Read Zeme Naga JEREMIA 43 Bible Online

JEREMIA 43 - Zeme Naga bible

JEREMIA 43

¹Jeremiabe baudime dage Tingwang penui Rapeu gu sam ramme, Tingwang, penui Rapeu ne pechu penui hang langgaibe sa kam lu dege,

²Hoshaiabe na Azariabe benai Kariabe na Johananbe zai katîmphime ziemmena leine ne Jeremiabe je, “Nang karasa sa lei. ‘Ijip ge lung ra tat se lau,’ ze rang gai ra Tingwang anui Rapeu ne ningchu lang gai me lei;

³kane Neriabe na Barukbe ne anui je tingkang ra ningchu kai lei, Kaldiame ruage anui je peipat kai ra hangge zeu, dezai penui ne anui je tewchat ra, makchaine du anui je Babilon ’mbe kebang teitat le ra hangge zeu,” ze kacheu de lei.

⁴Chigum ze Kariabe na Johananbe zai hereikangme gu hereimuiteime zai baudime ne Tingwang kuâ pheu mak te lei, Juda gu heram ge bam bam ra hangge zeu.

⁵Kane Kariabe na Johananbe zai hereikangme gu hereimuiteime Juda gu ’nsakpatme leine Juda gu heram ge lung ra heram leine gene penui je keligaibeibe bâm gene helatwang kadai de lei—

⁶’mpeumi ramme ’mpuimi ramme, napoine ramme, heguang na heleume zai kereîme gu sipai ge kanguame Nebuzaradanbe na Shaphanbe na, Ahikambe na Gedaliabe dage sâugaime leine jeu; kemeu’mpeu Jeremiabe benai Neriabe na Barukbe je du nguatat ti de lei.

⁷Zai penui Ijip gu heram ’mbe wang de lei, penui Tingwang kuâ pheu mak zeu. Zai penui Tahpanhes ge wangchang de lei.

⁸Dadege Tahpanhes ge Jeremiabe dage Tingwang gu sam wang ze:

⁹“Ning ba ge tingchu kedibe ramme tei le lau, zai chiramme Pharaobe gu heguang ki gutbe ’mpuî’ntai ge mâ-kuiki ge Tahpanhes ge, Juda gu ziemmena ramme mikngau ge timdeu keneilube kangge ’mpum gai be lau.

¹⁰Zai penui je acheu salia lau, ‘Baudime gu Tingwang Israelme Rapeu ne aigum ze rang lei: pie le lau, Babilon gu heguang, a guâ ka’ngguapeu Nebukadrezzarbe je I kûwang gai gu, zai pa ne aipau heguang-bamrak ze aipau tingchu ramme I ’mpumgaibe peireige kai gu lei, zai pa ne chipau peireige pe gu heguang paîki liâm gai gu lei.

¹¹Pa wang ze Ijip gu heram ze tew’nsia gu lei, herarît gene hereurame je herarît ge pei gai gu, kebang ge tatrame je kebang ge lang gai gu, zai hiazutkie ge kâugairame hangge hiazutkie pei gai gu lei.

¹²Ijipme gu heram ramme gu kellumki ramme ge pa ne hemi’ntau gai gu lei; zai pa ne penui je rû gu, zai penui je kebang nîmtat ’ndu lei; zai pa ne Ijipme gu heram tew’nchi gu lei, melireîpeu ne pe gu herik bambe mechuapui tewka’nchi gum zeu; zai chigene pe suiyi ze pat tu lei.

¹³Ijipram ge bambe Heliopolis gu tingchusum ramme pa ne tewpâng gu lei; zai Ijipme ramme gu kellumki ramme hemi ne pa ne rû ’ndu lei,’ acheu zeu,” ze kacheu de lei.