Read Zeme Naga JEREMIA 33 Bible Online

JEREMIA 33 - Zeme Naga bible

JEREMIA 33

¹Hekêtkaime gu hekisiâm ge pechu bangnam gai lu bambe luage, Tingwang gu sam lua pakenabe Jeremiabe dage wang de lei:

²“Aigum ze Tingwang kedei ka’ndampeu, Tingwang ne peize bam ra chize peluî tewgaipeu ne rang lei, Tingwang ze pe ji lei:

³Achu kû gai lau, I ning kuâ kak ku lei, zai nang ne chimakbe mâ-kedibe benai tei’mbai’ndibe zat ningchu I teilia gu lei.

⁴Aigum ze Tingwang Israelme Rapeu ne aipau namdi heki ramme tedeu ge benai Juda gu heguangme ki ramme tuaguame benai hiazutkie suage rienambe tewkaukam’ndibe tedeu ge rang lei:

⁵Aime penui lungriaksiabe ziegene aipau namdi gene I a ju tâubai ’ndi dadege a râtabe benai a lumpum kedibe ne I ne lak bei ze penui gu kechaipum ne tuâteniamtiam gai ra Kaldiame ne herei’nggigut zi gu de lei.

⁶Pie le lau, chige hepumsakyibe benai tewka’mmibe I teiwang gai gu lei, zai penui je I tew’mmi gai gu zai lungka’ntuabe benai lungzeunetewbe misongga teilia gai gu lei.

⁷Judame paukaregabe benai Israelme paukaregabe hangge I pei gai dai gu lei, zai penui tingtie’ngka bambe gum ze bam dai ra penui je I tew’nsapchu gai dai gu lei.

⁸A dage penui hemui tewmaugai’ndibe leine penui je I tew’nchi gai gu lei, zai penui hemui tâ tewmau’ndibe leine benai achu ka’nggibe mâu leine I lun gai gu lei.

⁹Zai aipau namdi ze kedeirei ge heram leine penui hangge keyibe I tewgaibe seurame leine masuage a hangge hesuiyibe getoabe zai pengêudibe ji chang ze bam gu lei; penui hing ze kedun gu lei, I ne keyibe leine benai lungka’ntuabe leine I chipau hangge peigaibeibe ziegeneu.

¹⁰“Tingwang ne aigum ze rang lei: ‘Aige â ziemmena mei nune hekaubena mei lung ta di ze putzîng gai ’nde lei,’ ze ningnui kacheube aipau bâm, putzînggai’ndibe Juda gu namdi ramme benai Jerusalem gu puidi ramme ge, zai ziemmena mei nune chige kelungme mei nune hekaubena mâ de gadibe bâm ge,

¹¹hesuiyi ka’ntabe kuâ benai hesuiyibe kuâ, henâukupeu kuâ benai meipui kuâ, zai Tingwang ki ge hesuiyibe-râtewbe peipatbe luage: ‘Baudime gu Tingwang dage hesuiyibe pei gai lau, Tingwang â yi daseu! Pa hungka’ntipbe betingbeta bam-bam daseu!’ acheu ze penui heleutewbe kuâ seu dai gu lei. Heram paukaregabe tingtie’ngka ge gum ze bam ra I pei gai dai gu daseu ze Tingwang ne kacheu de lei.

¹²“Aigum ze baudime gu Tingwang ne rang lei: Aipau bâm, ziemmena benai hekaubena du ’ngga ze putzîng’ndibe bâm zai pe gu namdi leine geze melireîme melidung je reî ze sau’ntak kai ze kelungbe bâm hang chang dai gu lei.

¹³Peloaram gu namdi ramme ge, Shephela gu namdi ramme, zai Negeb gu namdi ramme ge, Benjamin gu heram ge, Jerusalem hia-hiage zai Juda gu namdi ramme ge melidung penui riak seipeu ba kang gene tatpelatat dai gu lei, ze Tingwang ne rang lei.

¹⁴“Pie le lau, I ne Israel ki dage benai Juda ki dage samhat kai ze tewpuigairabe ting ze wangzi gu de lei, Tingwang ne kacheu de lei.

¹⁵Chipau ting ge benai chipau hî dezai â Dabidbe hangge kapelingbe Kiâng tumpat ra tew gai gu lei; zai heram ge pa ne samramka’nzeibe benai kapelingbe tâ tew gai gu lei,

¹⁶chipau ting dezai Juda je tew’nring gai gu, zai Jerusalem ze kehingbe ga ze lung gu lei. Zai ‘Tingwang â anui gu kapelingpeu lei,’ kacheube ji zene kû gu lei.

¹⁷“Aigum ze Tingwang ne rang lei: Israelbe ki heguang-bâm ge ’ntaurabe ziemmena mâdau de Dabidbe hangge ga ra mak lei,

¹⁸zai Lebi kiria tingkume mâdau de a masuage rûkambe-râtewbe peipat ra, mâ-himlei-râtewbe peipat ra, zai betingbeta herâtew bam ra ziemmena ’ngga ra mak lei,” kacheu de lei.

¹⁹Tingwang sam Jeremiabe dage wangkeu ze:

²⁰“Aigum ze Tingwang ne rang lei: Tîngna benai tingmuî beting pehîtit ge wangchang mak ra hangge ningnui ne tîngna benai tingmuî peireige a gu samhatkaibe tewkelichi duî zai â,

²¹chigum ze a guâ ka’ngguapeu Dabidbe dage a gu samhatkaibe tewpâng le dui lei, chidezai pe gu heguang-bamrak ge samram ra hangge pe na bam ra mak, zai a guâ ka’ngguame Lebi kiria gu tingkume dage I samhatkaibe bam dai ra mak lei.

²²Tinggîm baudime je seichi lak gum zai sungkling ge deseî ’ndeuchi lak gum ze, Dabidbe a guâ ka’ngguapeu chaname je I tewpung gai gu lei, zai Lebi kiria tingkume a guâ ka’ngguame je du tewpung gai gu lei,” kacheu de lei.

²³Tingwang sam Jeremiabe dage wangkeu ze:

²⁴“Aipau ziemmename ne, ‘Tingwang ne pa kelânglube kelak kena je tuâpat kai ’nde lei,’ acheu sabe nang â ’nting gai mak mei? Aigum ze penui ne a gu ziemmename je ngauka’nna de lei, chidezai penui mikngau ge penui â heramzat chang ta ra hangge zeu.

²⁵Aigum ze Tingwang ne rang lei: I ne tîngna benai tingmuî peireige a gu samhatkaibe kai makchai â, zai tinggîm benai kedei gu besie hingde ramme teichu gai makchai â,

²⁶Jakobbe chaname benai a guâ ka’ngguapeu Dabidbe chaname je I tuâpat ’ndu zai Abrahambe, Isaakbe, zai Jakobbe haîhikme peireige heguang ra pe chaname ruagene hang kat je de I kelâng gai ra mak lei. Penui paukaregabe I pei gai gu, zai penui peireige ngauka’nggiabe bam gu daseu,” kacheu de lei.