Read Zeme Naga JEREMIA 51 Bible Online

JEREMIA 51 - Zeme Naga bible

JEREMIA 51

¹Tingwang ne acheu ze rang lei: “Pie le lau, Babilon peireige benai Kaldiame bamme peireige mâ-tewka’nsiapeu je I ne gecheu’nrak kai gu lei.

²Zai Babilonme peireige I ne chêukakelapme je lang gai gu lei, dezai penui ne pechu kelap ku lei, zai kahereube mai ge pebâm’nsangne gene pechu ’nggi ra wang dezai penui ne pe ram ze perua bam ra tew gai gu lei.

³Bai’mpi kappeu je peize pe gu bai’mpi ’nsung se lau, zai peize pechu mechua hegeî ne tewbe puâ kai lu sapchu se lau. Rehangme peranchime je ’nsak kai se lau; pe gu baudime leine je tew’ngga kam ne lau.

⁴Kaldiame ram ge bi gai bei ze penui kâukeu gu lei, zai pe gu puidi ramme ge hejâm pung lu kum ze bam gu lei.

⁵Baudime gu Tingwang penui Rapeu ne Israelme benai Judame je â sâu gai mak ze bam lei; kane Israelme gu ’Nchilangbe Hangkatpeu peireige Kaldiame ram gu kemaube ne pui ze bam di de lei.

⁶“Babilonme ruagene pak te zu lau, ziemmena ’nteumena ne penui keringbe hang peize ’nreipat kam le lau! Pechu tewsabe gene ningchu peize tew’ngga gai se lau, aipau ting ze â Tingwang ne hekûmruîbe pechu peidairabe ze pechu peibe de lei.

⁷Babilon â Tingwang ba ge kedeirei leine je tewkameneube gechâkpiak bambe ze de lei; heramzatme leine ne pe gu wain sakkameneu de lei. Chipauziegene heramzatme leine mie di de lei.

⁸Luakat ne Babilon â kâukeu ze sia kam gai di de lei; pechu desui gai zu lau! Pa keteube jâm hangge reheu lu le lau; pa yi de lêu gu lei.

⁹Anui Babilon je tew’mmi gai ra tewheda gai de lei, kane pa yi mak tai lei. Pechu put kai ne zu lau, zai kei lei, anui mi ram ram ’mbe tat zu kei lei; pe peireige samramgaibe tinggîm riâ hangchang de lei, zai tingkehube riâ gechangbe chize teichuchang gai ’nde lei.

¹⁰Anui ka’nzeibe tewbe Tingwang ne tew’nzei gai ’nde lei; wang zu lau, anui Rapeu Tingwang gu tatew ze Zaion ge saba gai kei lei.

¹¹“Bai’mpitu kereu le lau! Hinggei tei le lau! Babilonme je Tingwang ne tew’ngga kam ra changbe ziegene Medes heguang ramme gu herui ramme je tew’nrak kai bei de lei, Babilonme ne pe gu kellumki tewka’nsiabe kûmruibe hangge chize ne Tingwang gu hekûmtewbe chang dadegeu.

¹²Babilon kerie kedibe je ’nggi ra ka’nchetbe paî teichu gai lau; hekêtkai’mmi lau; reî ra hekêtkaime je kai lau; lîmkuarabe tak hang kedâ zu lau; Babilon ge bamme tedeu ge Tingwang ne sagaibe ze pa ne kedâ ze teleu lu de lei.

¹³Hei nang hedui kiebe ge bambepeu, zai lungyi ze ning heurâ kiepeu gau, nang gagairabe ting wangchang de lei, ning gu keringbe ria ze tewtap ’nde lei.

¹⁴Baudime Rapeu Tingwang ne pe runne pe ji gene kadeseu lei: tîngkau kiebe riâ ningnui kie ze bam ra ning dage ziemmena misongga bam ra I ne tew gai sing gu lei, zai penui ne ning peireige duîlube gu rehuaî kai gu lei.

¹⁵“Pa ningching ne kedeirei tei’nsap kaipeu, zai chika’mmibe gene tinggîm liâm’ndipatkaipeu, tâtewchibe ne kedeirei tewgaipeu ze pa de lei.

