Read Zeme Naga JEREMIA 35 Bible Online

JEREMIA 35 - Zeme Naga bible

JEREMIA 35

¹Tingwang dagene Jeremiabe dage Josiabe na Jehoiakimbe, Juda gu heguang ting ge sam wangbe ze:

²“Rekabme ki lam’mbe tatchu lau, zai ’mpau gai lu ze penui je Tingwang gu heki ge hekisiâm kat ge nguawang gai lau; zai wain sak ra penui je pei be lau,” kacheu de lei.

³Dadege Jeremiabe na, Habazziniabe na Ja-azaniabe je zai pe sikiname, zai pe na ’mpeumi ramme leine zai Rekabme kibaume leine je I ka’nggua de lei.

⁴Shallumbe na Ma-aseiabe, chêuniakbeki kereîpeu ki peireige, heguangsinme ki peireige bamme, Hera gu ziemmena, Igdaliabe na Hananbe name gu hekisiâm ge nguapat lu Tingwang ki ge penui je I nguawang gai de lei.

⁵Dadege Rekabme suage wain ne hegamli ramme puigitbe benai hepiak ramme kai de lei; zai I ne penui je, “Wain sak zu lau,” ze acheu bei de lei.

⁶Kane penui ne kak ze, “Anui â wain sak ra mak lei, anui peu Rekabbe na Jonadabbe ne, ‘Ningnui wain sak ra mak lei, ningnui du zai ningnui name du betingbeta sak mak ra lei;

⁷ningnui heki tew ra mak lei; ningnui helei ling ra mak lei; ningnui grepchî merie tew ra mak lei, zai grepchî merie tei ra mak lei; kane ningnui ting tâluî hetiamki ge lung ra lei, dezai ningnui bamleube heram ge lung’ntiehang ra hangge zeu,’ acheu ze anui je samde gai de lei.

⁸Anui peu, Jonadabbe, Rekabbe na kuâ anui pheu gai de lei, anui, anui name zai anui na ’mpuimi, ’mpeumi anui ting tâluî ge wain sak mak ra,

⁹zai bamrabeki ramme hang tew mak ra anui je sam diegaibe leine ge zeu. Anui gu â grepchî merie, helu, zai helei ’ngga lei;

¹⁰kane anui â hetiamki ge bam lei, zai anui je anui peu Jonadabbe ne samdiegaibe leine anui pheu zai tew de lei.

¹¹Kane Babilon heguangpeu Nebukadrezzarbe heram je ’nggihang dadege, ‘Wang lau, Kaldiame gu hereikangme benai Siriame gu hereikangme je hing daze Jerusalem ’mbe anui tat kei lei,’ ze anui kacheu de lei. Dadege Jerusalem ge anui lung bam de lei,” ze kacheube de lei.

¹²Dadege Tingwang sam Jeremiabe dage,

¹³“Aigum ze baudime gu Tingwang Israelme Rapeu ne rang lei: Tat ze Juda gu ziemmename benai Jerusalem ge lungme je salia lau, ningnui â geteiliabe lu mak ra mei zai a sam ramme ’ngking mak ra mei? ze Tingwang ne kacheu de lei.

¹⁴Rekabbe na Jonadabbe ne pe name je wain sak mak ra samdiegaibe tei’mmi ze tei de lei; zai nemai riâ penui mî de sak mak lei, penui ne penui peume gu samdiegaibe pheu dadegeu. Ningnui je I rang bam de lei, kane ningnui a kuâ ’ngking mak lei.

¹⁵Ningnui dage a guâ ka’ngguame kemeume leine je I lang gai bam de lei, ‘Chunage ningnui hangkat-katne pa kesiabe ’mpuî gene heli zu lau, zai ningnui tatew tak ramme teleu’mmi zu lau, zai penui guâ ’nggua ra kêdabe hera ramme chai suitat se lau, dezai ningnui benai ningnui peume je I peigaibe heram ge ningnui bam gu lei,’ acheu ze sa gai zeu. Kane ningnui kun ’ndualie gai ze achu ’ngking mak lei.

¹⁶Rekabbe na Jonadabbe name â penui peu ne samdiegaibe tei lei, kane aime bau â a kuâpheu mak lei.

¹⁷Chipauziegene Tingwang baudime gu Hera, Israelme Rapeu ne aigum ze rang lei: Pie le lau, Juda benai Jerusalem name leine peireige kesiabe hang I chianggai’ndibe leine I ne teiwang mui de lei; penui je I ranggaibeibe penui ’ngkingmakbe ziegeneu, penui je I ku bei ze penui kakmakbe ziegeneu,” ze acheu ze wang de lei.

¹⁸Kane Rekabbe ki dage Jeremiabe ne, “Aigum ze baudime gu Tingwang Israelme Rapeu ne rang lei: Ningnui ne ningnui peu Jonadabbe ne samdiegaibe pheu ze, pa geteiliabe tei ze pa ne ningnui je samdiegaibe leine tew lei.

¹⁹Chipauziegene aigum ze baudime gu Tingwang Israelme Rapeu ne rang lei: Jonadabbe Rekabbe na hangge mâdau de ziemmena a suage saprabe kau ga ta ra mak lei,” kacheu de lei.