Read Zeme Naga JEREMIA 41 Bible Online

JEREMIA 41 - Zeme Naga bible

JEREMIA 41

¹Pasenabe kêu ge, Elishamabe na, Nethaniabe na, Ishmaelbe, kedibe kiria kau, heguang gu saibe kedime ruage hangkat, ’mpeumi hangkereu je ngua lu, Mizpa ge, Ahikambe na Gedaliabe dage wang de lei. Mizpa ge penui tingku teu herua lage,

²Nethaniabe na Ishmaelbe benai pe dage ziemmena hangkereu bamme sapchu lu Shaphanbe na, Ahikambe na Gedaliabe je hiazutkie ne bikau gai de lei, zai pechu tewchat ’ndi de lei, Babilon gu heguang ne heram ge laksaibe hang sumgaipeu jeu,

³Judame Mizpa ge Gedaliabe dage bamme, zai Kaldiame hereikangme chige bamme leine je du Ishmaelbe ne tewchat kam ’ndi de lei.

⁴Gedaliabe je gîchatbe châng mî de chize chî makge,

⁵ziemmena riakdesat Shekem, Shilo zai Samaria gene penui biagêu gut lu zai penui paî hitpâng lu, zai penui pum ramme gatjâm lu, mâ-himlei-râ tewbe benai mâ-perîmyibe rube Tingwang gu kellumki ge peipat kai ra tei lu wangchang de lei.

⁶Zai Nethaniabe na Ishmaelbe penui je hedau ra Mizpa gene zuapat te lei, hap ze pa pat te lei. Pa penui je hedau lu dege, penui dage pa, “Ahikambe na Gedaliabe tailam gut lau,” kacheu de lei.

⁷Namdi ge penui gut dege, Nethaniabe na Ishmaelbe benai pe dage bamme ne penui je tewchat ’ndi de lei, zai dekuaki ’mbe penui je tuâ gai ’ndi de lei.

⁸Kane penui ruage ziemmena hangkereume ne Ishmaelbe je, “Anui je tewchat se lau, anui gu â dekuîmeu, barli mâ-châdui, zai ’ngkuidui helu ge gekam’nduilube lamui lei,” kacheu de lei. Dadege sau gai lu ze penui je benai penui kangme je tewchat mak sau dai di de lei.

⁹Chuna pa ne tewchatme pum ramme leine tuâgaibe dekuaki ze â di-kadesangbe dekuaki de lei, Heguang Asabe ne Baashabe Israelme gu heguang je ka’nggibe ge ’nseurabe hangge tewgaibe zeu; Nethaniabe na Ishmaelbe ne chige tewchat’ndime pum ramme zene tuâpuigit kai ’ndi de lei.

¹⁰Dadege Ishmaelbe Mizpa ge bamme ziemmename leine je kebang hang nîm de lei, heguang na heleume zai Mizpa ge ziemmena sâudiakkaime Nebuzaradanbe, kereîme gu besuitewpeu ne Ahikambe na Gedaliabe dage peipatkai’ndime leine jeu. Nethaniabe na Ishmaelbe penui je kebang hang nîm lu Ammonme dage tat ra zuapat ti de lei.

¹¹Kane Kariabe na Johananbe zai hereikangme gu besuitewme leine pe dage bamme Nethaniabe na Ishmaelbe ne kesiabe leine tewbe seu lu dege,

¹²penui gu ziemmena ramme je penui tei lu, Nethaniabe na Ishmaelbe je ’nggi ra tat ti de lei. Gibeon ge hezai sungbe kedibe bambe gene penui pechu ka’nggi de lei.

¹³Zai Ishmaelbe dage ziemmena bamme leine ne Kariabe na Johananbe benai pe dage hereikangme gu besuitewme bamme je ngau lu dege, penui suiyi de lei.

¹⁴Dadege ziemmena leine Ishmaelbe ne Mizpa gene kebang teitattime ’nreiwang lu wang kadai de lei, zai Kariabe na Johananbe tailam penui tat ti de lei.

¹⁵Kane Nethaniabe na Ishmaelbe â riakdesatme je ngua lu Johananbe dagene ’nreitat ti de lei, zai Ammonme tailam tat ti de lei.

¹⁶Dadege Kariabe na Johananbe benai hereikangme gu besuitewme pe dage bamme ne ziemmena ramme Nethaniabe na Ishmaelbe ne pa Ahikambe na Gedaliabe—hereikangme, ’mpuimi ramme napoine ramme, zai kahetiâme, Johananbe ne Gibeon gene nguawangkadaime je nguatat te lei.

¹⁷Zai penui tat ze Bethlehem taige Geruth Kimham ge bam de lei, Ijip ’mbe tat ra ’nning zeu,

¹⁸Kaldiame ziegeneu; Ahikambe na Gedaliabe, Babilon gu heguang ne heram peireige laksaibe hang tewgaipeu je Nethaniabe na Ishmaelbe ne tewchat’ndibe ziegene penui chime bau je hing dadegeu.