Read Zeme Naga JEREMIA 50 Bible Online

JEREMIA 50 - Zeme Naga bible

JEREMIA 50

¹Babilon peireige zai Kaldiame peireige kemeu’mpeu Jeremiabe mui gene Tingwang sam saliabe ze:

²“Heramzatme ruage rang’nchichiak kai ze, zai rangba gai be zu lau, hepiepaî teichu gai ze, pau gai be zu lau, mâ de ’ngkim mak ze sa lau: ‘Babilon je â teitat te de lei, Bel je â tew’ngngam gai ’nde lei, Merodak râ â pe lung chai de lei. Peluî hang tewbe ramme je tew’ngngam gai bei de lei, zai pe gu heraluî ramme penui lungchei di la de lei,’ acheu zeu.

³“Tingpeî ’mbene heramzat kat ne pechu ’nggi ra hang la de lei, chime ne pe ram gua’mpiezîng ’ndu lei, chige mî de lung ra mak lei, ziemmena benai hekaune pak kam du lei.

⁴“Zai chipau ting ge, zai chipau hî ge Israelme benai Judame hap ze penui wangherua gu lei; Tingwang penui Rapeu je penui peu gu lei.

⁵Zaion lam’mbe penui ma ’nsua lu ze, ‘Wang lau, betingbeta samhetkaibe mâtew-tewsedu ’ngngaîdailakbe gene Tingwang dage anui herua gai kei lei,’ ze acheu ze penui ne Zaion tatrabe ’mpuî ’nneu gu lei.

⁶“A gu ziemmename â meli gadibe chang ze bam lei; penui je reîme ne penui je ngualietat ti de lei, peloa ramme gene nguakezit kai nan zai peloa gene peloa’ntûm ’mbe penui tat kai di de lei, penui kangme je ’ngngaî ’ndi de lei.

⁷Penui je ngaume ne penui je nîmteu ’ndi de lei, zai penui teureime ne acheu ze sa ze, ‘Anui ne mâ-tewmau me lei, Tingwang, penui peume ne kaheguîbe bangpui, penui ne penui bâm-gesang chang ze bambe, Tingwang peireige penui ne hemuigaibeibe ziegene lei,’ ze penui kacheu lei.

⁸“Babilon zuilung gene pakpat te lau, Kaldiame ram gene zuapat te lau, kemeidung suage kemei’nsei bam gum ze bam lau.

⁹Pie le lau, Babilon je ’nggi ra tingpeî ’mbene heramzat kedime wangka’nduibe ge I ne gecheu gai bu lei; zai pechu ’nggi ra penui ’mpungchu gu lei; chigene penui je nîmtat tu lei. Zai penui gu bai’mpitu kapchime mâ de kapmaumakme gum ze bam gu lei.

¹⁰Zai Kaldiame je nupteu gu, zai nupteume â penui lungwângchang gu lei, ze Tingwang ne kacheu de lei.

¹¹“Ningnui suiyi sedu, ningnui suî’nta sedu, Hei a heurâ sut-teume gau, getum meleu timpeizeu ge bam gum ze ningnui melâksak bam sedu, zai hekunsei ramme gum ningnui ’nra ze bam sedu,

¹²ningnui pui ’ngngam-desang ze bam gu lei, zai ningnui je lungkeupui je tewhelêu gai ’ndu lei. Pie le lau, heramzatme ruage pa ne cheilangbe chang gu lei, hênam ze changku di ze tingkangram chang gai du lei.

¹³Tingwang lumpum ziegene pa chige lung ra mak lei, kane pechu sâuhammuî gai ’ndu lei; Babilon ge tatkame leine hing gu lei, zai pe jâm ramme ziegene pe chui-lukeduahi ze bam gu lei.

¹⁴Hetubaimpi kapme leine gau, Babilon je ’nggi ra tuaguâ zu lau; kap chu lau, hetu je mâ de ’nzâ se lau, Tingwang peireige pa ne hemui gai ’ndi daseu.

¹⁵Keliu ze pechu tuaguâ lau, pa peipat kai ’nde lei; pe gu kerie ramme tewkau ’nde lei, pe gu ’mbie ramme tewba ’nde lei, aize Tingwang gu hekûmlube chang daseu: pe peireige hekûmtew lau; pe tatew luigum ze pe peireige tew zu lau.

