Read Zeme Naga JEREMIA 49 Bible Online

JEREMIA 49 - Zeme Naga bible

JEREMIA 49

¹Ammonme tedeu ge Tingwang ne acheu rang gai ze, “Israel â pe name ’mpeumi ga mei? Zai pe ki heurâ teipeu ga mei? ’Ndaitew ze Milkombe ne Gad ze sut ’ndi, zai chipau namdi ramme ge pe gume ne lung ze bam di lau?

²Chipauziegene pie le lau, patingnaimikpui wang mui de lei, ze Tingwang ne kacheu de lei, Ammonme gu Rabba peireige kahereibe kuâ seu ra I ne tew gai gu lei; chize putzînggai’ndibe loa’ntûm chang gu, zai pe gu keloa ramme hemi ne rû ’ndu lei. Chidezai penui gu sut’ndime dagene Israelme ne sut ’ndu lei, ze Tingwang ne kacheu de lei.

³“Desui zu lau, Hei Heshbon gau, Ai keloa ze â sâuhammuî gai ’ndi daseu! Hap’nrung zu lau, Rabba na’mpuimime gau! Meseigiriapaî ningnui ’ngkang le zu lau, desui ze rieguabe lungge pakrua zu lau! Milkombe benai pe gu tingkume, zai pe gu heguangsinme je kebang hang nîmtat ’ndi daseu.

⁴Pe heurâ je ’nnumtew ze ‘Châu ne achu tingkang ra lau?’ acheu sapui ’nnumtewmakpui gau, ’ndaitew ze ning gu bekâm ramme peireige nang hegiê ze bam lau?

⁵Pie le lau, ning huâzieme dagene ningnui peireige kehingbe I ne teiwang gu lei, ze baudime Rapeu Tingwang ne kacheu de lei, zai paktime je gekumwangdairabe kau ’ngga ze penui je guatua gai bei ze ziemmena leine pak’nzutza ze tat kam du lei.

⁶“Kane bechâng dezai Ammonbe je I ne beting keyibe pei gai dai gu lei,” ze Tingwang ne kacheu de lei.

⁷Edom tedeu ge baudime Rapeu Tingwang ne acheu rang gai ze, “Teman ge kaningchingbe kau ga di de mei? Mi-siechime dage mâ-geteigairabe sam ga di de mei?

⁸Hei Dedan ge bamme gau, ’nreiwang ze pak tu lau! zai ’mbai de lau! Esaube je I ne tewsabe hî dezai pe peireige kahereube I ne teiwang gai gu lei.

⁹Grepchî-raime ning dage wang dizai penui rai’nsak kai mak ta ra semei? Mâ-kahegame tingmuî ge wang dezai, penui hangge kebuibe riâ runne penui tew’nsia mak ta ra semei?

¹⁰Kane Esaube je â I ne luakrit ’nde lei, pa ’mbaibâm ramme I ne ralia’nchiepuang gai ’nde lei; zai pe runne pechu tei’mbia-daichi lak ze bam lei. Pe name, pe sikiname, zai pe kiningme je tew’nsia kam ’nde lei; zai pa du ga de lei.

¹¹Ning gu penui peu game napoine ramme je sâu gai be lau, I ne penui je ’ngkut’nring gai gu lei, zai ningnui gu kemîpui ramme ne achu peize ’nnumtew lau,” ze kacheu de lei.

¹²Tingwang ne aigum ze rang daseu: “Sakbuimakme ne chipau piak ze sak sing ra zai â, ningchu tewsâ mak ta ra semei? Ningchu tewsâ mak ta ra mak lei; kane nang sak himchang ra lei.

¹³Bozra ze mi kehingbe, teihenuitewbe, gua’mpie’ndibe zai desetkaibe chang ra de lei, ze I a runne deseu gai de lei, ze Tingwang ne kacheu de lei; zai pe gu namdi ramme leine betingbeta put-hâmmuîgai’ndibe chang gu de lei,” ze acheu zeu.

¹⁴Tingwang dagene sam ramme I seu lu de lei, zai heramzatme ruage hepâupaupeu je I lang gai de lei: “Ningnui wangherua lu pechu ’nggi ra wang zu lau, zai herei ra zuachu zu lau!” kacheube zeu.

¹⁵Pie le lau, heramzatme ruage kecheibe kau, zai ziemmename ruage ngau’nna ze bamme hangge I ne ningchu tew gai gu daseu.

¹⁶Nang tingchukâu-teria ge lungpeu, peloa’ntûm hube teipeu gau, miramme je nang ne kakeheibe zene ning runne ningchu duai de lei, zai ning lung ge kahegiêbe zene ningchu choa de lei. Keliengdi chip hube riâ nang ne ning chippua gai lu bam sede, chigene I ne ningchu teikeu’nna gai gu lei, ze Tingwang ne rang lei.

¹⁷“Edom ze mi kateruibe hang wangchang gu lei; pe dage mi duânggabe kedibe wangchangbeibe ziegene chige tatpelapatme leine ne hing ze penui chui-lukeduahi bam gu lei.

¹⁸Sodom benai Gomorra zai pe huâzie ge lungbe namdi ramme je tew’nsiagai’ndibe mai gum ze mî du chige lung dai ra mak lei, zai mî du pe lungge ’nnai gai ra mak lei, ze Tingwang ne kacheu de lei.

¹⁹Pie le lau, melimerie peranchibe lam’mbe Jordan hênamkang gene duilui hangbe gum ze, pe dagene penui je I ne luakatne hûtua gai gu lei; zai I ne nei-neibe kau je pe peireige pe suitew ra I ne sum gai gu lei. I gumbe kau châu la ze lau? Châu ne achu kûchi ra lau? A suage melireîpeu ’ndaidauge bamchi ra lau?

