Read Zeme Naga JEREMIA 36 Bible Online

JEREMIA 36 - Zeme Naga bible

JEREMIA 36

¹Juda heguang Jehoiakimbe Josiabe na ne kaheguangbe pamedaibe kum ge Tingwang dagene Jeremiabe dage sam wang ze:

²“Leisizui lu lu ze, Israel benai Juda zai heramzatme leine tedeu ge I ne saka’nsiabe rasam ning suage saliagaibe ting gene zai Josiabe kaheguangbe ting gene zai chuna ting riâ changbe ge I ning dage saliagaibe leine raw gai lau.

³Ziemmena ’nteumena ne pe gu-gu kesiabe ’mpuî gene heliwang dai ra hangge Juda ki peireige I mâ-kesiabe tew gai ra ka’nningbe ze penui seu le lêu gu lei, chidezai penui gu tatew tak kesiabe hemui ze I ne lun gai be ra hangge zeu,” ze kacheu de lei.

⁴Dadege Jeremiabe ne Barukbe, Neriabe na je ku de lei, zai Tingwang sam pechu (Jeremiabe je) ranggaibe leine pa ne kiâpat kai bei ze leisizui ge Barukbe ne raw gai de lei.

⁵Zai Jeremiabe ne Barukbe dage samdie gai ze, “Tingwang gu heki ’mbe tatrabe gene achu tew’nsau gai ’nde lei;

⁶chidaze nang tat ra de lei, zai teseureibe mai ge Tingwang gu heki ge ziemmename leine geseube ge nang Tingwang gu sam I ne kiâpatkaibe gene nang rawgailube ze leisizui gene kiâlia ra de lei. Juda gu ziemmena penui gu namdi ramme gene patme leine geseube gene du nang chiramme ze kiâlia ra de lei.

⁷Chidezai penui gu gekietewbe Tingwang suage wang gu lei, zai haimena penui kesiabe gene heli gu lei, Tingwang ne aime bau dage sabagaibe ze â pe râtabe benai pe lumpumbe kedibe dadegeu,” ze kacheu de lei.

⁸Zai Barukbe Neriabe na ne Jeremiabe kemeu’mpeu ne pechu Tingwang gu sam Tingwang gu heki ge leisizui gene kiâ ra ranggaibe leine ze tew de lei.

⁹Josiabe na Jehoiakimbe Juda gu heguang gu pamengeube tingkum gu pasekuibe kêu ge, Jerusalem gu ziemmename leine zai Juda gu namdi ramme gene Jerusalem tat ra zuapatme leine Tingwang suage teseurei ra pau gai de lei.

¹⁰Dadege, ziemmena leine geseube ge, Tingwang gu heki ge rawsuipeu Shaphanbe na Gemariabe gu hekisiâm ’nreibe heguangki rielung ge bambe Tingwang gu Keriekemui Karchibe gutbe ge Barukbe ne Jeremiabe gu sam ramme leisizui gene kiâlia de lei.

¹¹Gemariabe na Mikaiabe Shaphanbe na ne Tingwang gu sam ramme pelane leisizui gene seu lu dege,

¹²heguangki ge rawsuipeu gu hekisiâm ’mbe wangkeu de lei; zai heguangsinme leine chige ’ntaudam bam lei. Rawsuipeu Elishamabe, Shemaiabe na Delaiabe, Akborbe na Elnathanbe, Shaphanbe na Gemariabe, Hananiabe na Zedekiabe, zai heguangsinme leine zeu.

¹³Barukbe ne baudime geseube gene leisizui kiâlia gai dege chigene Mikaiabe pa seulube sam penui dage salia gai de lei.

¹⁴Dadege heguangsinme leine ne Kusibe na, Shelemiabe na, Nethaniabe na Jehudibe je Barukbe suage, “Ziemmena leine geseube ge nang kiabe leisizui ning ba ge tei lu wang lau,” ze rang gai ra lang gai de lei. Dadege Barukbe pe ba ge leisizui tei lu pe dage wang de lei.

¹⁵Zai penui ne pechu, “’Ntaukeu lu chize kiâ gai lau,” kacheu de lei. Dadege Barukbe chize penui suage kiâlia de lei.

¹⁶Sam ramme pelane penui seu lu dege penui hing di ze kat-kat je heguapierua de lei; zai penui ne Barukbe je, “Heguang dage aipau sam leine anui pau gai sing gu lei,” kacheu de lei.

