Read Zeme Naga JEREMIA 6 Bible Online

JEREMIA 6 - Zeme Naga bible

JEREMIA 6

¹Ring le ra pak chu lau, Hei Benjamin name gau, Jerusalemme ruagene pak chu lau! Tekoa ge hegeîluîkie ’mmut kai lau, zai Beth-hakkerem ge mâ-’nchetrabe zat teichu gai lau; tingpeî ’mbia ’mbene kesiabe benai sia’ndiderabe mâ-teulia de lei.

²Zaion na’mpui heleuyi ’nchanghang bampui je I ne tew’ngga ’ndu lei.

³Melireîme penui gu melidung je ngua lu wang ze chipaupui je ’nggi gu lei; penui ne pechu hetiamki ramme ne tewguâ gai gu lei, penui bam-bambe ge deteu gu lei.

⁴“Pechu ’nggi ra herei kedâ zu lau; chu lau, kei lei, anui tîngna’nding ge pechu ’nggi zu kei lei!” “Anui duângga gu lei, naimik giliap te lei, hegî ting tingkauwang di daseu!”

⁵“Chu lau, tingmuî ge anui ’nggi kei lei, zai pe gu heguangki ramme ze tew’nsia kei lei!”

⁶Aigum ze baudime gu Tingwang ne, “Pe gu hingbang ramme kuîkau ’ndu lau; Jerusalem loa ramme tuaguâ ’ndu lau. Aize â tewsâgairabe namdi lei; pe dage mâ de ga lei, tewsâgairabe runne lei.

⁷Dekuaki ne pe gu hedui pungringchim bam gum ze, pe lungriaksiabe ze pa tewringchim ze bam lei; ’nggî-kahegeibe benai tewka’nsiabe ramme pe dagene seu de lei; ka’nrâbe ramme benai geteube jâm ramme a suage bam bam lei.

⁸’Ntîng le lau, Hei Jerusalem gau, ning dagene I châmtat mak ra hangge zeu; ningchu I sâuzîng gai mak ra hang lungmakbe heram ningchu I tew gai mak ra hangge zeu,” kacheu de lei.

⁹Baudime gu Tingwang ne acheu ze rang lei: “’Nsakpatme Israelme je grepchî hiâm je gum ze ’nzut ne lau; grepchî kagekumpeu gum ze grepchîria ramme ge ning ba zîe gai dai lau,” ze acheu zeu.

¹⁰Châu je I salia ze ’ntîng ra rang gai ra lau, dezai penui seu le ra hang? Pie le lau, penui kun ramme ’ngket nan ze penui â seu ta de lei; pie le lau, penui dage Tingwang gu sam â, teihenuitewbe merua chang de lei, chize penui ’nchâ ta di de lei.

¹¹Chipauziegene Tingwang lumpum ne a dage pui de lei; I â chize teilei-desang de lei. “’Mpui himdi ge napoine ramme peireige du benai rehangme wangka’nduime peireige chize ruî gai be du lau; pe nâu benai pe napeu je du, zai chîngdime benai chîng-kezuziedime je teitat ’ndu lei.

¹²Penui ki ramme, zai penui lu ramme, zai penui nâu ramme je miramme hang tew gai kam ’ndu lei; Heram ge lungme dage I a ba getuapat kai gu daseu,” ze Tingwang ne kacheu de lei.

¹³“Penui ruage cheilangbe gene dilangbe riâ changbe, haimena ne betâumakbe gene pegiê ngaube hangge dekum kam de lei; zai kemeume gene tingkume riâ changbe haimena karasatew lei.

¹⁴Penui ne a gu ziemmename jâm ramme teleukakelam lei, lunghegeikatenaibe gabe luage ‘Lunghegeikatenaibe, lunghegeikatenaibe,’ acheu zeu.

¹⁵Mi ngaukatenetbe penui tewbe luage penui ka’ngngam mei? Mak lei, penui ’nteumena ’ngngam mak lei; penui ’nchangsiabe du ga lei. Chipauziegene penui gekâume ruage kâu gu lei; chime je I tewsabe luage, penui je tewkau ’ndu lei,” ze Tingwang ne kacheu de lei.