¹⁶Pa ne pe kuâ sapat kai bei dege tinggîm ge tingrui ra tingchei de lei, zai tingpî ramme gene kezikdui pat ra pa ne tew gai bei de lei. Tingrui ra hangge pa ne tingcheibe tew gai lei, zai pe gu keruakaibeki gene tingkai pat ra tew gai lei.

¹⁷Ziemmena ’nteumena ne kemiebe kau, zai mâ-hî chimakbe kau chang di de lei; gechâk kahekime leine je â, penui gu heraluîtewbe gene tew’ngngam gai bei de lei, pe gu heraluî ramme ze karasa kau chang, zai penui dage penui chuilu gabe ziegeneu.

¹⁸Chiramme â mâ-tâuhanggabe kau ramme de lei, zai mi je ngua’mmierabe tatew ramme de lei; penui je tewsabe ting dezai penui â ga gai du lei.

¹⁹Jakobbe gu hang changpeu (Jakobbe Rapeu) â, airamme je ’nzuâ me lei, pa â getaleine bam ra tewgaipeu dadegeu, zai Israelme â pe gu ziemmena zat te lei; Pe ji â baudime Rapeu lei.

²⁰“Nang â a gu tediak kedibe benai herei kerua de lei: ningchu teilube gene heramzatme je I ne tewhitruai gai, zai heguangram ramme I ne tew’nsia kam gai de lei;

²¹nang gene hekun benai hekunchingchuapeu je I ne tew’nsia kam gai de lei; nang gene hekuntimriang benai hekun-timriang chuapeu je I ne tew’nsia kam gai de lei;

²²nang gene ’mpeumi benai ’mpuimi je I ne tewdesuirui gai de lei; nang gene gechîngme benai hename je I ne tewdesuirui gai de lei; nang gene rehang’mpeu benai heleu’mpui je I ne tewdesuirui gai de lei;

²³nang gene melireîpeu benai pe gu melidung je I ne tew’nsia gai de lei; nang gene tâtewpeu benai pe kiangna je I ne tew’nsia gai bei de lei; nang gene laksaibe ramme benai hereimuiteime je I ne tew’nsia gai bei de lei.

²⁴“Babilon benai Kaldia ge bamme ne Zaion ge tâ-kesiabe leine tewbe ziegene penui je I ne ningnui kengaube sing ge peiruî dai gu lei, ze Tingwang ne kacheu de lei.

²⁵“Pie le lau, Hei kedeirei je tewka’nsiabe deiloa gau, I ne ningchu ka’nggi de lei, ze Tingwang ne kacheu de lei, ning peireige I ne a ba ngiêpat ze hekâutelang gene ningchu ’ngkuakeu gai bei ze ningchu rû’ndibe deiloa chang gu lei.

²⁶Ning dagene pemikchu benai pedimchukâng hangge tingchu lu ra mak lei, zai nang â betingbeta hangge siadibe chang gu lei, ze Tingwang ne kacheu de lei.

²⁷“Kedeirei ge herei ra ka’nchetbe paî teichu da gai zu lau, heramzatme ruage hegeîluîkie ’mmut kai zu lau; pechu herei ra heramzatme je nguateleu zu lau, heguangram ramme Ararat, mi-mi zai Ashkenaz je pechu ’nggi ra kû gai zu lau; pechu ’nggi ra pemuitewpeu hangge sum gai zu lau, tîngkau ramme ’nsakhiaubambe gum ze hekun ramme je kumhiamwang gai zu lau.

²⁸Pechu ’nggi ra heram ramme je ngua lu kedâ zu lau, Medes ge heguangme, laksaibe ramme benai penui kelei ge sapme, zai penui ne samrambe kangge heram ramme bamme leine je ngua lu zeu.

²⁹Chi heram ze hingkedun ze geteube ted ne ’nniahiau bam lei. Babilon ge mî de bam ta di ze putzînggai’ndibe heram hang tew gai ra Tingwang ne pe lung ge ka’nsapbe ziegeneu.

³⁰Babilon gu hereika’nggime herei sau di de lei; kerie kedibe lungge penui bam bam de lei; penui ran-gakeu di, zai penui â, ’mpuimi riâ chang kam de lei; penui bambe bâm ramme ze hemi ne tau la de lei, pe gu hetui ramme du tewbet kam ’nde lei.

³¹Pebâm’nsangne gene pe gu namdi ze lu ’nde lei be Babilon heguang je pau gai ra, hepâupaume kat-kat je hedau ra pakhelak ze bam lei.

