Read Zeme Naga JEREMIA 48 Bible Online

JEREMIA 48 - Zeme Naga bible

JEREMIA 48

¹Baudime gu Tingwang Israelme Rapeu ne aigum ze rang lei: “Nebo hang pe duângga gu lei! Chize tew’nsia gai ’ndi daseu, Kiriathaim je tew’ngngam gai ’nde lei, chize lu ’nde lei; chi keriengdi ze tewhelêu gai ’nde lei, zai tewkau ’nde lei.

²Moab ji dibe ga de lei. Heshbon ge pechu tew’nsia ra hedei la de lei; ‘Wang lau, heramzat pa changbe gene pechu anui ne lutua ne kei lei!’ Hei Madmen namdi gau, ningchu du ning kuâneu ta ra tew gai gu lei; hiazutkie ne ningchu gua’nsa gu lei.

³“’Ngking le lau! Horonaim gene kehapbe kuâ zeu, ‘Gua’mpie’ndibe benai sia’ndi-dibe zeu!’ kacheu de lei.

⁴Moab je â tew’nsia ’nde lei; Zoar riâ ka’nrungbe kuâ seuchang de lei.

⁵Luhith hangbe riâ, penui haphangchang de lei; Horonaim wangkeube riâ penui ne tewka’nsiabe ka’nrungbe kuâ seuchang de lei.

⁶Pak chu lau! Ningnui runne ningnui je tew’nring le lau! Tingkangram ge hênam hekunmerângne gum ze bam zu lau!

⁷Ning gu keriengdi ge, zai ning heurâ ge nang ’nnumtewbe ziegene ningchu du nîmtat ’ndu daseu; zai Kemos râsie â, pe gu tingkume benai heguangsinme dage kebang nguatewtat ku lei.

⁸Namdi leine peireige tewka’nsiapeu wang gu lei, zai namdi mâ de ’mbiapat ra mak lei; pebakchuak ze ga gai du, zai bekâm ramme ze tew’nsia ’ndu lei, Tingwang ne rangbe luigum zeu.

⁹“Moab je pekan pei be lau, pa liamtat ra hangge zeu; pe gu namdi ramme ge mî de lung ta di ze sâuzînggaibe chang gu lei.

¹⁰“Tezerei ze Tingwang tâ tewpeu je â deset kai de lei; zai hejai tewpatbe gene pe gu hiazutkie kai’ndipeu je â deset kai ’nde lei.

¹¹“Moab â pa hena’ngka gene temichai bam de lei, zai pe bâm ge bam di de lei; pa â heli kat gene heli kêdabe ge tew’nrua gai mak lei, kebang du tewtat mak lei; dadege pe gu pegut ze pe dage bam bam lei, perîmyibe du keli mak lei.

¹²“Chidaze pie le lau, pechu ka’nggime pechu ’nggi ra, zai pe gu mâ-bung ramme tew’nrua gai ra, zai pe gu hegamli ramme tewpânghitruaigairabe I ne langgairabe tingnaimikpui ramme wang mui daseu, ze Tingwang ne kacheu de lei.

¹³Dezaine Kemos râ je Moab ne ’ngngam gu lei, Israelbe ki ne penui ’nnumtewbe Bethel bâm je ka’ngngam gum zeu.

¹⁴“ ‘Anui â gekuume, zai herei ge peranchime lei,’ ze ’ndai gum ze ningnui acheu sa lu lau?

¹⁵Moab benai pe gu namdi ramme je tewka’nsiapeu hang mui de lei, zai pe gu rehangme yilangme bau tewchat ra tatkeu di de lei, ze Heguang, pe ji baudime gu Tingwang kacheupeu ne rang lei.

¹⁶Moab gu kahereube kedibe ze na de lei, zai pechu tewkahereube ze kelua-desang mui de lei.

¹⁷Pechu puîhap zu lau, ningnui pechu tuaguame gau, zai pe ji chime leine gau; ‘Heguang tui peranchibe ze ’ndaigum bet ti lau, pengêudibe hetui zeu,’ ze acheu sa lau.

¹⁸“Ning ngeudibe gene zuakeu zu lau, zai kedei kelumbe peireige ’ntau zu lau, Hei Dibon ge bambepeu gau! Moab je tewka’nsiapeu ningchu ’nggi ra hang mui de lei; pa ne ning gu keriengdi tew’nsia ’nde lei.

¹⁹’Mpui’ntai ge sap lu piekua lau, Hei Aroer ge bambepeu gau! Paktipeu zai ’nreipattipui je ’nneu gai ni lau; ‘’Ndaikau wangchang lau?’ acheu zeu.

²⁰Moab je â tew’ngngam gai ’nde lei, chize â sia kam di daseu; heu ze ’nrung zu lau! Moab â perua ze la de lei ze Arnon gene rang gai lau.

²¹“Pekâm ramme peireige, Holon peireige zai Jahza benai Mepha-ath peireige,

²²Dibon benai Nebo zai Beth-diblathaim,

²³zai Kiriathaim zai Beth-gamul, zai Beth-meon,

²⁴zai Kiri-oth, zai Bozra, zai Moab gu namdi kedeu ’mbe benai kenahia ge bambe leine peireige Samrambe wangchang de lei.

²⁵Moab gu mâkie ze riatua ’nde lei, zai pe ba’mpûm tewbet ’nde lei, ze Tingwang ne kacheu de lei.

