Read Zeme Naga JEREMIA 5 Bible Online

JEREMIA 5 - Zeme Naga bible

JEREMIA 5

¹I ne Jerusalem je lun gai be ra hangge, mige pelingtewbe kau benai tâgesangtewbe kau je ngaudau gu mei ze keloaning ramme ge ningnui ne peu gai ni lau.

²Penui ne, “Keringbe Tingwang ji gene kadeseu lei,” ze acheusede penui â karasa ne kadeseu de lei.

³Hei, Tingwang gau, samsangtewbe ge ning mik pie mak semei? Nang ne penui je tew’nteu gai bei da, kane penui suîhereu mak lei; nang ne penui je tew’ngga kam gai bei da, kane penui geteilia ra lumeu lei. Penui â penui magei tingchu suadu chi ra tew gai lei, zai penui lung helimeu lei.

⁴Dadege I ne acheu sa de lei, “Aime ze â kelaksiame bau lei, penui dage ’nningchibe ga lei. Penui Tingwang ’mpuî chî mak lei, penui Rapeu gu hingde zeu.

⁵Kedime dage I tat ze penui je ’mpau gu lei; penui â Tingwang ’mpuî chî, zai penui Rapeu gu hingde chi daseu,” ze acheu zeu. Kane penui ’nteumena hesui’nggam lu ze guangkâm tewpâng ’ndi lei, samrialube penui tewpâng ’ndi de lei.

⁶Chipauziegene hênamkang ’mbene duilui ne penui je ’ngkîchat ku lei, tingkangram ge henei ne penui je tew’ngga kam ’ndu lei. Keriakkau ne penui gu namdi ramme je lîmkua lamui lei, mi-mige chi namdi ramme gene patbe kau je tewdesuirui gai gu lei; penui hedieka’ngkabe ramme misongga bam, zai penui keneibe-sie ge ’nningtelam-desangdibe ziegeneu.

⁷’Ndaigum ze ningchu I lunchi ra lau? Ning name ramme ne achu sâu gai ’nda, zai hera makbe ramme ji gene deseu gai ’ndi de lei. Penui je I kei’nggeugitkaibe luage penui kahemabe tâ tew lei, zai hepumzuateume ki ramme ge ’nzangrua bam lei.

⁸Penui â, hekun ramme tewhering-’mmikualube kau ramme de lei, penui kat-kat kiningme nâu peireige ka’mbeu de lei.

⁹Airamme deu hangge I penui je tewsâ mak ra mei? Zai aigumbe heram peireige I ne hekûm lu mak ra mei? ze Tingwang ne kacheu de lei.

¹⁰“Zuachu lu, pe gu grepchî hiâm ramme tew’nsiazutza ze tatpela zu lau, kane chiramme tewkap se lau, bekeî ramme ’nriauduak ne lau, chiramme Tingwang gu mak daseu.

¹¹Israel kibau benai Juda kibau zene, achu keneibe ga luisui ze lung de lei, ze Tingwang ne kacheu de lei.

¹²Tingwang je penui deuzie ne sa lei, zai penui ne acheu sa ze, ‘Pa ne mâ de tew ra mak lei; kesiabe anui peireige wang ra mak lei, hiazutkie zai herakûm du anui ngausua ra mak lei, ze kacheu de lei,

¹³kemeume â ’nsum perua gum chang du lei; sam wangbe penui dage ga lei. Aigum ze penui peireige chize tew gai gu lei!’ zeu,” ze acheu zeu.

¹⁴Chidadege aigum ze Tingwang baudime Rapeu ne sa lei: “Penui ne aipau sam ze sagaibe ziegene, pie le lau, ning mui gene sapatbe sam ramme ze hemi chang ra I ne tew gai gu lei, zai aipau ziemmena zene heching chang gu, zai aipau hemi zene penui je rû kam ’ndu lei.

¹⁵Pie le lau, ningnui peireige kedeu ’mbene heramzat I teiwang lei, Hei, Israel kibau gau, ze Tingwang ne kacheu de lei. Chize â ka’ntipbe heram, ’ndâ reheime penui lad nang chimakbe heramzat lei. Penui ’ndaikau sa mei be du nang ’nningchi ra mak lei.