²⁰Chidaze Edom peireige benai Teman ge lungme peireige Tingwang ne tew gai ra ’nninggaibe tedeu ramme ze seu le lau: Melipoine ramme je ’nsangdu zukereutat ku lei; penui pausiabe gene penui gu melimerie ze pe duângga himchang gu lei.

²¹Penui kâukeube ’ncheu gene kedei kechuî gu lei; penui ka’nrungbe kuâ ze Kegiebe Sungkling riâ chang ze seu gu lei.

²²Pie le lau, mige kelie gum ze liam’ndingri chu ze kelua ze liamzuai wang lu, Bozra peireige pe kan liâmrang lu ’nggi gu lei, zai chipau mai ge â Edom gu hereikangme lung ze â ’mpuimi henalung ra ’nraka’nsuapui lung gum bam gu lei,” kacheu de lei.

²³Damaska tedeu ge. “Hamath benai Arpad ge lungme penui lunghereu di de lei, mâ-rasam kesiabe penui seu di dadegeu; penui â kehingbe gene kenuihuak bam di de lei, penui â tew’nsauchilakbe sungkling gum ze ’ngngaikeleulia bam di de lei.

²⁴Damaska pe ran-gakeu di de lei, pa pak te ra tew de lei, zai kehingbe ne pui di de lei; ’mpuimi henalung ra ’nraka’nsuabe gum ze pe lung kahereube benai pe duânggabe ne pe dage pui di de lei.

²⁵Heji dibe, hesuiyibe namdi je ’ndaigum ze put kai bei nung se lau!

²⁶Chipauziegene pe gu rehangme pe gu keloa’ndi gene kau gu lei, zai chipau mai ge pe gu hereikangme leine je tew’ngga kam ’ndu lei, ze baudime gu Tingwang ne rang lei.

²⁷Zai Damaska gu kerie ge I ne hemi’ntau gai gu lei, zai chize ne Ben-hadadbe gu keriengdi ramme tew’nsia kam ’ndu lei,” kacheu de lei.

²⁸Babilon gu heguang Nebukadrezzarbe ne tew’nsia’ndibe kedar benai Hazor gu heguangram ramme deu ge Tingwang ne aigum ze rang lei: “Zuachu ze kedar je ’nggi ra zuapat chu lau! Tingbia ’mbia bamme ziemmename je tew’nsia gai be lau!

²⁹Penui gu paîki ramme benai penui gu kaurui ramme, penui gu paîlîmbe ramme benai penui gu merua ramme leine lutat ’ndu lei; penui gu put-hu ramme penui dagene teitat ’ndu, zai chime ne penui je, ‘Kehingbe ne guâgit la de lei!’ ze sa gai gu lei.

³⁰Pak’nduâtat ze pechuak ramme ge ’mbai de zu lau, Hei Hazor ge lungme gau! ze Tingwang ne kacheu de lei. Babilon gu heguang Nebukadrezzarbe ne ningchu ’nggi ra kedâ lu la da, zai ning peireige mâge â tew gai ra ’nningpat kai lu la daseu.

³¹“Temichai ze bambe heramzat, kehingbe ga ze lungme, kerie’ngkam ramme benai bechâp kainambe ramme geze lungme, penui runne lung ze bamme je ’nggi ra zuapat chu lau, ze Tingwang ne kacheu de lei.

³²Penui gu put-hu ramme ze sut’ndibe kerua chang gu, zai penui gu kebuidung ramme ze hereichâ hangge chang gu lei. Penui peîtam rim’ndime leine je I ne pebâm’nsangne ge tuârarip kai gu lei, zai penui gu pebâmleine gene penui je tewkahereube I ne teiwang gai gu lei, ze Tingwang ne rang lei.

³³Hazor ze â munserung ramme bambe bâm chang gu lei, betingbeta put-hâmmuîgaibe bâm chang gu lei; chige mî de lung dai ra mak lei, zai chige mî de ’nnai gai dai ra mak lei,” kacheu de lei.

³⁴Juda gu heguang Zedekiabe heguangchube pîbang ge Elam tedeu ge Tingwang gu sam kemeu’mpeu Jeremiabe dage wangchangbe.

³⁵Baudime gu Tingwang ne aigum ze rang lei, “Pie le lau, penui ranchibe bambe Elam gu hetubaimpi I ne tewbet ’ndu lei;

³⁶zai tingmik medai gene tingkaichibe medai Elam peireige I ne teiwang gai gu lei; zai chipau tingkai ramme leine je I ne tuârarip kai gu lei, zai Elam gene kumtuagaibeime wanggaimakbe heram katte bam ra mak lei.

³⁷Heteureime masuage, zai penui je tewchat ra peume suage Elam je I ne tewhingrim gai gu lei; a lumpum-kadesangbe kesiabe penui peireige I ne teiwang gai gu lei, ze Tingwang ne kacheu de lei. I ne penui je tew’ngga kam ’nde mak tâne hiazutkie ne gua’nchu ra I ne lang gai gu lei;

³⁸zai Elam ge a gu heguang-bamrâ I ne kai gu lei, zai penui gu heguang benai heguangsinme je tew’ngga ’ndu lei, ze Tingwang ne rang lei.

³⁹“Kane bechâng ge Elam hangge beting yibe ramme I ne teiwang gai dai gu lei, ze Tingwang ne rang lei,” ze kacheu de lei.