¹⁶Aigum ze Tingwang ne rang lei: “’Mpui’mmaî ge sap lu, pie gai ni lau, zai ’ndâ ’mpuî ramme je ’nneu gai ni lau, ’ndai’ngge ’mpuî yibe la mei be zeu; zai chigene tat ze ningnui keringbe hangge gesaube katemibe peu le lau. Kane penui ne, ‘Anui â chige tat ra mak lei,’ ze kacheu de lei.

¹⁷Ningnui peireige hekêtkaime je I ne sum gai ze, ‘Hegeîluîkie kuâ ze ’ntîng’mmi le lau!’ ze kacheu de lei. Kane, ‘Anui â ’ntîng ra mak lei,’ ze penui ne kacheu de lei.

¹⁸Chidaze seu le lau, Hei heram ramme gau, zai chî le lau, Hei pebaume gau, penui dage ’ndaikau wangchang gu mei be zeu.

¹⁹Seu le lau, Hei kedeime gau; pie le lau, I ne aipau ziemmename peireige kesiabe teiwang lei, penui ne kesia kelutewbe rachî zeu, penui ne a sam ’ngkingmakbe ziegeneu; zai a gu hingde ze du penui ne tuâ ’ndi lei.

²⁰’Ndaikau tau hangge mâ-perîmyibe ze Sheba ’mbene a dage wang zai heram kedeu ’mbene ’ntau gekumbe a dage wang lau? Ningnui gu rûkambe-râtewbe peipatbe ramme â lugaidaulak lei, ningnui gu herâtewbe ramme ze a hangge hesuiyibe mak lei.

²¹Chipauziegene Tingwang ne aigum ze rang lei: ‘Pie le lau, aime ziemmename suage ’nraprabe hangge ’nraprabe chukâng I kai gu lei, bepeume benai pe name, pe ramna’mpeu, benai pe kangpeu du ga gai gu lei,’ zeu,” ze acheu zeu.

²²Aigum ze Tingwang ne rang lei: “Pie le lau, ziemmena tingpeî ’mbia heram gene wang mui de lei, kedei bâm deulangbe gene heram kedibe ’ngngaikeleu mui de lei.

²³Penui bai’mpi benai hengeu tei lu la de lei, penui â tîmpi zai ka’nggiabe ga lei, penui ’ncheu ze â, sungkling kagesuâkbe kuâ gum lei; hekun ramme ching penui chua lu, herei hangge ’mpeumi pe puâ kailube gum zeu, ningchu ’nggi ra tew la de lei, Hei Zaion na’mpui gau!” acheu zeu.

²⁴Chipau sam paube kuâ anui seuchang de lei, anui ba ramme ’ngkeîkelak ti de lei; mi duânggabe ne anui je tei ’nde lei, ’mpuimi henalung ra kakeribe gum ze kahereu de lei.

²⁵Helu ’mbe tatpat se lau, zai ’mpuî’mmaî ge du tat se lau; heteureipeu â hiazutkie tei la, zai kehingbe ne guâgit la daseu.

²⁶Hei a gume bau na ’mpuimi gau, miseigiriapaî ’ngkang gai le lau, zai timbun ge kelarua lau; ’mpeumi napoine hangkat gap bambe hangge gum ze ning lungsittew ze heu zu lau; luakatne ’nnangket ze tewka’nsiapeu anui peireige wang gu daseu.

²⁷“Ningchu kapedeupeu benai kakedakpeu hangge a gu ziemmename ruage I ne tew gai gu lei, chidezai ningnui chî ra, zai penui ’mpuî ramme kedak ra hangge zeu.

²⁸Penui ’nteumena penui ’ndeidit ne hekuâ lumakme bau lei, zai tiakruachime bau lei; penui â hetageî benai gepûtgeî de lei, penui ’nteumena kechoa-keduaibe ne tâtew lei.

²⁹Hemihûn-ping pecheuchi-desang ze ’mmutpat lei, hegeî ka’nchiapbe hemi ne rû’ngga ’ndi de lei; peruânggabe gene lang bam de lei, kesiame je tei’mbia ne mak tâdegeu.

³⁰Penui je â tuâpat’ndibe gepût ze kû de lei, Tingwang ne penui je tuâpat ’ndi dadegeu.”