Read Zeme Naga JEREMIA 39 Bible Online

JEREMIA 39 - Zeme Naga bible

JEREMIA 39

¹Zedekiabe Juda gu heguang gu pasekuibe tingkum gu, pakereube kêu ge, Babilon gu heguang Nebukadrezzarbe benai pe gu hereikangme leine Jerusalem je ’nggi ra wang ze chize tuagua de lei;

²Zedekiabe gu tingkum kereu ze kat gu pamedaibe kêu ge, hezie pasekuibe mai ge namdi ze riputgut te lei.

³Jerusalem ze lu lu dege, Babilon heguang gu heguangsinme wang ze keriekemui sûngngang ge ’ntau gai de lei: Nergalsharezerbe, Samgar-nebobe, Sarsekimbe Rabsaris’mpeu Nergalsharezerbe Rabmag’mpeu, Babilon heguang gu saibe ramme leine wang ka’ndui de lei.

⁴Zedekiabe Juda gu heguang zai hereikangme leine penui je ngau lu dege, penui pak te lei, tingmuî ge namdi hela zuapat ze heguang gu merie ’mbia ’mbene keriekemui gene kerie kena kak tatpelatat ti de lei; zai Araba ’mbia penui tat ti de lei.

⁵Kane Kaldiame gu hereikangme ne penui je guaka’nsa de lei, zai Zedekiabe je Jeriko kâm gene guachang de lei; zai pechu penui nîm lu dege, Babilon gu heguang Nebukadrezzarbe dage Hamath gu heram Ribla ge penui ne pechu teiwang gai de lei; zai pe peireige samram de lei.

⁶Babilon gu heguang ne Ribla ge Zedekiabe na rehangme je pa ngaube sing gene tewchat kai de lei; zai Babilon gu heguang ne Judame kedime leine je tewchat kam ’ndi de lei.

⁷Zedekiabe mik pa ne latpat lu, Babilon ’mbe teitat ra hegeîria ne pechu pi gai de lei.

⁸Kaldiame ne heguang ki benai baudime ki rû kam lu Jerusalem kerie tewbakeu kam ’ndi de lei.

⁹Dadege kereîme gu pemuitewpeu Nebuzaradanbe ne ziemmename kêdame aipau namdi ge ’nsakpatme, pe tailam tatme, zai baudime bamkuame je Babilon ’mbe kebangnîmtat te lei.

¹⁰Nebuzaradanbe, kereîme gu pemuitewpeu ne Juda gu heram ge kelaksiame hanggesame mâ de ’nggame je sâudiak kai de lei, zai penui je grepchî merie benai helu ramme pei kam gai de lei.

¹¹Jeremiabe tedeu ge Nebuzaradanbe ki reîme gu pemuitewpeu dagene Babilon gu heguang Nebukadrezzarbe ne samdie gai de lei,

¹²“Pechu ngua lu ze reî’mmi lau, zai pechu tewhereu se lau, zai pa ne ningchu rangbe luî gene pechu ngua lau,” acheu zeu.

¹³Dadege Nebuzaradanbe kereîme gu pemuitewpeu, Rabsaris’mpeu Nebushazbanbe, Rabmag’mpeu Nergalsharezerbe, zai Babilon heguang gu saibe besuitewme leine ne lang gai ze,

¹⁴kereîme gu hekisiâm gene Jeremiabe je ngua lu de lei. Shaphanbe na, Ahikambe na Gedaliabe dage pechu penui lang gai lei, dezai pa ne pechu pe ki lam’mbe teitat ra hangge zeu. Dadege baudime ruage pa ngualung ze bam de lei.

¹⁵Jeremiabe kereîme gu hekisiâm ge kainam gai bei ze bambe luage Tingwang gu sam pe dage wang de lei:

¹⁶“Tat chu lau, Ebed-melekbe Ethiopia’mpeu dage, ‘Aigum ze baudime gu Tingwang Israelme Rapeu ne rang lei: Pie le lau, aipau namdi ge a sam ramme tewpui gai gu lei, keyibe hanggene makse kesiabe hangge nêu, zai chiramme ze chipau mai ge ning suagene tewpui kam gai gu lei.

¹⁷Kane chipau mai ge ningchu I ’nripat kai gu lei, ze Tingwang ne kacheu de lei, zai ningchu â nang hingme ba ge pei gai ra mak lei.

¹⁸Ningchu I tew’nring gai sing gu lei, zai hiazutkie gene nang kau gai ra mak lei; kane hereichâ gu gum ze nang ringpat ku lei, nang ne a dage ’nnumka’mmi daseu, ze Tingwang ne kacheu de lei,’ acheu ze salia lau,” ze acheu zeu.