Read Zeme Naga JEREMIA 4 Bible Online

JEREMIA 4 - Zeme Naga bible

JEREMIA 4

¹“Hei Israel gau, nang ne helatwang ra zai â, a dage helatwang zu lau. A dagene ning gu kahebâbe ramme nang ne lutua zai â ’nnumteguak ze bam se lau,

²zai nang ne, ‘Tingwang ringbe ziegene’ samsang, ka’nzeibe, zai kapelingbe gene samhat tizai â, pa gene heramzatme ramme penui runne penui je ’nnam gai gu lei, zai pa ge penui ngeudi gu lei,” ze Tingwang ne kacheu de lei.

³Tingwang ne Juda ge lungme benai Jerusalem ge lungme dage acheu sam rang gai lei: “Ningnui lu ze kedai le lau, zai hetuzeu ge helei ling gai se lau.

⁴Tingwang dage ningnui runne ningnui je rumgeten le lau, ningnui lung rumgeten ne lau, Hei Juda name benai Jerusalem ge lungme gau; ningnui tâtewbe kesiabe ramme ziegene a lumpumbe hemi gum peipat mak ra, zai tew’mmit ra hangge mâge de peize tau mak ra hangge zeu,” acheu zeu.

⁵Juda ge saba gai lau, zai Jerusalem ge sarua gai ze, acheu sa gai lau, “Heram leine ge hegeîluîkie ’mmut kai lau; ’nrung’nchi ze, ‘Wang’ndui gai zu lau, zai kerie rie’mmilube namdi ’mbe tat kei lei!’ acheu zeu.

⁶Hepiepaî Zaion ’mbia teichu gai lau, ring le ra pak chu lau, bam se lau, tingpeî ’mbene kesiabe benai tewka’nsiabe kedibe I teiwang lei.

⁷Duilui pe gu ’mbaibâm gene hang di de lei, zai heram ramme je tewka’nsiapeu tatpat ti de lei; ning ram tew’nsia kam gai ra pe bâm gene pa zuapat ti de lei; ningnui gu namdi ramme tew’nsia nan ze mî de lungbe kau ga gu lei.

⁸Aipauziegene miseigiriapaî ne ’ngkang lu heu ze hap chu lau; Tingwang pe lumpum-kadesangbe anui dagene teihelat dai mak daseu,” acheu zeu.

⁹“Tingwang ne rang ze, chipau mai dezai heguang benai heguangsinme gekuube ga du lei; Tingkume penui duângga gu zai kemeume ’nningchi ta du lei,” ze kacheu de lei.

¹⁰Chidadege I ne, “Penui keringbe ge hiazutkie wangchang sing di bam ze, nang â, ‘Chize penui hangge yi gu lei,’ acheu ze Hei, Tingwang Hera gau, nang ne aime benai Jerusalem je duaiplak kai ’nde lei,” ze kacheu de lei.

¹¹Chipau ting dezai aime benai Jerusalem je salia gai bu lei, “Tingkai lumbe tingkangram ge ketaîloa ’mbene a gu ziemmena lam’mbe guizuabe kelap ra hangge mak zai tew’nchi ra hangge mak,

¹²aipau hangge chizûdibe tingkaichibe a hangge wang lei. Chunage penui peireige samram ze sapeu ze I lei,” ze acheu zeu.

¹³Pie le lau, pa kemâu gum ze hang mui de lei, pe gu timriang ramme natri gum zeu; pe gu hekun ramme â kelie ramme suadu ’nzet zeu— anui duânggabe de lei, anui â sia kam daseu.

¹⁴Hei Jerusalem gau, helungriaksiabe gene ning lung hui ne zu lau, dezai ningchu ’nripat kai be ra hangge zeu. ’Ndaitie ge ning lung ge nang kesiabe ka’nningbe ramme bam bam ra lau?

¹⁵Dan gene hekuâ saba gai lei, zai Ephraim loa gene kesiabe saba gai lei.

