Read Zeme Naga JEREMIA 44 Bible Online

JEREMIA 44 - Zeme Naga bible

JEREMIA 44

¹Ijip gu heram ge Migdol ge, Tahpanhes ge, Memphis ge, zai Pathros ge Judame bamme leine tedeu ge Jeremiabe dage sam wangchang de lei,

²“Aigum ze baudime gu Tingwang Israelme Rapeu ne rang lei: Jerusalem peireige benai Juda gu namdi leine peireige kesiabe I ne teiwanggaibe leine ningnui ngau lu de lei. Pie le lau, nemai â penui je putzîng gai ’nde lei, mî de chipau bâm ramme ge bam ta de lei,

³penui ne tâ-kesiabe tew gai ze, chige mâ-perîmyibe rû gai zai penui ne chimakbe zai penui ne du zai ningnui ne du, zai ningnui peume ne du chimakbe kêdabe hera ramme guâ ka’ngguabe gene a rata tewpatkaibe ziegeneu.

⁴Acheusede a guâ ka’ngguame, kemeume je I lang gai bam lei, ‘Hei aipau mâ-katenetbe I ngaugailakbe tâ ze tew se lau,’ acheu zeu!

⁵Kane penui ’ngking mak zai penui kun ’ngngiawang mak lei, penui lungriaksiabe ziegene zai kêdabe hera ramme dage mâ-perîmyibe rûrabe gene heliwangrabe hangge zeu.

⁶Chipauziegene Juda gu namdi ramme ge benai Jerusalem puidi ramme ge a lumpum benai a rata ruîpat kai zai ’ntau gai de lei; zai chiramme perua ze sâuhammuî gai de lei, nemai riâ ge bam gum zeu.

⁷Zai chunage baudime Rapeu Tingwang Israelme Rapeu ne ningnui dagene ’mpeumi benai ’mpuimi, ’ngngiêne benai napoine Judame ruagene ningnui dage mâ de ’nsak kai ta di tew’nggakam-’nderabe hangge ’ndaitew ze ningnui runne ningnui peireige aigumbe sia-kadesangbe tâ tew gai lau?

⁸’Ndaitew ze ningnui ba tatew ramme ne a rata tewpat kai lau, Ijip gu heram ge ningnui wang ze lungbe ge kêdabe hera ramme dage mâ-perîmyibe rû gai zeu, dezai ningnui je lutua ne ra, zai kedeirei gu heram leine ruage desetkaibe benai teihenuitewbe chang ra hangge zeu?

⁹Ningnui peume penui lungriak kesiabe tak, Juda heguangme lungriak kesiabe tak, penui nâume lungriak kesiabe tak ningnui lungriak kesiabe tak zai ningnui nâume lungriak kesiabe tak, Juda ge benai Jerusalem ’mpuîhimdi ramme ge penui kesiabe tewbe ze ningnui ’ngngaî ’ndi de mei?

¹⁰Nemai riâ chang ze penui ze kecheiluîtewkeu mak lei, a gu hingde benai a gu hingde rawgaibe ramme ningnui suage benai ningnui peume suage kai’ndibe ge penui hing mak zai tat mak lei.

¹¹“Chipauziegene aigum ze baudime gu Tingwang Israelme Rapeu ne rang lei: Pie le lau, ningnui lam’mbe kesiabe hangge a ju ’nrei gai gu lei, Judame leine je tew’ngga ne ra hangge zeu.

¹²Ijip gu heram ge lung ra penui ma ’nreigaime Juda gene ’nsakpatme je I ne tei lu, penui je tew’ngga kam ’ndu lei; Ijipram gene penui kau gu lei; hiazutkie gene zai herakûm gene penui je tew’ngga kam ’ndu lei; cheilangbe gene dilangbe chang ze, penui hiazutkie benai herakûm gene chai gu lei; zai penui â katenetbe, mi kehingbe, desetkaibe, zai teihenuitewbe chang gu lei.

¹³Ijipram kedei ge lungme je I tewsâ gu lei, Jerusalem je hiazutkie ne, herakûm ne, zai herarît ne I tewsâ gum zeu,

¹⁴chidezai Juda gene ’nsakpatme Ijipram kedei ge lung ra wangme mî de ’nreipat ra mak, ringpat ra mak zai Judame gu heram ’mbe helatwang dai ra mak lei, penui helatwang ze lungneibe bâm ge zeu; penui helatwang dai ra mak daseu, ’mbiadime hanggesame runne wang dai gu lei,” acheu zeu.

¹⁵Dadege ’mpeumi ramme penui nâu ramme kêdabe hera ramme dage mâ-perîmyibe peipat te lei be chî lu dege, zai ’mpuimi ramme sapkuame, baudime Ijip kedei Pathros ge bamme ne Jeremiabe je kak te lei:

¹⁶“Tingwang ji gene nang anui dage sagaibe sam â anui ’ngking ra mak lei.

