Read Zeme Naga JEREMIA 37 Bible Online

JEREMIA 37 - Zeme Naga bible

JEREMIA 37

¹Josiabe na Zedekiabe, Babilon heguang Nebukadrezzarbe ne Judaram ge heguang hang tewgaibeipeu ne, Jehoiakimbe na Koniabe na kelei ge kaheguang lei.

²Kane pa du, pe guâ ka’ngguame du zai heram ge ziemmename leine ne du Tingwang gu sam ramme kemeu’mpeu Jeremiabe dagene paugaibe ’ngking mak lei.

³Heguang Zedekiabe ne Shelemiabe na, Jehukalbe, zai Ma-aseiabe na Zephaniabe tingkupeu je kemeu’mpeu Jeremiabe dage lang gai ze “Tingwang anui Rapeu dage anui hangge gekietew gai lau,” ze kacheu de lei.

⁴Chunage Jeremiabe â ziemmename ruage tatgut, tatpat ze bam lei, pechu kebangki ge kai mak kerei dadegeu.

⁵Pharaobe gu hereikangme Ijip gene pat te lei; zai Kaldiame Jerusalem je tuaguâ ze bamme penui rasam seu lu ze Jerusalem gene penui ’mbiapat te lei.

⁶Dadege Tingwang sam ze Kemeu’mpeu Jeremiabe dage wang de lei,

⁷“Aigum ze Tingwang Israelme Rapeu ne rang ze: Achu kemêt ra ningnui a dage langgaipeu, Judaram heguang dage ningnui ne sarabe ze, ‘Pie le lau, Pharaobe gu hereikangme ningnui je ’ngngâ ra wangme penui ram Ijip ’mbe helat dai ra ’nning la de lei,

⁸zai Kaldiame ne wang dai lu aipau namdi ze ’nggi gu lei. Penui ne chize lu zai hemi ne rû ’ndu lei.

⁹Aigum ze Tingwang ne rang lei, ningnui runne ningnui je duai ze, “Kaldiame â anui dagene ’mbia sing gu lei,” ze acheu se lau, penui â ’mbia ra mak daseu.

¹⁰Kaldiame ningnui je ka’nggime gu hereikang baudime je ningnui duî lu leusede kahejamme lamui rei lei, haimena pe gu hetiamki ge la lei, penui chu lu aipau namdi ze hemi ne rû ’ndu lei,’ ze acheu ra lei,” ze acheu zeu.

¹¹Chuna Kaldiame gu hereikangme Pharaobe gu hereikangme wangbeibe ziegene Jerusalem gene zuapat ti dadege,

¹²Jeremiabe Jerusalem gene Benjamin gu heram ’mbe tat ra zuapat ti de lei, pe damrabe chi ziemmename ruage lu ra hangge zeu.

¹³Benjamin Keriekemui ge pa bambe lua, chige hekêtkaipeu pe ji Irijabe Shelemiabe na, Hananiabe na, ne kemeu’mpeu Jeremiabe je tuî ’ndi lei, “Kaldiame lam’mbe nang pak kai de ra tew lei,” ze acheu zeu.

¹⁴Zai Jeremiabe ne, “Chize â karasa lei, I â Kaldiame lam pak kai de ra tew me lei,” kacheu de lei. Kane Irijabe pe kuâ ’ngking mak ze, Jeremiabe je nîm lu heguangsinme dage pechu nguawang gai de lei.

¹⁵Zai heguangsinme ne Jeremiabe je penui râta di de lei, zai penui ne pechu lak ze, rawsuipeu Jonathanbe ki ge pechu bang gai bei de lei, chige kebangki hang tew gai dadegeu.

¹⁶Jeremiabe muiterîngbe sîam ge wang gai lu, chige hezie misongga bam gai lei,

¹⁷heguang Zedekiabe ne pechu nguawang ra lang gai bei ze pechu pe dage nguawang gai de lei. Heguang ne reine ze pe ki gene pechu ’nneu ze, “Tingwang dagene mâ-sam ge â la mei?” kacheu de lei. Jeremiabe ne kak ze, “Lamui lei,” kacheu de lei. Dadege pa ne sa ze, “Babilon heguang ba ge ningchu peipat kai ’ndu lei,” acheu bei de lei.

¹⁸Jeremiabe ne heguang Zedekiabe je, “Ning dage mei nune ning guâ ka’ngguame dage mei, nune aipau ziemmename dage mei, I ne ’ndaikau kemaube tew gai bei ze ningnui ne achu kebangki ge kai lau?

¹⁹’Ndai’ngge ningnui gu kemeume ningnui dage, ‘Babilon gu heguang ze ningnui benai aipau heram ’nggi ra wang ra mak lei,’ acheu ze ningnui dage sampaugaime la lau?

²⁰Chunage seu le lau, ningchu I kiam lei, Hei a wangpeu zai heguang gau: a kiamsam ze lu gai lau, zai rawsuipeu Jonathanbe ki ge achu lang gai ta lau, chige I chai gai mak ra hangge zeu,” ze kacheu lei.

²¹Dadege Heguang Zedekiabe ne samdie gai ze, penui ne Jeremiabe je kereîme gu hekisiâm ge kai de lei; zai nai’nsangne ge tingkukuak kat-kat tingku langme gu ’mpuîhimdi gene pei pei de lei, namdi gu tingku ga mak tânege zeu, Dadege kereîme gu hekisiâm ge Jeremiabe bam bam de lei.