¹⁶Heram ramme je pa wang mui de lei, ze rang’ngkia gai be lau; Jerusalem je ranglia gai be lau, “Heram kedeu ’mbene heram tuaguame wang mui de lei; Juda namdi ramme peireige penui ka’nrung lei.

¹⁷Helu reîme gum ze penui pechu tuaguâ la de lei, pa ne achu ka’nggi daseu, ze Tingwang ne kacheu de lei.

¹⁸Ning gu ’mpuî ramme benai ning tatew ramme ze ning peireige teiwang gai lei. Aipau ze ning hangge samrambe de lei, zai chize mi duânggabe de lei; chize ne ning lung sîng deîtau de lei,” zeu.

¹⁹A duânggabe lei, a duânggabe lei! geteube gene I lielak ti de lei! Hei, a lunglim ramme gau! A lung â getuk-desang mui de lei; I zîng ze bamchi lak te lei; hegeîluîkie kuâ ze I seuchang daseu, herei ’ncheu zeu.

²⁰Pausia ka’ndibe ne pausia ka’ndibe suichap ze, heram pelane tew’nsia kam de lei. ’Nnangkatwang ze a gu hetiamki ramme tew’nsia ’nda, a gu lîmsungbe paî ze luakatne tew’nsia kam de lei.

²¹’Ndaitie ge hepiepaî I pie ra lau, zai hegeîluîkie kuâ ze I seu ra lau?

²²“A gu ziemmena ramme â mie kam de lei, penui achu chî mak lei; penui â kemieme ramme lei, penui â mâ-’nningchibe ’ngga lei. Penui â kesiabe tewbe ge bechîam chi lei, kane penui â ’ndaigum ze tâ-yibe tew ra mei be chî mak lei,” acheu zeu.

²³I kedeirei ge pie gai ze, zai pie le lau, chize sia kam da zai perua de lei; zai tinggîm pie gai ze penui dage kebabe ga de lei.

²⁴I peloa’ntûm ramme pie gai de lei, zai pie le lau, penui â ’ngngailia la de lei, zai peloa ramme leine pat-pat gut-gut la de lei.

²⁵I pie gai de lei, zai pie le lau, ziemmena katte ga di de lei, zai liamruabe ’nruipoine ramme leine pietat kam de lei.

²⁶I pie gai de lei, zai pie le lau, perachî ’nchipuigit bambe heram ze tingkangram chang di de lei, zai pe gu namdi ramme leine Tingwang masuage sia kam di de lei, pe lumpum-kadesangbe masuage zeu.

²⁷Tingwang ne acheu ze rang lei, “Heram pelane sauzînggaibe chang gu lei; sede pelane betun-gairabe riâ I tew gai ra mak lei.

²⁸Aipauziegene kedei ze desui gu lei, zai tinggîm kehube ramme ze tik kai du lei; I ne sagaibe ze I ne pe tâ tew gai daseu; I â keli mak zai helat du helat dai ra mak lei,” ze acheu zeu.

²⁹Hekun chingchuame kuâ gene benai bai’mpitu kuâ ramme gene namdi leine pak ku lei; penui ’nrêukang ge gut ku; penui hekâu ’nzak ku lei, namdi ramme leine sâu gai kam da, zai penui dage mî de bam ta de lei.

³⁰Zai nang, Hei sâuzînggai’ndibe kau gau, paî kegiebe ne nang kerubitbe ze ’ndaikau rimba lau, gechâk ramme ne nang ningchu kakerube zeu, chi ning mik ramme nang mâ-ka’nnukbe ne rakreu bam ra tewgaibe zeu? Peruânggabe ge nang ningchu ngauyi ra tew gai lei.

³¹’Mpuimi henalung ra kakeribe kuâ gumbe I seuchang de lei, raîlangbe poine lungkeube mai gum ze kahereube seuchang de lei, Zaion na’mpui pe chui-hereu ze ka’nrungbe seu de lei, pe ba getuapat lu ze, “A duângga lei, kegîme ramme suage I kenuihui la de lei,” ze kacheu lei.