¹⁷Kane anui hetkailube leine anui tew gu lei, tinggîm wangpui je mâ-perîmyibe rû ze pe dage ruîpatbe-râtewbe pei ze bam gu lei, anui benai anui peume, anui gu heguangme benai anui gu heguangsinme Juda gu namdi ramme ge zai Jerusalem gu puidi leine ge anui tew gum ze tew gu lei; penui hangge anui gu hetak misongga lamui lei, zai lungyi ze lamui lei, mâ de kesiabe ngau mak zeu, ze acheu zeu.

¹⁸Kane tinggîm wangpui je mâ-perîmyibe anui rû gai ta di, zai pe dage ruîgaitadibe ziegene, mâgetaleine anui gu ga di, zai hiazutkie benai herakûm ne tew’ngga kam ’ndi de lei,” acheu zeu.

¹⁹’Mpuimi ramme ne sa ze, “Tinggîm wangpui je anui mâ-perîmyibe rû gai zai pe dage ruîpatkaibe luage chize anui napeu ramme ne hezuâgaibe ga ze anui pe hangge tingku kateleube gene peluî tew gai lu ze pe dage ruîpat kai mei?” kacheu de lei.

²⁰Dadege Jeremiabe ne ziemmena leine ’mpeumi zai ’mpuimime ne aigum ze pechu samkakme leine je rang ze:

²¹“Ningnui mâ-perîmyibe ze Juda gu namdi ramme ge benai Jerusalem puidi ramme ge, ningnui benai ningnui peume, ningnui gu heguangme, zai ningnui gu heguangsinme, zai heram ge ziemmename leine ne rûgaibe, Tingwang ne chî mak semei? Chize pa ’nningdaulak semei?

²²Ningnui kesiabe tewbe ramme benai katenetbe ningnui tewbe ze Tingwang ne gesutlak ti de lei; chipauziegene ningnui gu heram ze sauzînggaibe benai perua bambe zai desetkaibe chang ze mî de lungme ga ze bam de lei, nemai riâ chang ze bam gum zeu.

²³Chize â ningnui ne mâ-perîmyibe ruî gai, Tingwang dage hemui tew gai zai Tingwang kuâ pheu mak zai pe gu hingde ge benai pe gu hingde rawgaibe ramme ge zai pe gu besie ramme ge tatmakbe ziegeneu, chize kesiabe ningnui peireige keu gai de lei, nemai riâ chang ze bambe gum zeu,” kacheu de lei.

²⁴Jeremiabe ne baudime benai ’mpuimi leine je, “Tingwang sam ze ’ngking le lau, Ijip kedei ge bamme ningnui Judame leine gau,

²⁵Aigum ze baudime gu Tingwang Israelme Rapeu ne rang lei: Ningnui benai ningnui nâu ramme ne ningnui mui gene sa lu chize ningnui ba ne tewpui gai ze acheu sa de lei, ‘Tinggîm wangpui dage mâ-perîmyibe rûgairabe benai wain ruîpatkairabe tâ ze anui ne hetkailube anui â tew sing gu lei,’ zeu. Chidaze ningnui samhatbe tew’ntip kai ze samhatbe ze tew zu lau!

²⁶Chidadege ningnui Judame Ijip kedei ge bamme gau, Tingwang gu sam ze ’ngking le lau: Pie le lau, a ji ngeudibe gene I kadeseu lei, dezai Ijip kedei ge Judame bamme mui gene, ‘Tingwang Hera bam-bambe ziegene acheu kû ta ra hangge zeu,’ ze Tingwang ne kacheu de lei.

²⁷Pie le lau, keyibe hangge makse, kesiabe hangge penui peireige I pie bam lei; Juda gu ziemmena ramme Ijip kedei ge bamme leine je hiazutkie benai herakûm gene penui je tew’ngga’nzâu mak tâne tew’ngga gu lei.

²⁸Zai Hiazutkie gene ’nreipatlume â Ijip kedei gene Juda kedei ’mbe wang dai gu lei, gechâmne runne gu lei; zai Juda gene ’nsakpatme Ijip kedei ge lung ra wangme leine ne a sam mei, nu penui sam mei, châu sam ze bam bam gu mei be penui chî gu lei.

²⁹Aize ningnui hangge ka’nchetbe chang gu lei, aipau bâm gene ningnui je I tewsâ gu lei, a sam ramme â ningnui kesiabe je ’nggi ra bam bam gu lei be ningnui chî ra hangge zeu, ze Tingwang ne kacheu de lei.

³⁰Aigum ze Tingwang ne rang lei, Pie le lau, Ijip gu heguang Pharaobe Hophrabe je pe teureime ba ge benai pechu tewchat ra peubepeu ba ge I pei gai gu lei, Juda gu heguang Zedekiabe je Babilon gu heguang Nebukadrezzarbe pe teureipeu zai pechu tewchat ra peubepeu ba ge I pei gai ’ndi gum zeu,” ze kacheu de lei.