Read Zeme Naga JEREMIA 7 Bible Online

JEREMIA 7 - Zeme Naga bible

JEREMIA 7

¹Tingwang dagene Jeremiabe dage sam wangchang de lei:

²“Tingwang gu heki kemui ge sap lu, aipau sam ze chige pau gai lau, zai Tingwang sam ’ngking le lau, Juda ge bamme leine aipau kemui ramme gene Tingwang je kellum ra gutme leine gau.

³Baudime gu Tingwang Israelme Rapeu ne, ning gu ’mpuî ramme benai ning tatew ramme teleu’mmi lau, zai aipau bâm ge bam ra ningnui je I pei gu lei, ze rang lei.

⁴Ai kechoabe sam: ‘Aize â Tingwang gu kellumki lei, Tingwang gu kellumki lei, Tingwang gu ke llumki lei,’ kacheube ramme ge ’nnumtew se lau.

⁵“Ningnui ne ningnui ’mpuî ramme benai ningnui tatew tak ramme gesangsing ze teleu’mmi dizai â, ningnui kat-kat dage ka’nzeibe tewchi dizai â,

⁶ningnui ne hesangme, bepeu-game, zai kemîpuime je tewsâ mak, zai pemâugame jai aipau bâm ge tewpat kai makchai â, zai ningnui runne ningnui hangge tewjâm ra kêdabe hera chai sui makchai â,

⁷aipau bâm ge ningnui je bam ra pei gu lei, betingbeta hang ningnui peume hangge ’ndâ’ngka ge peigai’ndibe heram zeu.

⁸“Pie le lau, peruânggabe, kechoabe sam ramme ge ningnui ’nnumtew lei.

⁹Ningnui hega ra mei, gî ra mei, hema ra mei, karasa ne deseu ra mei, Baal hangge perîmyibe ’ntau ra mei, zai ningnui ne chimakbe hera ramme chai suitat ra mei,

¹⁰zai aipau katenetbe tâ ramme tewtatbamrabe hanggene a ji gene kûteibe heki ge a suage wang sap ze, ‘Anui je â ’nripat kai ’nde lei!’ ze acheu ra mei?

¹¹Ai a ji gene kûgaibe heki ze ningnui mikngau ge sut-teume ki chang di de mei? Pie le lau, I sing ne chize ngau lu de lei, ze Tingwang ne kacheu de lei.

¹²I kebambe bâm Shilo ’mbe tatchu lau, raîlangbe ge a ji bam ra I tewgaibe bâm gezeu, zai a gume Israelme kesiabe ziegene chige I ne ’ndaikau tew gai mei be pie gai ni lau.

¹³Zai chuna airamme leine ningnui ne tewgaibe ziegene Tingwang ne kacheu de lei, ningnui je I ’mpau bambe luage a kuâ ’ngking mak, zai I ne ningnui je kûbe luage ningnui ne kak mak lei,

¹⁴chipauziegene I ne Shilo ge tew gai gum ze ningnui benai ningnui peume hangge peigaibe bâm, ningnui ne ’nnumtewbeki, zai a ji gene kûteibe heki peireige I ne tew gai gu lei.

¹⁵Zai a mikngau gene ningnui je I tuâpat ku lei, I ne ning sikiname, Ephraimbe chaname leine je tuâpat gum zeu.

¹⁶“Ning hang â nang â airamme hangge kie gai se lau, zai ka’nrungbe kuâ zai kakellumbe penui hangge teichu se lau, zai a dage gekietewgaihâ se lau, ning kuâ I seu me lei.

¹⁷Juda gu namdi ramme ge benai Jerusalem ’mpuî himdi ramme ge ’ndaikau penui tew mei be nang ngau mak mei?

¹⁸Napoine ramme ne heching riawang’ndui, pe peume ne hemi’ntau gai lei, zai ’mpuimi ramme ne dekuî kakenei lei, tinggîm wangpui hangge tingku teleu ra hangge zeu; zai kêdabe hera ramme dage kesakbe-râtewbe peipatbe penui ruî gai lei, a lumpum tewpatkairabe hangge zeu.

