Read Zeme Naga JEREMIA 40 Bible Online

JEREMIA 40 - Zeme Naga bible

JEREMIA 40

¹Nebuzaradanbe kereîme ruage besuitewpeu ne Jeremiabe je Rama ge tat ra ’mpat kai ze, Jerusalem ge benai Juda ge bamme je kebang hang Babilon ’mbe teitatrabe ruage, pa ne pechu pe ba ge kebang gu heria ’nta gai lu nguateiteritatbe luage Tingwang sam pe dage wangkeu de lei.

²Kereîme gu besuiteupeu ne Jeremiabe je teipat lu pechu, “Tingwang ning Rapeu ne aipau bâm peireige kesiabe hang chiang gai de lei;

³Tingwang ne chize teiwang gai ze, pa ne sagaibe luigum ze tew gai de lei. Ningnui ne Tingwang dage hemui gai ze pe kuâ pheumakbe ziegene, aipau ze ningnui peireige wang de lei.

⁴Chunage pie le lau, ning ba ge hegeîria bambe gene ningchu I nemai ge ’mpat kai de lei. Babilon ’mbe a chai suitat ra nang ne nei zai â, kei lei, I ne ningchu tinggeuzun gai gu lei; kane nang ne Babilon a tailam ’mbe tat ra betâu mak lei zai â, tat se lau. Pie gai ni lau, heram pelane ning suage lamui lei; ning hangge betâuyi-yibe zai betâu kahedaube bâm ’mbe tatchu lau.

⁵Nang bam gai de ra zai â, Shaphanbe na, Ahikambe na Gedaliabe Babilon gu heguang ne Juda gu namdi ramme ge laksaibe hang sumgaipeu tailam tatchu lau, zai baudime ruage pe dage bam de lau; makchai nang ne tat ra ’nning’nzei gai-gai ’mbe tatchu lau,” kacheu de lei. Dadege kereîme gu besuitewpeu ne pechu hetak hang benai kela pei gai lu pechu tat ra pei bei de lei.

⁶Chidadege Jeremiabe Mizpa ge Ahikambe na Gedaliabe dage tat ti de lei, zai baudime heram ge sâudiakkaime ruage tat ze pe dage bam di de lei.

⁷Heram lungge hereikangme gu besuitewme leine zai penui gu ziemmena ramme Babilon gu heguang ne Ahikambe na Gedaliabe je heram ge laksaibe hangge sum gai ’nde lei be, zai ’mpeumi, ’mpuimi zai napoine ramme heram ge kelaksialangme, Babilon ’mbe kebang teitatkaimakme je pe dage kai ’nde lei be seu lu dege,

⁸Gedaliabe dage Mizpa ge penui tat te lei—Nethaniabe na Ishmaelbe, Kariabe na Johananbe, Tanhumethbe na Seraiabe, Netophath’mpeu Ephaibe name, Ma-akath’mpeu na Jezaniabe, penui benai penui gu ziemmena tat ti de lei.

⁹Shaphanbe na Ahikambe na Gedaliabe penui benai penui gu ziemmename dage sam het ze, “Kaldiame guâ ’nggua ra hing se lau. Heram ge lung lau, zai Babilon heguangpeu guâ ’nggua lau, chize ningnui hang yi gu lei.

¹⁰A hangge â I â Mizpa ge lung gu lei, Kaldiame anui dage wangrame suage ningnui kelei ge sap ra hangge zeu; kane ningnui hangge â grepchî dui benai tinglum ting gu herachi benai mâ-châdui gekum’ndui le lau, zai chiramme ze ningnui gu heli ramme ge kaigekua le lau, zai ningnui ne lulube namdi ramme ge bam lau,” kacheu de lei.

¹¹Chigum ze Moab ge bamme Judame zai Ammonme ruage bamme zai Edom benai kêdabe heram ramme ge bamme zene Babilon heguang ne Juda ge ’nsakpatme je sâudiak kai lei be benai Shaphanbe na, Ahikambe na Gedaliabe je penui peireige laksaibe hang gum ze sum gai de lei be seu lu dege,

¹²Judame leine penui je kelipatkai’ndibe bâm leine gene helatwang ze Juda gu heram ge wang de lei, Mizpa ge Gedaliabe dage zeu; zai penui grepchî benai tinglum ting gu herachi misongga gekum’ndui gai de lei.

¹³Chunage Kariabe na Johananbe zai heram lungge hereikangme gu pemuipuame leine Mizpa ge Gedaliabe dage wang de lei,

¹⁴zai pechu, “Amonme gu heguang Baalibe ne Nethaniabe na Ishmaelbe je ning gu keringbe lu ra lang gai ’nde lei be nang chî mak mei,” kacheu lei. Kane Ahikambe na Gedaliabe â penui je ’nnumtew mak tai lei.

¹⁵Dadege Kariabe na Johananbe ne reine ze Mizpa ge Gedaliabe je, “I ne tat ze Nethaniabe na Ishmaelbe je tewchat ne chie lei, zai mî de chize chî ra mak lei. ’Ndaitew ze ning gu keringbe pa lu ra lau, dezai Judame ning taige wang’nduigaime leine je tewtimra ’nde ra hangge zeu, zai Juda gu ’nsakpatme ga gai de ra hangge zeu?” kacheu de lei.

¹⁶Kane Ahikambe na Gedaliabe ne Kariabe na Johananbe je, “Aize nang tew mak ra lei, nang karasa ne Ahikambe rasam sa daseu,” acheu bei de lei.