¹⁶Penui gu bai’mpitu rak ze â heraw kemui gum lei, penui ’nteumena ziemmena peranchime bau lei.

¹⁷Penui ne ning gu hemeurachî, zai hetak ze teu’nzâu ’ndu; ning na ’mpeumi benai ’mpuimi ramme je du teu kam ’ndu lei; penui ne ning gu melidung ramme benai getumdung ramme teu kam ’ndu lei; penui ne ning gu grepchîriapet ramme benai ’mbeuchîbang ramme teu ’ndu lei, nang ne ’nnumtewbe namdi sum’ntiplube ramme penui ne hiazutkie ne tew’nsia kam ’ndu lei,” zeu.

¹⁸“Kane chipau ting dezai ningnui je tew’ngga’nzâuchiak kai mak ra lei, ze Tingwang ne kacheu de lei.

¹⁹Zai ning gu ziemmename ne, ‘’Ndaitew ze Tingwang anui Rapeu anui je airamme anui peireige tew gai lau?’ acheu dezai, nang ne penui je, ‘Ningnui ne achu sâu gai ’ndi daze zai ningnui gu heram ge hesangheluîchimakme gu hera ramme guâ ka’ngguabe ziegene hesangmeram ge hesangme guâ ningnui ’nggua gu lei,’ ze rang gai lau,” ze acheu bei lei.

²⁰Jakob ki ge aipau ze saba gai lau, Juda ge chize pau gai lau:

²¹“Aize seu le lau, Hei kemiebe kau, zai kaningchingbe-game gau, penui mik bam lu, kane ngau mak, penui kun bam lu, kane seumakme gau.

²²Ningnui achu hing mak mei? ze Tingwang ne kacheu de lei; A suage ningnui kedun mak mei? Sungkling ’nrai hangge I ne depûloa kai lei, betun mak bambe chi herai ’ngkachilakbe ramme zeu; sungkling gesuâk sede chiramme ze sûmlak lei, penui ’mbeu sede chize penui kalak lei.

²³Kane aime â helung gechibe benai ka’nggibe lungtak ne pui lei; penui â tat’nriatat ti de lei.

²⁴Penui lung ge penui acheu sa mak lei, ‘Tingwang anui Rapeu je anui hingchi kei lei, beting-pehî ge tingruibe, hekarâ tingrui benai keriakting tingruibe peipeu, zai anui hangge hechitting tewgaipeu jeu,’ ze acheu zeu.

²⁵Ningnui gu hemui-helut ramme ne airamme ze teikedettat ti de lei, zai ningnui gu hemui ramme ne keyibe ze ningnui dagene tei’mbia ’ndi de lei.

²⁶Helungriaksiame je a gu ziemmena ruage ngau de lei; penui â ’nruine je ’nrak ra lîmkuame gum ze kuâ bam lei. Penui ’mpia tew gai lu ziemmena je nim lei.

²⁷Mâ-rak ’nruipoine ramme ne puigitbe gum, penui ki ramme â kechoabe ne pui de lei; chipauziegene penui kedime chang, zai keheume chang di de lei,

²⁸penui râyi zai ’ndiaupiau chîngchu de lei. Penui kesiabe tewbe ge pahimrai chî mak lei; ka’nzeibe gene penui samram mak lei, bepeugame lung’ntuarabe hangge zeu, zai kegame deu ge penui sapgu gai mak lei.

²⁹Aipauziegene I penui je tewsâ mak ra mei? ze Tingwang ne kacheu de lei, zai aigumbe heram peireige I ne hekûm lu mak ra mei?” acheu zeu.

³⁰Mi duânggabe benai mi ngauhingbe tâ heram ge wangchang de lei:

³¹kemeume karasa ne kemeu sampau, zai penui ne kerang-rangbe luî gene tingkume samram lei; a gu ziemmename ne chize kan’nchâ de lei, kane betun wang dezai ningnui ’ndaikau tew ra lau?