Read Zeme Naga JEREMIA 34 Bible Online

JEREMIA 34 - Zeme Naga bible

JEREMIA 34

¹Babilon heguang Nebukadrezzarbe benai pe gu hereikangme mei ne, zai pa ne pe suitewbe kangge bambe heguangram leine zai ziemmename ’nteumena Jerusalem je benai pe gu hekuînâm leine je ka’nggibe ting ge Tingwang dagene Jeremiabe dage sam wangkeu ze:

²“Aigum ze Tingwang Israelme Rapeu ne rang lei: Tat ze Juda gu heguang Zedekiabe je rang gai ze acheu pechu salia gai lau, ‘Aigum ze Tingwang ne rang lei: Pie le lau aipau namdi ze Babilon gu heguang ba ge I pei gai lei, zai pa ne chize hemi ne rû gu lei.

³Pe ba gene nang ’mbiapat ra mak lei, kane nîm lu ze pe ba ge bala gai sing gu lei; Babilon gu heguang je hemik ne hemik ngau gu zai pechu heju ne heju hedau ze ’mpau gu lei; zai Babilon ’mbe nang tat ku lei,’ zeu.

⁴Acheusede Tingwang sam seu le lau, Hei Juda gu heguang Zedekiabe gau! Aigum ze Tingwang ne ning tedeu ge rang lei: ‘Hiazutkie gene nang chai ra mak lei.

⁵Temichai ze nang chai gu lei. Zai ning peume ning suage heguang keraime hang mâ-perîmyibe ramme ’ntau gai gum ze, ziemmena ramme ne ning hangge mâ-perîmyibe ’ntau ze “Hei, heguang gau!” acheu ze ningchu puîhap ku lei,’ ze acheu zeu. I ne sam sa gai ’ndi daseu,” ze Tingwang ne kacheu de lei.

⁶Dadege kemeu’mpeu Jeremiabe aipau sam ramme leine Jerusalem ge, Juda gu heguang Zedekiabe dage salia de lei,

⁷Jerusalem benai Juda gu namdi sâudiakkaibe, Lakis benai Azeka je Babilon heguang gu hereikangme ’nggi ze bambe luage zeu; Juda gu namdi ramme peranchibe ’nsakkaibe ze â aime hangna runne dadegeu.

⁸Heguang Zedekiabe Jerusalem ge bamme ziemmename leine dage penui je lungzeunetewbe sam saba gai ra samhatkailube chângge Tingwang dagene Jeremiabe dage sam wang lei,

⁹haimena ne Hebraime kebangme ’mpeumi benai ’mpuimi je ’mpat kai ra lei, dezai mige ne Judame pe sikina’mpeu je kebang ge chui gai mak ra lei, zeu.

¹⁰Zai penui pheu gai de lei, heguangsinme leine zai ziemmename leine samhatkaibe ge gut te lei, haimena pe gu kebang ’mpeumi benai ’mpuimi je ’mpat kai ra, dezai penui je kebang ge chui gai dai mak ra hangge zeu; penui ne pheu gai ze chime bau je ’mpat kai ’ndi de lei.

¹¹Kane bechâng dege ’nreiwang dai ze, kebangme ’mpeumi benai ’mpuimi je penui ne ’mpatkaibeime je nguawang dai ze penui je kebang ge kai kadai de lei.

¹²Tingwang sam Jeremiabe dage Tingwang dagene wang de lei:

¹³“Aigum ze Tingwang Israelme Rapeu ne rang lei: Ijip ge kebang chang ze bambe gene ningnui peume je I nguapat ’ngkage penui dage I,

¹⁴‘Tingkum seruk kamgaibe ge Hebraime ningnui dage zuagai’ndime ningnui je kum seruk ’nggua gai lu dezai ’mpat kai sing ra lei; ningnui guâ ka’ngguabe gene ningnui penui je ’mpat kai sing ra lei,’ acheu ze samhat kai lei, kane ningnui peume a kuâ ’ngking mak zai penui kun du a lam ’ndualie mak lei.

¹⁵Ningnui hedeudaukak gene heli lu, zai a mikngau ge ’ndaikau ka’nzei mei be tew ze hangkat-katne pe kining’mpeu je lungzeunetewbe rasam sarua lu, zai a ji gene kube heki ge ningnui a suagene samhat kai lu de lei;

¹⁶kane ningnui ’nreitat dai ze ningnui ne penui keneibe luigum ze ’mpatkaibeime je ningnui hangkat-katne pe gu kebangme ’mpeumi benai ’mpuimi ramme je lu dai, zai penui je ningnui gu kebang hangge kai dai ze a ji tewhebâ gai bei de lei.

¹⁷Chipauziegene aigum ze Tingwang ne rang lei: Lungzeunetewbe rasam ningnui hangkat-katne pe sikiname benai pe kining’mpeu dage paurua lu a kuâ pheu mak lei; pie le lau, ningnui hiazutkie ge, herarît ge, zai herakûm ge lungzeunetew ze bam ra ningnui je I paurua gai lei ze Tingwang ne kacheu de lei. Kedeirei ge heguangram leine ne ningnui je ’nningherârie bam ra I tew gai gu lei.

¹⁸Zai ziemmena a suagene penui sam hat lu a gu samhatkaibe ’ngka ze samhatkaibe sam ramme teimaktadibe ze penui ne getumpoine dâng na hang dângtapkailube kena kak gene penui tatpelapatbe gum ze I du penui dage chigum bam ra tew gai gu lei.

¹⁹Juda gu heguangsinme, Jerusalem gu heguangsinme, kahetiâme, tingkume, zai heram ge ziemmename pezat leine, chi getumpoine dâng kena kak gene tatpelatattime bau zeu;

²⁰zai penui teureime ba ge benai penui keringbe peume ba ge chime leine je I pei gai gu lei. Penui kechaipum ze tinggîm ge liamruabe ’nruine ramme benai kedei ge hekaubena ramme hetak hang chang gu lei.

²¹Zai Zedekiabe Juda gu heguang benai pe gu heguangsinme je penui teureime ba ge benai mi-mige penui keringbe peume, Babilon heguang gu hereikangme ningnui dagene helettatdaidime ba ge I pei gai gu lei.

²²Pie le lau, I samdie gai gu lei, zai penui je aipau namdi ge teiwang gai dai gu lei, ze Tingwang ne kacheu de lei; zai chi namdi je penui ’nggi gu lei, zai chize lu ’ndu lei, zai hemi ne rû ’ndu lei. Juda gu namdi ramme ge mî du lung mak ze sâuzîng ze bam ra I tew gai gu lei,” ze acheu zeu.