¹⁷Dadege penui ne Barukbe je, “’Ndaigumbe tak gene nang aipau sam ramme leine raw lu lau? Pa ne kiâliabeibe gene raw be kau mei? Anui je rang gai lau,” ze kacheu de lei.

¹⁸Barukbe ne penui je kak ze, “Leisizui ge leisidui ne chiramme I rawbe luage pa ne I sui ra aipau sam ramme pelane kiâ gai de lei,” kacheu lei.

¹⁹Dadege heguangsinme ne Barukbe je, “Tat ze nang benai Jeremiabe ’mbai de lau, zai ningnai ’ndaige la mei be peize mî de chî se lau,” kacheu de lei.

²⁰Dadege heguangki bâm ’mbe heguang tailam penui tat ti de lei, rawsuipeu Elishamahbe gu hekisiâm ge leisizui kai nan zeu; zai sam ramme leine penui ne heguang dage pau gai de lei.

²¹Dadege leisizui lu ra Jehudibe je heguang ne lang gai de lei, zai rawsuipeu Elishamahbe gu hekisîam gene pa chize lu lu de lei; zai Jehudibe ne chize heguang benai heguangsinme, heguang taige sapme dage kiâlia de lei.

²²Chize pasekuibe kêu de lei, zai heguang â hetatingki ge ’ntau bam lei, zai pe suage hemikuak ge hemitau bam lei.

²³Jehudibe set chum, set medai (leisikûm) kiagaibe ge heguang ne chiramme ze kêdareîne ne rum’nsia lu chize hemikuak ge hemi ge tuâ gai de lei, hemikuak ge hemi bambe zene leisizui ze tau kam ne mak tâne zeu.

²⁴Acheusede, heguang mei nune pe guâ ka’ngguame mei ze mî du aipau sam ramme geseume leine hing du hing mak, zai penui paî ramme du penui hit mak lei.

²⁵Elnathanbe benai Delaiabe zai Gemariabe ne du heguang je leisizui rû mak ra rang bei sede pa ne penui kuâ ’ngking mak lei.

²⁶Zai heguang ne Jeramilbe heguang na zai Seraiabe Azri-elbe na zai Abdilbe na Shelemiabe je rawsuipeu Barukbe benai kemeu’mpeu Jeremiabe je nîm ra heguang ne samdie gai de lei, kane Tingwang ne penai je tei’mbai ’ndi de lei.

²⁷Chunage Jeremiabe ne kiâpat kai bei ze Barukbe ne rawgaibe leisizui benai pe sam ramme heguang ne rûkam’ndibe chângge, Tingwang gu sam Jeremiabe dage wang de lei:

²⁸“Kêdabe leisizui tei le lau, zai chige keraîbe leisizui ge bambe rawgairaibe sam leine raw gai lau, Juda gu heguang Jehoiakimbe ne rû’ndibe zeu.

²⁹Zai Judaram heguang Jehoiakimbe tedeu ge nang acheu sa gai ra lei, ‘Tingwang ne acheu sa ze “’Ndaitew ze Babilon heguang ne wang ze aipau heram ze tew’nsia sing gu lei, zai chigene ziemmename benai hekaubena ramme je tewchat ’ndu lei, ze nang raw gai lau?” acheu ze nang ne leisizui ze rû ’ndi de lei.

³⁰Chipauziegene Jehoiakimbe Juda gu heguang tedeu ge aigum ze Tingwang ne rang lei, Dabidbe gu heguang-bamrak ge ’ntaurabe kau hang pe hangge mî de pa ngau ra mak lei, zai pe gu kechaipum ze tîngna ge tingnaichiê lumbe ge tuâpat kai gu, zai tingmuî ge kebunzeu ge tuâpat kai gu lei.

³¹Zai pa benai pe haîhikme zai pe guâ ka’ngguame je penui gu hemui-helut ziegene I tewsâ gu lei; penui peireige zai Jerusalem name peireige, zai Juda gu ziemmename peireige, kesiabe leine I sagaindibe ze I teiwang gai gu lei, ze acheu zeu,’ kane penui seu ra mak lei,” ze acheu zeu.

³²Chidadege â Jeremiabe ne, kêdabe leisizui tei lu Judaram gu heguang Jehoiakimbe ne hemi ge rûgai’ndibe, chi leisizui gu sam leine Jeremiabe mui gene rang bei ze rawpeu Neriabe na leisirawpeu Barukbe je pei bei de lei; zai ka’nzuâbe sam misonggabe ramme chige kai’mpam gai de lei.