²⁶“Pechu tewmeneu gai be lau, Tingwang je ’nggi ze pe runne pe ngeu tewka’ndibe ziegeneu; chidezai Moab ze pa ne ’nruîgaibe ge ’nnia gu lei, zai pechu du teihenuitew gu lei.

²⁷Israelme â nang ne teihenuitew-mak-bamme mak ti lau? Pechu nang sachu tâne ning peî kezit ze hegateume ruage pa bambe nang ngau semei?

²⁸“Namdi ramme sâu nan ze, tingchudepiang ge lung zu lau, Hei Moab ge bamme gau! Temaune ’nggeuchuak ge pechip puagailube gum bam lau.

²⁹Moab gechîrettewbe anui seuchang lu de lei— pa â gechîrettew-desang lei— pechu ’nning’ndi-kadesangbe, pa gechîrettewbe, zai pa megie-kadesangbe, zai pe lung ge keditew-kadesangbe seuchang de lei.

³⁰Pa pe lungtaksiabe I chî lei, ze Tingwang ne kacheu de lei; pa keditewbe â karasabe lei, pe tatew ramme tâu me lei.

³¹Chipauziegene Moab hangge I hap kai lei, Moabme leine hangge I hap kai lei; Kir-heres gu ziemmename hangge I kadesui dadegeu.

³²Hei Sibma gu grepchîria bangpui gau! Jazer hang suadu ning hangge I hap te lei! Ning keî ramme sungkling peirei hiamka de lei, Jazer riâ gechangbe zeu; ning gu tinglum ting rachî peireige benai grepchî niakbe ting ge tewka’nsiabe keu gai de lei.

³³Hesuiyibe benai hesuiyika’ntabe ze Moab kedei keyibe gene teitat ’nde lei; wain niakbe bâm gene wain ga de ra I tew gai ’nde lei, mi-mige de hesuiyibe kuâ pat ze chiramme (pe pî ne) nei mak lei, ka’nrungbe ze hesuiyibe gu ’nrung mak lei.

³⁴“Heshbonme benai Ele-alehme ka’nrung de lei; Jahaz riâ gechangbe penai kuâ kehuachang de lei, Zoar gene Horonaim zai Eglath-shelishiya riâ chang zeu. Nimrim gu hedui je du changku gai de lei.

³⁵Moab ge pebâm hube ramme ge herâtewbe peipatpeu zai pe rapeu dage mâ-perîmyibe ka’ntaupeu je I tew’ngga ’ndu de lei, ze Tingwang ne kacheu de lei.

³⁶Chidadege metiam gum ze Moab hangge desui ze a lung ge a suisiarei ze ’nningzung bam de lei, zai Kir-heresme hangge desui ze a lungge metiam gum ze a suisiarei ze ’nningzung bam de lei; chipauziegene keheube penui ngaube ze ’ngga kam di de lei.

³⁷“Hepeîtam ramme gutduak ’nda, zai hemuimai ramme rimtua kam ’nde lei; heba ramme getjâm kam de lei, zai mi kia ge miseigiriapaî ne ’ntui kam de lei.

³⁸Moab heki’mpûm leine ge benai keloaning ramme ge mâ de ga de lei, kadesuibe runne de lei; mi-mi ne de ’nzâmakbe hegamki je gum ze Moab je I ne tewpâng ’nde lei, ze Tingwang ne kacheu de lei.

³⁹’Ndaigum ze sia kam di lau? ’Ndaizeu ge penui puîhap lau! ’Ndaigum ze Moab ka’ngngambe gene hechai’nnuk ti lau! Chigum ze Moab â pe taige bamme hangge teihenuitewbe benai mi ngauhingbe chang di de lei,” ze acheu zeu.

⁴⁰Aigum ze Tingwang ne rang lei: “Pie le lau, keliengrie gum ze mige liamzuai ze liam gu lei, zai Moab je pe kan sungnam gu lei;

⁴¹namdi ramme je teitat ’ndu lei, zai peranchime ramme je nîm ’ndu lei, chipau mai ge â, Moab gu hereikangme lung ze ’mpuimi henalungbe herêu gum gu lei;

⁴²Moab je tew’nsia ’ndu, zai ziemmena chige bam ta du lei, Tingwang je ’nggi ze pe runne pechu teichuka’ngngube ziegeneu.

⁴³Mi kehingbe, hûmkuiki, zai ’mpia ramme ning suage la de lei, Hei Moab ge bambepeu gau! ze Tingwang ne kacheu de lei.

⁴⁴Kehingbe gene pakpatme hûmkuiki ge keu gai gu lei, zai hûmkuiki gene ’nzakpatlume je ’mpia ne rap ’ndu lei. Penui je tewsabe tingkum ge airamme Moab peireige I tew gai gu lei, ze Tingwang ne kacheu de lei.

⁴⁵“Ziemmena hingrangrui ramme tingtie ge heguang Sihonbe ne kaheguangbe namdi ge ’ngkeuwang gai ra peu gu lei, kane chige hemimelei ne pui di de lei, Moab ge hereineime gu peloa hube ramme ge benai keloa ’ndanghia ramme ge hemi chu ze bam de lei.

⁴⁶Hei Moab, ning duângga gu lei! Kemos râ gu ziemmename â sia kam de lei, ning na ’mpeumi ramme je kebang hang nîmtat, zai ’mpuimi ramme je kebang ge ngua gai ’ndi daseu.

⁴⁷Acheusede Moabme je betingyibe I pei gai dai gu lei, bechâng dezai neu,” ze Tingwang ne kacheu de lei. Aipau riâ ze Moab peireige samramgaibe ze de lei.