Read Zeme Naga JEREMIA 38 Bible Online

JEREMIA 38 - Zeme Naga bible

JEREMIA 38

¹Chunage Mattanbe na Shephatiabe, Pashhurbe na Gedaliabe, Shelemiabe na Jukalbe, zai Malkiabe na Pashhurbe ziemmename leine dage Jeremiabe ne saliabe sam ramme seu lu de lei,

²“Aigum ze Tingwang ne rang lei, aipau namdi ge bamme â hiazutkie gene, herakûm gene zai herarît gene chai gu lei; kane Kaldiame lam’mbe tatbe kau â, ring gu lei; pe keringbe hereichâ gum chang ze pa ring ra ngau gu lei.

³Aigum ze Tingwang ne rang lei, Aipau namdi ze â Babilon heguang gu hereikangme ba ge pei gai sing ’ndu, zai lu ’ndu lei,” ze kacheube zeu.

⁴Dadege heguangsinme ne heguang je kacheu de lei, “Peize aipaupeu je â tewchat ’ndu lau, pa ne aipau namdi ge sâudiakkaime hereikangme baran tew’nggakeu zai baudime ran tew’nggakeu daseu, aigumbe sam ramme penui dage saliabe geneu. Aipaupeu je â ai baudime hang yirabe peu mak ze, kane penui hang siarabe peu lei,” acheu zeu.

⁵Heguang Zedekiabe ne sa ze, “Pie le lau pa â ningnui ba ge lamui lei; heguang â ningnui peireige mâ de tewchi lak daseu,” kacheu de lei.

⁶Dadege penui ne Jeremiabe je tei lu zai Malkiabe heguang na gu dekuaki, kereîme gu hekisiâm ge bambe ge pechu heria gene teipelakeu ze tuâ gai ’ndi de lei. Zai dekuaki ge hedui ’ngga lei, tingniâ runne lei, zai Jeremiabe tingniâ lung ’mbe kêugut ti de lei.

⁷Ebed-melekbe Ethiopia’mpeu, kahetiâpeu, heguang ki ge bambepeu, Jeremiabe je dekuaki ge penui ne kai ’nde lei be seu lu dege—heguang â Benjamin Keriekemui ge ’ntau bam lei—

⁸Heguang ki gene Ebed-melekbe pat lu heguang dage salia de lei,

⁹“A wangpeu heguang gau, aime ne kemeu’mpeu Jeremiabe je dekuaki ge tuâ gai ze pe peireige tâtewgaibe ze mâ-kesiabe penui ne tew gai de lei; zai chige pa ’njei ze chai gu de lei, namdi ge tingku ka’nsakbe mâ de ga di daseu,” ze acheu zeu.

¹⁰Dadege heguang ne Ebed-melekbe, Ethiopia’mpeu je samdie gai ze, “Aigene ’mpeumi hangchum je nang ngua le lau, zai kemeu’mpeu Jeremiabe je pa chairabe suage dekuaki gene chakpat kai ne lau,” ze kacheu de lei.

¹¹Chigum ze Ebed-melekbe ne chime je ngua lu heguang ki ge keruaki ’mbe tat ze paichiebung bambe bâm ge wang lu penui ne dekuaki ge Jeremiabe tailam heria gene ’mpatkeugaibe paî siadibe ramme benai kai tadibe paîni ramme chigene lu de lei.

¹²Dadege Ebed-melekbe Ethiopia’mpeu ne Jeremiabe je, “Paîrie ramme benai paî ramme ze ning jak benai heria kakge kai le lau,” kacheu de lei. Jeremiabe chigum ze tew de lei.

¹³Dadege heria ne Jeremiabe je gaupat lu dekuaki gene chakchu gai bei de lei. Zai Jeremiabe â kereîme gu hekisiâm ge bam bam di de lei.

¹⁴Heguang Zedekiabe ne kemeu’mpeu Jeremiabe je kû ra lang gai de lei, zai Tingwang gu kellumki gutbe pakechumbe kemui gene pechu kahedau de lei. Heguang ne Jeremiabe je, “I ningchu mâ kat ’nneu gu lei; a dagene mâ de tei’mbai se lau,” kacheu de lei.