¹⁹A lumpum tewpatkaibe ze penui ne mak mei? ze Tingwang ne kacheu lei. Chize penui runne penui je tewkeleugaibe mak mei?

²⁰Chidaze Tingwang Hera ne aigum ze rang lei: Pie le lau, a râtabe benai a lumpumbe aipau bâm peireige ruîpat kai gu lei, ziemmena benai hekaubena peireige, hingbang ramme benai kedei rachî leine peireige zeu; chize rû gu zai tew’mmit ra mak lei,” acheu zeu.

²¹Baudime gu Tingwang Israelme Rapeu ne aigum ze rang lei: “Ningnui gu rûkambe-râtewbe peipatbe ze herâtewbe ramme ge kai’mpam gai lau, zai hemei ze teu lau.

²²Ijip gene penui je I nguapatbe mai ge ningnui peume je rûkambe-râtewbe benai herâtewbe tedeu ge I rang mak zai die gai mak lei.

²³Kane aipau samde ze penui je I pei lei, ‘A kuâ pheu lau, dezai I ningnui Rapeu chang gu, zai ningnui a gume chang gu lei, zai I ne diegaibe ’mpuî leine ge ningnui tat ra lei, dezai ningnui hang yi gu lei,’ kacheube zeu.

²⁴Kane penui hekuâ pheu mak zai penui kun ’ndualie mak, kane penui ka’nningbe luî ge benai penui ’ndamdei ze kesiabe lung ramme ge tat zai ’ngngîntat ze hesua tat mak lei.

²⁵Ijipme gu kedei gene ningnui peume zuapatbe ting gene chuna ting chang ze a guâ ka’ngguame kemeume je I ne tingnaimik gepat langsau mak ze I lang gai bam lei;

²⁶sedu penui a kuâ ’ngking mak lei, penui kun du ’ndualie mak lei, kane penui kunrachi lei, penui peume suadu penui â sia’nteu lei.

²⁷“Daze aipau sam ramme leine penui je nang salia ra lei, kane penui ning kuâ ’ngking ra mak lei. Penui je nang kû gu, kane penui ning kuâ kak ra mak lei.

²⁸Zai penui je nang salia ra lei, ‘Aize Tingwang penui Rapeu kuâpheumakbe heramzatme de lei, zai laddeibe ze lumakme bau de lei; samsang â ga kam de lei; chize â penui mui gene lutua ’nde lei.

²⁹Ning peîtam chiap lu tuâ ne zu lau; ketaîloa ge chu ze desui zu lau, pe lumpumbe rehei je Tingwang ne tuâpat ’nda, zai sâu gai ’ndaseu,’ acheu zeu.

³⁰“Juda name ne a mikngau ge kesiabe tew gai ’ndi de lei, ze Tingwang ne kacheu de lei; a ji kube heki ze tewhebâ gai ra katenetbe tâ penui ne tew gai bei de lei.

³¹Zai Topheth gu kehube bâm penui ne tew gai de lei, Hinnombe na gu bekâm ramme ge bambe ge zeu, penui na ’mpeumi ramme benai ’mpuimi ramme je hemi ge rû gai ra hangge zeu, I ne diegaimakbe mi ningdaulakbe zeu.

³²Chidaze pie le lau, tingnaimikpui ramme ze wang mui de lei, ze Tingwang ne kacheu de lei, chidezai Topheth ze kûdaitarabe ting, zai Hinnombe na gu bekâm acheu ze kûtarabe ting, kane kegîbe kâm ze kûrabe ting wangchang gu lei: Penui je Topheth ge bai gai gu lei, mâ-mâ ge pebâm hang ’nggabe ziegeneu.

³³Zai aipau ziemmena ramme gu kechaipum ramme ze liamruabe ’nruipoine ramme gu hetak chang gu, zai kedei ge hekaune hetak chang gu lei, zai mî ne du penui je keheituâ ra mak lei.

³⁴Zai I ne Juda gu namdi ramme ge benai Jerusalem ’mpuî-rimdi ramme gene ’ntuka’ntabe benai hesuiyika’ntabe kuâ, zai meibepui kuâ benai henâukupeu kuâ ze sauzîng de ra tew gai gu lei; heram ze sia kam du daseu.