Read Zeme Naga JEREMIA 52 Bible Online

JEREMIA 52 - Zeme Naga bible

JEREMIA 52

¹Zedekiabe pa kaheguangbe ting ge patingkum ze ’ngkai ze kat chang di de lei; zai Jerusalem ge kum kereu ze kat pa ne samram de lei. Pe pui ji â Libna’mpeu Jeremiabe na, pe ji Hamutalle de lei.

²Zai Jehoiakimbe ne tewgaibe ramme leine luigum ze Tingwang mikngau ge tâsiabe pa tew de lei.

³Tingwang lumpum ziegene pe dagene penui je kelitua’nderabe hangge Jerusalem benai Judaram ge mâ-mâ ramme wangchang de lei. Zai Zedekiabe ne Babilon gu heguang je ka’nggi de lei.

⁴Zai pa kaheguangbe pasekuibe kum, pakereube kêu ge, hezie pakereube mai ge, Jerusalem je ’nggi ra Babilon gu heguang Nebukadrezzarbe ne pe gu hereikangme leine je ngua lu wang de lei, zai penui ne chize tuaguâ lu ze penui ne riputgutrabe hangge riegua gai de lei.

⁵Chigum ze heguang Zedekiabe ne kaheguangbe tingkum kereu ze kat kum riâ chang ze namdi tuaguâ ’ndi ze bam de lei.

⁶Pamedaibe kêu hezie pasekuibe mai ge namdi ge herakûm ran-desangdibe ziegene heram ge lungme hetak hang ga di de lei.

⁷Chidadege namdi ze riput kai de lei; zai hereime ’mpeumi leine pak ti de lei, Kaldiame ne namdi guâgit ze bambe luage, heguang gu merie hiage kerie kena kakge kemuiki bambe ’mpuî gene tingmuî ne namdi gene zuapat ti de lei. Zai Araba ’mbia penui tat kai di de lei.

⁸Kane Kaldiame gu hereikangme ne heguang je gua’nchu ze Jeriko kâm ramme gene Zedekiabe je ’nsachang di de lei; zai pe gu hereikangme â pe dagene pakrarip tat ti de lei.

⁹Chidadege penui ne heguang je nîm lu Hamath dei Ribla ge Babilon gu heguang dage nguahang gai de lei, zai pa ne pe peireige samram gai bei de lei.

¹⁰Zai Zedekiabe na ’mpeumi ramme je pe mikngau gene Babilon gu heguang ne bichat ’ndi de lei, zai Ribla gene Juda gu heguangsinme leine je du bichat ’ndi de lei.

¹¹Pa ne Zedekiabe mik kena latpat lu, pechu hegeîria ne pi ’ndi de lei, zai Babilon gu heguangpeu ne pechu Babilon ’mbe nguatat ze pa kechaibe mai riâ chang ze kebangki ge bang gai ’ndi de lei.

¹²Babilon gu heguang, heguang Nebukadrezzarbe kaheguangbe tingkum kereu ze sekui kum, pamengeube kêu, hezie pakereube mai ge Babilon gu heguang guâ ka’ngguapeu Jerusalem ge gut te lei.

¹³Zai pa ne Tingwang gu heki benai heguang gu heki zai Jerusalem gu heki leine rû ’ndi de lei; heki pengêudibe leine pa ne rûmut ’ndi de lei.

¹⁴Zai kereîme gu hereimuiteipeu dage bamme Kaldiame gu hereikangme Jerusalem rieguabe kerie leine tewkau ’ndi de lei.

¹⁵Zai kereîme gu hereimuiteipeu Nebuzaradanbe ne ziemmena ruage kelaksialangme hanggesame zai namdi ge ’nsakkaime leine zai Babilon gu heguang dage pakkaidime benai hechiâm chiamchime leine je kebang nîmtat ti de lei.

¹⁶Kane kereîme gu hereimuiteipeu, Nebuzaradanbe ne heram ge kelaksialangme hanggesame je grepchî merie kateleume benai helu tâ tewme chang ra hangge sâudiak kai de lei.

¹⁷Zai Tingwang ki ge bambe kangngâgeî chia ramme, zai Tingwang gu heki ge kangngâgeî ne tewbe dekuaki benai bechia ramme ze Kaldiame ne tewpângdesuirui gai lu, kangngâgeî leine Babilon ’mbe teitat ti de lei.