¹⁶Helei ka’nrukpeu benai helugatbe ting ge ’ngkuaine teipeu je tew’ngga ne lau; Babilon gene, tewsâpeu gu hiazutkie je hingbe ziegene ’nteumena penui gu ziemmename dage zuawang kam gu lei, zai ziemmena ’nteumena penui ram ’mbe pak kai gu lei.

¹⁷“Israelme â meli ramme je duilui ramme ne hûtimrarip’ndibe gum lei. Railangbe ge Assiria heguang ne nîmteu lei, zai nâlangbe ge Babilon heguang Nebukadnezzarbe ne pe ra ramme kelaubet ’ndi lei.

¹⁸Chidadege Tingwang gu hereikang baudime, Israelme Rapeu ne acheu ze rang lei; pie le lau, Assiria heguangpeu je tewsâ gum ze Babilon heguang benai pe ram je I ne tewsâ gu lei.

¹⁹Zai Israelme je petaning ge I ne nguawang gai dai gu lei, Karmel benai Bashan ge pechu guî gu lei, zai Gilead loa benai Ephraim loa ramme ge pe lungwângchang gu lei.

²⁰Chipau ting ge benai chipau hî ge Israelbe mâu-miê ze penui peu gu lei, kane mâ de ngau ra mak lei; Judabe kahemuibe du mâ de ngau ra mak lei; I ne ’nzuakkaime, ’nsakkaime bau je I ne lun gai gu daseu.

²¹“Merathaim ramdei ge hang ze ’nggi lau, Pekod ge lungme je ’nggi lau, penui je tewchat ne lau, zai penui je deî’ngga kam ne lau, I ne diegaibe luigum ze ningnui tew lau, ze Tingwang ne sam rang gai lei.

²²Heram lungge hereika’nggibe ’ncheu la lei, misongga ze tewka’nsiabe kuâ zeu!

²³’Ndaigum ze kedeirei pelane gu tediak je bikau ze tewpâng gai ’ndi se lau! ’Ndaigum ze pe heramzat ruage Babilon je ngauhingkube chang di gerei se lau!

²⁴Hei Babilon, ning hang ’mpia I ’nsung gai ’nde lei, nang chî mak ze ningchu mi ’nde lei; Tingwang je nang ka’nggibe ziegene ningchu ngaudau lu nîm lu de lei.

²⁵Tingwang ne pe gu hereimerua kaibeki lat kai bei de lei, pe lumpumbe gu hereitewbe merua ramme lupat lu la de lei, baudime Rapeu Tingwang ne Kaldiame ram ge tâtew ra la daseu.

²⁶Heram mik leine gene wang ze pechu ’nggi lau, zai pe gu merua kaibeki ramme lat kai lau; chêutum gum ze pechu kebauchu gai lau, zai tew’ngga kam ne lau; zai mâ de ’nsak kai se lau.

²⁷Pe gu hereikangme leine je tewchat kam ne lau, peize penui je tewchatpeu tailam wangkeu de lau, penui duângga ze bam gu lei! Penui je tewsârabe mai singbe, penui gu tingnaimikpui wangchang la de lei.

²⁸“Tingwang anui Rapeu gu hekûmtewbe, pe gu kellumki gu hekûmtew sing ra, Zaion ge pau gai ra Babilon gene pakpatme benai ’nreipatme ’ncheu ze ’ngking le lau,

²⁹“Babilon je ’nggi ra bai’mpitu pungme, zai bai’mpi kapchime leine je kûwang’ndui lau; tuaguâ ne lau, mî de hela zuapat se lau, penui tatew luigum ze peiruî ra lei, penui ne tewbe leine penui peireige tew gai lau; Israelme gu Hangkat Ka’nchibe Tingwang je penui ne kechî-keditew ze tewhebâ gai bei daseu.

³⁰Chidadege rehangme ’mpuî’mmaî ge penui kau gu lei, chipau mai ge pe teureime je tew’ngga gu lei,” ze Tingwang ne rang lei.

³¹“Pie le lau, Hei nang gechîrattewpeu je I â ka’nggi lei, ze baudime Rapeu Tingwang ne rang lei. Ningchu I ne tewsâ ra beting-pehî wang la daseu.

