiabe dage sam wang de lei, chize Nebukadrezzarbe gu pakereu ze desatbe kum de lei.

²Chipau ting ge Babilon heguang gu hereikangme Jerusalem je tuaguâ bam lei, zai kemeu’mpeu Jeremiabe je â Judaram heguang gu heguang bâm ge hekaikaime gu hekisiâm ge bangnam gai ’ndi de lei.

³Zedekiabe Juda gu heguang ne pechu bang gai lu ze kacheu de lei, “’Ndaitew ze aigum sam pau lau, ‘Aigum ze Tingwang ne rang lei: Pie le lau, Babilon gu heguang ba ge aipau namdi ze I pei gai de lei, zai pa ne chize lu ’ndu lei;

⁴Juda gu heguang Zedekiabe Kaldiame ba gene ’mbia ra mak lei, kane Babilon heguang ba ge pei sing gai ’ndu lei, zai heju ne heju hemik ne hemik ’nsua lu ze ’mpau gu lei;

⁵zai Zedekiabe je Babilon ’mbe pa nguatat ku lei, zai pechu I ’ngkiâmie mak tâne chige pa bam gu lei, ze Tingwang ne kacheu de lei; Kaldiame je nang ’nggi sedu nang ngam ra mak lei, acheu ze sampau lau?’ acheu zeu,” ze acheu zeu.

⁶Jeremiabe ne sa ze, “Tingwang sam a dage wang lei:

⁷Pie le lau, ning peu henapeu, Shallumbe na Hanamelbe ning dage wang ze, ‘Anathoth ge a gu heningpung bambe ze lui le lau, ’nripatrabe rezie ze â luibe gene ning gu de lei,’ acheu gu lei, kacheu de lei.

⁸Dadege Hanamelbe a kinapeu heki reîme kisîam ge a dage wang lu, Tingwang gu sam luigum ze achu, ‘A gu heningpung Benjamin gu heram Anathoth ge bambe ze lui le lau, ning gu changrabe benai ’nridairabe rezie ze â ning gu de lei; chize ning hang lui le lau,’ kacheu de lei. Dadege aize Tingwang sam de lei be I chî di de lei.

⁹“Zai heningpung a kinapeu Hanamelbe dagene Anathoth ge I lui de lei, zai pechu rangkâng ’ndeupat kai bei de lei, gepûtgeî Shekel kereu sena zeu.

¹⁰A ji raw gai zai ’nchet kai de lei, sakki hang ngau lu rangkâng ze hedu gene ’nchupat kai de lei.

¹¹Dadege luilube leisi ’nchetkaibe beting benai mâ-mâ ranggaibe sam bambe leisikûm ’nchetkaibe ze tei de lei;

¹²zai luilube rawgaibe leisikûm ze Maseiabe na Neriabe na Barukbe dage a kinapeu Hanamelbe bambe gene luilube gu rawgaibe leisikûm ge heji rawgaibe luage sakki ramme bambe gene, zai hekireîme gu hekisiâm ge Judame leine bambe gene I pei gai de lei.

¹³Barukbe dage penui bambe gene I ne die gai ze,

¹⁴‘Aigum ze baudime gu Tingwang Israelme Rapeu ne rang lei: Aipau rawgaibe leisi ramme tei le lau, aipau luilube rawgaibe benai rawgaimakbe leisi zeu, zai chize hegamli ge kai le lau, dezai yi ze bam le ra hangge zeu.

¹⁵Baudime gu Tingwang Israelme Rapeu ne aigum ze sa lei: heki ramme benai helu ramme, zai grepchî merie ramme ze aipau heram ge lui dai gu lei,’ kacheu de lei.

¹⁶“Neriabe na Barukbe je luilube rawgaibe leisi peigai’ndibe chângge, Tingwang dage,

¹⁷‘Hei Tingwang Hera gau, nang tâtewchibe benai ning ba getuapatbe gene tinggîm benai kedei tewgaipeu ze nang lei! Ning hangge mâ de tewhungzûdibe ga lei,

¹⁸changsenângme je hungka’ntipbe teiliapeu, kane pe peume kemaube ze penui peireige zai pe name dage peiruipeu, Hei Reziechibe benai Peranchibe Hera, pe ji ze baudime gu Tingwang,

¹⁹geteiliabe ge pengêudibe benai tâtewbe ge pe ranchipeu; ziemmena leine ’mpuî ge pe mik rak ze, haimena je pe gu ’mpuî benai pa tâtewgaibe rachî luigum ze peiruipeu gau;

²⁰Ijipram ge dak benai ningdaulakbe ramme, chuna riâ changbe, Israelme benai Ziemmena leine dage, chunage gum ze teiliapeu gau.

²¹Ning gume je Ijip kedei gene dak benai ningdaulakbe ramme, peranchibe ba benai getuapatbe ba ranchi zai kehingbe kedibe ne nang ne nguapat kai lei;

²²zai aipau heram ze penui je nang ne pei gai lei, tungdui benai ’ngkuidui ne luabe ram zeu;

²³zai penui gut lu chize ’nram lu de lei, kane penui ne ning kuâ lu mak zai ning gu hingde ge tat mak lei; nang ne penui je tew ra diegaibe leine penui mâ de tew mak lei. Chipauziegene penui peireige aigumbe kesiabe leine wangchang ra nang ne tew gai bei de lei.