³²Depiau ramme sut kam ’nda, zai rienambe ramme ze hemi ne rû kam ’nde lei, zai hereikangme hing di de lei.

³³Israelme Rapeu baudime gu Tingwang ne acheu ze rang lei: Babilonram ’mpuimi ramme â, penui je kutgetie bambe luage penui â, helu kechaîpung gum bam de lei; mâtiege-makse pe hangge hechitchîrabe ting wangchang gu de lei,” ze acheu zeu.

³⁴“Babilon heguangpeu Nebukadrezzarbe ne achu â teu kam ’nde lei; pa ne achu â tewhitruai gai ’nde lei; achu â helirua gum tew gai bei de lei, hecha ne ka’nzuabe gum ze ’nzua ’nde lei; a pumji teuyibe ramme zene pa â teu’nggeu lu de lei, achu â pa ne kelikpat kai dai bei de lei.

³⁵A peireige benai a kiduîme peireige ka’nggibe tâ tewbe leine ze Babilonme dage peize wangchang lau,” Zaion ge bamme ne peize acheu sa lau. “A jai ze Kaldiame dage peize wangchang lau,” acheu ze peize Jerusalemme ne sa lau.

³⁶Chipauziegene Tingwang ne a chêu ze sa de lei: “Pie le lau, I ne ning kelei ge sap ku, zai ning kûm ze I ne ruî gu lei. Pe gu sungkling I ne tewchip ’ndu, zai pe gu depin tewchangku gai gu lei;

³⁷zai Babilon ze sia’ndi du de lei, chige munserung ramme ne penui bâm tew gu, chize mi ngaukateruibe benai ’nningdaulakluisuibe bâm, ziemmena chige mî de bamtadibe bâm chang gu lei.

³⁸“Duilui ramme gum ze penui ’nrungriaupat ku lei, duilui poine ramme gum ze penui ’nra gu lei.

³⁹Penui ne keleulia bambe luage penui hangge luube-bâm I ne tew gai bu lei, zai penui kâukeu mak tâne I ne penui je guîmeneu gai gu lei, zai ’nrakchu ta di jeizutrabe hangge I ne tew gai gu lei, ze Tingwang ne kacheu de lei.

⁴⁰Melipoine ramme je gum ze, meli’nsei ramme benai kemei’nsei ramme je gîchatbe bâm ’mbe nguatat gum ze I ne penui je nguatat ku lei.

⁴¹“Kedeirei leine ne sasuang ze bambe Babilon je ’ndaigum ze nîmtat nung se lau! Babilon ze ’ndaizeuge hezat leine ruage kehingbe kedibe chang ze bambe zeu?

⁴²Babilon je sungkling ne naî ’nda, zai heduiteleu kagesuâkbe ne pechu chûm ’nde lei.

⁴³Pe gu namdi ramme ze â kehingbe kedibe, tingkangbe heram zai heramchangbe, heram mî du lungmakbe, zai ziemmena mî du tat’ngkatadibe chang de lei.

⁴⁴Zai Babilon ge Baal je I ne tewsâ gu, zai pa ’ndaikau ’nzuakeu’ndimei be pe mui gene lupat ’ndu lei, heramzat ramme ne pe dage zuawang dai ra mak lei, Babilon gu kerie ze â kau de lei.

⁴⁵“A gu ziemmena gau! pe dagene zuapat te lau, Tingwang lumpum kedibe gene ziemmena leine ne peize penui keringbe ze tew’nring le lau!

⁴⁶Heram ge tingkum kat lungge, zai kêdabe tingkum kat chângge sampaube kuâ seu dezai, zai heram ze tew’nsia, zai samrampeu ne samrampeu je ’nggi dezai, peize ningnui lung ran-ga se lau, hing de hing se lau.

⁴⁷“Chidaze pie le lau, tingnaimikpui ramme wang mui de lei, dezai I ne Babilon gu heraluî ramme ze tew’nsia gu lei; pe gu heram pelane I ne tew’ngngam gai gu, zai pa gîchat’ndibe leine pe suage kâukeu gu lei.

⁴⁸Dezai tinggîm ge bambe benai kedei ge, zai pe lungge bambe leine ne, Babilon peireige penui suiyi ze leutew gu lei; tingpeî ’mbene tew’nsiarame penui je ’nggi ra wang gu daseu, ze Tingwang ne kacheu de lei.