¹⁵Jeremiabe ne Zedekiabe je, “I ningchu salia dezai nang achu tewchat mak sing gu mei? Zai ningchu I geteilia sedu nang a kuâ ’ngking ra mak lei,” acheu bei de lei.

¹⁶Dadege heguang Zedekiabe reine ze Jeremiabe dage samhet te lei, “Tingwang anui keringbe tewgaipeu bam-bambe ziegene ningchu I tewchat ra mak, zai aime ning gu keringbe peume ba ge du pei gai ra mak lei,” ze acheu zeu.

¹⁷Dadege Jeremiabe ne Zedekiabe dage sa ze, “Aigum ze Tingwang baudime gu Hera, Israelme Rapeu ne rang lei, Babilonme gu heguangsinme dage ningchu nang peipat kai bei zaine â, ning gu keringbe ’nzuak kai gu lei, zai aipau namdi ze hemi ne rû ra mak lei, zai nang benai ning ki ring gu lei.

¹⁸Kane nang ne Babilon gu heguangsinme dage ningchu peipat kai mak zaine â, aipau namdi ze Kaldiame ba ge pei gai ’ndu lei, zai penui ne chize hemi ne rû gu lei, zai nang penui ba gene pak’mbia ra mak lei,” acheu bei lei.

¹⁹Heguang Zedekiabe ne Jeremiabe je, “Kaldiame dage pakkaidime je I hing lei, makchai â, penui dage achu peipat kai bei ze penui ne achu tew’nsia nan ta du lei,” kacheu de lei.

²⁰Jeremiabe ne, “Penui dage ningchu pei gai ra mak lei. Chuna ge I ningchu ranggaibe ge Tingwang kuâ pheu gai zu lau, zai chize ning hangge yi gu lei, zai ning gu keringbe ’nzuak kai gu lei.

²¹Kane nang ne ningchu peipatkaimeu dizai â aize Tingwang ne achu liâgaibe ze de lei:

²²Pie le lau, Juda heguangki ge ’mpuimi sâudiakkaime leine je Babilon heguang gu heguangsinme dage nguapat ze kacheu de lei, ‘Ning kangme nang ’nnumtewme ne ningchu choa de lei, zai ning peirei wang de lei; chuna â tingniâ ge ning pî keu gai de lei, ning dagene penui ’nnuktat te lei,’ acheu zeu.

²³Ning nâu ramme leine benai ning name leine je Kaldiame dage nguapat kai gu lei, zai nang ze du penui ba gene ’mbiapat ra mak lei, kane Babilon gu heguang ne nîm ’ndu lei; zai aipau namdi ze hemi ne rû ’ndu lei,” kacheu de lei.

²⁴Chidadege Zedekiabe ne Jeremiabe je, “Peize mi-mi ne du aipau sam ramme chî se lau, dezai nang chai ra mak lei.

²⁵Heguangsinme ne I ningchu ka’mpau lei be seu lu zai ning dage wang lu ningchu, ‘Heguang dage nang ’ndaikau sa mei zai heguang ne ning dage ’ndaikau sa mei be anui je salia lau; anui dagene mâ de ’mbai se lau, zai anui ne ningchu tewchat ra mak lei,’ ze acheu dizai â,

²⁶penui je nang salia ra lei, ‘Heguang dage I kiam lei, dezai achu Jonathanbe ki ’mbe chige chai gai ra lang gai mak ra hangge zeu,’ acheu zeu” ze kacheu de lei.

²⁷Chidadege heguangsinme leine Jeremiabe dage wang lu ze pechu ka’nneu de lei, zai pa ne penui je heguang ne pechu geteiliabe gum ze kak te lei. Dadege pechu penui ka’mpaube ze sau di de lei, ka’mpaube ze miramme ne seuchang mak rei dadegeu.

²⁸Zai Jerusalem ze lu ’nde mak tâne Jeremiabe â kereîme gu hekisiâm ge bam de lei.