³²Gechîrattewpeu â mâ-’nrap lu ze kau gu lei, zai mi-mi ne de pechu teichu gai ra mak lei, zai I ne pe gu namdi ramme ge hemi kai gu lei, zai chipau huâzie ge bamguame je hemi ne rûchat kam ’ndu lei.

³³“Baudime gu Tingwang ne acheu ze rang lei, Israel gu ziemmena ramme je zai Juda gu ziemmena changme je tewsâ ze la de lei, zai kebang nîmtattime leine je teigimgit ’nde lei; penui je tat ra pei mak lei.

³⁴Penui gu Ripatpeu â pe ranchi lei, zai pe ji â baudime gu Tingwang lei. Pa ne penui je sapgu gu lei, Babilon ge lungme â saukatemibe ngau mak ze bam gu, kane kedeirei ge bamme â lungtemi ze bam gu lei.

³⁵“Kaldiame peireige zai Babilon ge lungme, besuitewme benai penui gu kaningchingme peireige hiazutkie huachu gai gu lei, ze Tingwang ne rang lei.

³⁶Hedachakme peireige hiazutkie huachu gai gu lei, penui kemiebe chang ra hangge zeu; hereikang hereika’nggime peireige hiazutkie huachu gai gu lei, penui je deî’ngga kam ne ra hangge zeu.

³⁷Zai pe gu hekim ramme peireige, zai pe gu timriang ramme peireige, zai penui ruage kêdabe heram gene hereikang ’puîwangme peireige hiazutkie huachu gai gu lei. Chidezai penui â, ’mpuimi gum chang gai de ra hangge zeu! Pe heurâ peireige hiazutkie huachu gai bei ze penui ne sut-tat le ra hangge zeu!

³⁸Hedui peireige tingkang ra tew gai bei ze chize chang kam du lei; chize heraluîtewbe heram daseu. Heraluîtewbe peireige penui â kemieme chang daseu.

³⁹“Chidadege Babilonram ge hênamkau ramme, henei ramme benai ostrikruî ramme lung bam gu lei; pe dage mâdau du ziemmena lung dai ra mak lei, zai reheime leine du lung dai ra mak lei.

⁴⁰Hera ne Sodom benai Gomorra zai pehuâzie ge namdi ramme tewka’nsiabe ting ge gum ze pe dage ziemmena mî de zai ziemmena na ’nnai ra mak lei.

⁴¹“Pie le lau, baudime tingpeî ’mbene wang mui de lei; pecheuchibe hezat benai heguangme ramme tingmik deulangbe ramme gene zuawang mui de lei.

⁴²Hetubaimpi benai hengeu penui tei lei; penui â tîmphi zai ka’nggiabe ga lei. Penui ’ncheu kuâ â, sungkling kagesuâkbe kuâ gum lei; hekun ramme chingchua lu; ’mpeumi hereipuâ kailube gum ningnui je ka’nggi lei; Hei Babilon na’mpui gau!

⁴³“Penui ne sam paugaibe Babilonram gu heguang seu lu, pe ba jiesiakeu di de lei; ’mpuimi henalung ra ’nraka’nsuabe luage geteube tat gum ze, pe lung huaipun di de lei.

⁴⁴“Pie le lau, melidung je ’nggi ra Jordan hênamkang gene duilui hang gum ze, I ne penui je luakatne pe dagene paktat te ra tew gai gu lei; zai I ne nei-neime je I ne kelâng lu pe peireige sum gai gu lei, I gumbe kau châu la lau? Châu ne achu kû ra lau? Melireîpeu a suage ’ndaikau sapchi dui lau?

⁴⁵Chidaze Babilon peireige benai Kaldiame ram peireige Tingwang ne tew gai ra ’nninggaibe tedeu ramme ze ’ngking le lau: Melipoine ramme je gum ze zukereutat himchang gu lei; penui pausiabe ziegene penui gu melikerie ze peduângga himgchang gu lei.

⁴⁶Babilon je ka’nggibe ’ncheu ne kedei kechuî gu lei; zai heramzat leine ruage pa hapka’nrungbe kuâ seu gu lei,” ze Tingwang ne kacheu lei.