⁴⁹Israelme je gîchatbe ziegene Babilon ze kau himchang gu lei, kedeirei leine je Babilon ne gîkau’ndibe gum zeu.

⁵⁰“Ningnui hiazutkie gene ’nreipatlume gau, Tat zu lau, sapbam se lau! Kedeu ’mbene Tingwang je chibam lau, zai Jerusalem je ning lung gene ’nning bam lau:

⁵¹‘Anui je tew’ngngam gai bei de lei, ka’nrube kuâ anui seu di daseu; anui kahelêube-ma ze kairabe bâm ga de lei, Tingwang ki gu ka’nchibe bâm ramme ge hesangme zuagut ti daseu,’ ze ningnui kacheu de lei.

⁵²“Chipauziegene pie le lau, tingnaimikpui ramme wang mui de lei, ze Tingwang ne rang de lei, chidezai pe gu heraluî ramme peireige I ne samram gai gu lei, zai pe gu heram leine gene hejamdime huaipun ze bam gu lei.

⁵³Babilon ne tinggîm ’mbe keuchu sede, zai pe gu peranchibe loa’ntûm pa ne kerie rie’ntip kai lu bam sede pe dagene tew’nsiarame pe peireige wang gu lei, ze Tingwang ne rang lei.

⁵⁴“’Ngking le lau! Babilon gene ka’nrungbe kuâ zeu! Kaldiame ram gene tewka’nsiabe kedibe kuâ zeu!

⁵⁵Tingwang ne Babilon gua’mpie gai gu, zai pa pe ranchibe kuâ ze tew’nsau gai gu lei. Heduidibe ramme gum ze teleu ramme ’nrahim bam de lei, penui kuâ’nrung gai de lei;

⁵⁶Babilon hangge pe peireige tewka’nsiapeu wangchang di daseu; pe gu kahereime je nîm ’nde lei, penui gu bai’mpi ramme rîaudesuirui ’nde lei, Tingwang â peiruipeu daze, pa â peiruî himchang gu lei.

⁵⁷Pe gu heguangsinme benai kaningchingme, pe gu laksaibe ramme, hereimuiteime benai pe gu hereikangme je I ne tewmeneu gai gu lei; penui jeitatzut tu zai chu dai ra mak lei, ze Heguang pe ji baudime gu Tingwang ne rang lei.

⁵⁸“Baudime gu Tingwang ne aigum ze rang lei: Babilon gu keriengdi seudeibe ze kedei riâ I ne tewkau gai gu, zai pe gu kerie’ngkam kehube ramme hemi ne rû ’ndu lei. Peruânggabe hangge heramzatme ne tâtew lei, zai hemi hangge runne heramzatme ne ranleisei gai lei.”

⁵⁹Zedekiabe ne kaheguangbe tingkum pamedaibe kum ge, Maseiabe na, Neriabe na Seraiabe dage Juda gu heguang Zedekiabe benai Babilon ’mbe tatbe luage, kemeu’mpeu Jeremiabe ne diegaibe sam, Seraiabe ne Zedekiabe gu leisirawpeu chang de lei.

⁶⁰Babilon peireige kesiabe wangrabe leine, aipau sam ramme leine Babilon deu ge rawgaibe ze Jeremiabe ne leisikuak ge raw gai de lei.

⁶¹Zai Jeremiabe ne Seraiabe je, “Babilon ge nang wangchang dezai aipau sam ramme nang kiâlia ra lei be chî le lau,

⁶²zai acheu ze sa lau, ‘Hei, Tingwang gau, aipau bâm deu ge nang ne tew’nsia ’nde ra, chidezai chige ziemmena du zai hekaubena du mâ de lung ta de ra, zai chize betingbeta perua bam de ra nang ne rang gai de lei,’ zeu.

⁶³Aipau leisi nang kiâ kam gai lu dezai, chige tingchu ret kai lu Euphrates geuki lung ’mbe tuâ gai ne lau,

⁶⁴zai acheu sa lau, ‘Pe peireige kesiabe I ne teiwanggairabe ziegene zuachu dai mak ra hangge, aigum ze Babilon kêugut tu lei,’ acheu zeu,” ze kacheu de lei. Aipau riâ ze Jeremiabe gu sam ramme de lei.