¹⁸Zai penui ne heli ramme, mâ-tuakbe kuak ramme, kachâbung tewka’mmitbe merua ramme, duikuak ramme, mâ-perîmyibe ka’ntaube kuak ramme, zai kellumki guâ ka’ngguabe ge teibe kagngageî li ramme;

¹⁹zai hekuak poine ramme, hemituakbe kuak ramme, duikuak ramme, heli ramme, kachâbung-kaira ramme, zai mâ-perîmyibe ka’ntaube kuak ramme, zai ruîpatbe-râtewbe ge teibe kuak ramme penui ne teitat ti de lei. Gechâk benai gepût ne tewbe leine kereîme gu hereimuiteipeu ne teitat kam di de lei.

²⁰Kechia kena benai dekuaki kat, dekuaki kangge bambe kangngâgeî ne tewbe getumsei kereu ze kena, zai bechia ramme, Tingwang gu heki hangge heguang Solomonbe ne tewgaibe deu geze â, aipau merua ramme leine gu gepût ze â ’ndeuchi lak ti de lei.

²¹Gechia ramme tedeu geze â gechia kat ze pehut sâu kereu ze desat, pegua sâu kereu ze kena, zai peseu â kêrang medai, zai pelung peruahuâng lei.

²²Aipau peireige gepût ne tewbe kechiapeî bam lei; kechiapeî hut ze kat ge sâu mengeu lei; pelane kangngâgeî ne bepuâ tew gai ze turiechî luî ramme ne tewguâling gai de lei.

²³Pebia ge turiechî luî ramme riaksekui ze seruk, bepuâ tewgaibe peireige turiechî ramme bambe ze haî kat lei.

²⁴Zai kereîme gu hereimuiteipeu ne tingku chînglangpeu Seraiabe, zai tingku pakenapeu Zephaniabe, zai hekikegeu reîme hangchum je nguatat ti de lei;

²⁵zai namdi gene herei gu ziemmena peireige rezieteipeu saibe hang kat, zai heguang gu samrambeki ge bamme ziemmena hangsena namdi gene peupatme je du, zai hereikang gu rezieteipeu gu leisirawpeu heramdeiname peireige hereikangme riak rawka’nduipeu, zai heramdeiname ruagene ziemmena riakseruk namdi lung gene ngaudaume je nguatat ti de lei.

²⁶Zai kereîme gu hereimuiteipeu Nebuzaradanbe ne penui je ngau lu, zai Ribla ge Babilon gu heguang dage penui je nguawang gai de lei.

²⁷Zai Babilon gu heguang ne penui je bichat ’ndi de lei, zai Hamath dei Ribla ge penui je tewchat kai bei de lei. Chigum ze pe ram kedei gene Juda je â kebang hang nîmtat ti de lei.

²⁸Aize Nebukadrezzarbe ne kebang nîmtattime ziemmena riak te lei: Pasenabe kum ge Judame chang chum ze ’ngkai ze kechum lei;

²⁹Nebukadrezzarbe ne kaheguangbe kereu ze desat kum ge Jerusalem gene ziemmena haî desat ze himreu ze kena je pa ne kebang nîmtat ti de lei;

³⁰Nebukadrezzarbe kaheguangbe tingkum ’ngkai ze kechum kum ge kereîme gu hereimuiteipeu Nebuzaradanbe ne Judame ziemmena haî sena ze hedai ze mengeu je kebang nîmtat ti de lei; ziemmena leine pelane chang medai ze haî seruk te lei.

³¹Zai Juda gu heguang Jehoiakinbe je bang’ndibe tingkum himreu ze sena kum chang dege, pakereu-ze-kenabe kêu gu hezie ’ngkai ze mengeu mai ge Babilon gu heguang Ebil-merodakbe ne pa heguangchube kum ge Juda gu heguang Jehoiakinbe je ngau’nggia gai ze, kebangki gene pa ne pechu nguapat kai bei de lei;

³²zai pa ne pechu yi ze ka’mpau de lei, zai Babilon ge pe dage bamme heguangme bâm ramme peireige pe bâm hangge kai bei de lei.

³³Chigum ze Jehoiakinbe ne pe gu kebangki ge kaibe puâ ramme luaktua ’ndi de lei. Zai pa keringbe ting patingnai’nsangne heguang gu mâ-teube-kaira gene teu ze bam de lei;

³⁴pe hangge timchâtkaibe deu geze â, patingnai’nsangne ge pa ne ka’nnangbe luigum ze pa ringbe ting tâluî pa kechaibe mai riâ chang ze nai’nsangne heguang ne pei ze bam de lei.