²⁴Pie le lau, guawangme hekuînâm ze lu ra wang mui de lei, zai hiazutkie zai herakûm zai herarît ziegene hekuînâm ze Kaldiame pechu ka’nggime ba ge pei gai ’nde lei. Nang ne ’ndaikau sa gai mei be wangchang de lei, zai pie le lau, chize nang ne ngau de lei.

²⁵Acheusede, Hei Tingwang Hera gau, Kaldiame ba ge namdi ze pei gai ’nde leusedu, nang ne achu, “Rangkâng ne heningpung lui lu sakki lu le lau,” ze kacheu de lei’ ze acheu ze I ne gekietew gai de lei,” ze kacheu de lei.

²⁶Tingwang gu sam Jeremiabe dage wangkeu ze:

²⁷“Pie le lau, I Tingwang ziemmena leine Rapeu lei, a hangge mâgetaleine â hungzûdibe la mei? kacheu de lei.

²⁸Chidadege Tingwang ne aigum ze rang lei: Pie le lau, aipau namdi ze I ne Kaldiame benai Babilon gu heguang Nebukadrezzarbe ba ge pei gai lei, dezai pa ne chize lu ’ndu lei.

²⁹Aipau namdi je ka’nggime Kaldiame ne wang ze hemi kai gu, zai rû ’ndu lei, heki’mpûm ge Baal dage mâ-perîmyibe peipatkaibe ramme benai sakrabe peipatbe kêdabe heramme dage, a rata tewpat kai ra ruîpatkaibe ramme zeu.

³⁰Israel na benai Juda name ne penui rîting ge a mikngau ge kesiabe runne tew lei; Israel name ne mâ de tew mak lei, kane penui ba tatew ne a râta ra tew gai lei, ze Tingwang ne kacheu de lei.

³¹Aipau namdi ne a rata benai a lumpum tewpat kai lei, chize tewchugaibe gene chuna riâ changbe ge zeu, chipauziegene chize a masua gene I lutua ’ndu lei,

³²Israel name benai Juda name gu kesiabe leine ziegene zai penui ne a rata tewpatkaibe ziegeneu—penui gu heguangme benai penui gu heguangsinme, penui gu tingkume benai penui gu kemeume, Juda gu ziemmename zai Jerusalem ge lungme leine neu.

³³Penui achu penui ju teilia mak ze penui chai ’nnuk ti de lei; zai penui je geteilia bam sede geteiliabe lu gai ra penui ’ngking mak lei.

³⁴A ji gene kube heki ge penui mi katenetbe heraluî teichu gai lei, chize tewhebâ gai ra hangge zeu.

³⁵Hinnom kâm ge Baalbe gu kehube bâm ramme penui tew gai lei, Judame je hemui ge ngua gai ra hang zai Molekbe dage penui na ’mpeumi benai ’mpuimi ramme je peipatkairabe hang geu, chipau hangge penui je I ai katenetbe tâ tew ra sam die gai mak zai a lung ge du ’nningchu gai me lei.

³⁶“Chidaze chunage, ‘Chize â hiazutkie ne, herakûm ne, zai herarît ne Babilon gu heguang ba ge pei gai ’nde lei,’ ze nang ne kacheube aipau namdi tedeu ge Israelme Rapeu, Tingwang ne rang de lei:

³⁷Pie le lau, penui je I a râtabe zai a lumpumbe zai a laîpat-desanggaibe ziegene penui je kelituagaibe heram leine gene penui je I gekumwang gu lei; aipau bâm ge penui je I teiwang dai gu lei, zai penui je lungzeunetew ze bam ra I tew gai gu lei.

³⁸Zai penui a gu ziemmena chang gu zai I ze penui Rapeu chang gu lei.

³⁹Penui je helung kat zai ’mpuî kat I pei gu lei, chidezai betingbeta penui achu hingchi ra hangge zeu, penui hang yirabe benai penui chângge penui name hang yirabe hangge zeu.

⁴⁰Samhatkaibe betunmakbe penui dage I tew gai gu lei, chidezai penui dage keyibe tâtewbe gene I ’nnuk dai ra mak lei; zai penui lung ge achu kehingbe lungtak I kai gu lei, dezai a dagene penui ’nnuktat mak ra hangge zeu.

⁴¹Penui dage keyibe tewbe ge I a suiyi’nta gu lei, zai lungsangtewbe gene aipau heram ge penui je I sum’ntip kai gu lei, a lung leine ne benai I keringbe leine neu.

⁴²“Aigum ze Tingwang ne rang daseu: Aipau ziemmename peireige aigum kesiabe kedibe leine I teiwanggaibe gum ze, penui peireige keyibe leine, penui dage I samhatkaibe ze I teiwang gai gu lei.

⁴³Aipau ram ge helu ramme lui gu lei, ningnui ne chize sauzîng gai ’ndi de lei, ziemmename mei nune hekaubena mei du ’ngga zeu, ze kacheube zeu; Kaldiame ba ge chize â pei gai ’ndi de lei.

⁴⁴Helupung ramme ze rangkâng ne lui gu lei. Zai heram luilube gu leisi ge heji raw gai zai ’nchet kai gu, zai sakkitew gai gu lei, Benjaminbe gu heram ge, Jerusalem huâzie ramme ge, zai Juda gu namdi ramme leine ge, peloaram gu namdi ramme ge, zai Shephela gu namdi ramme ge zeu; penui paukaregabe I pei gai dai gu daseu, ze Tingwang ne kacheu de lei,” ze kacheu de lei.