Read Zeme Naga JEREMIA 8 Bible Online

JEREMIA 8 - Zeme Naga bible

JEREMIA 8

¹“Chipau ting dezai â Juda heguangme ramme ra â pe gu heguangsinme ra ramme, tingkume ra ramme, kemeume ra ramme, zai Jerusalem ge lungme ra ramme ze penui raw gene teipat ku lei;

²zai naimik, hekêu, zai tinggîm ge bambe leine, chi penui ne hung zai ’nggua bambe, penui ne sui ze bambe zai penui ne peu ze kellum ze bambe ramme leine suage tuârarip kai gu lei; zai chiramme rui’ndui dai ra mak zai bai dai ra mak lei, penui â kedeirei ge kerachut gum chang gu lei, ze Tingwang ne kacheu de lei.

³Pebâm’nsangne ge kesiabe kelak gene I ne kelipatkaibeime ’nsakpatme leine ne keringbe je sua â kechaibe je ’nchâ du lei, ze baudime gu Tingwang ne kacheu de lei.

⁴“Tingwang ne acheu ranggaibe ramme penui je nang salia ra lei, Ziemmename kâu dadege penui chu dai mak mei? Mige ’nnuktat ti dege pa ’nreiwang dai mak mei?

⁵Acheuzaine ’ndaitew ze aime betingbeta kesiabe ’mpuî ge kâu gai dai di lau? Kechoabe je penui tei’ntip ze penui helatwangmeu lei.

⁶I penui je ’nninghereu ze ’ngking bei de lei, kane ka’nzeibe penui sa mak lei; mî de pe lungriaksiabe gene heli mak lei, ‘I ne ’ndaikau tew gai ’ndi lau?’ acheu zeu. Haimena penui ’mpuî-puî ’mbe tat lei, hekun ne herei ge pakgut gum zeu.

⁷Tinggîm ge teluâk ne du pe gu beting-pehî ramme chi lei; zai temaune, ’ngngainepui (’nruipoine), zai heduirui ne penui hangge beting-pehî wangrabe hî chikua bam lei, kane a gume â Tingwang gu besie-hingde chî mak lei.

⁸“’Ndaigum ze, ‘Anui â kaningchingbe kau lei, zai Tingwang gu hingde â anui dage bam lei,’ ze ningnui acheuchi ra lau? Kane pie le lau, leisirawme gu kaheretbe leisitang ne kaheretbe tew gai lei.

⁹Ziemmena kaningchingme je tew’ngngam gai gu lei, penui duângga gu, zai penui je nguatat tu lei; pie le lau, Tingwang sam penui ne tuâ ’ndi lei, zai ’ndaikau kaningchingbe penui dage la lau?

¹⁰Chipauziegene penui nâu ramme je I ne miramme je pei ’ndu, zai penui gu helu ramme penui je ka’nggime je pei ’ndu lei, cheilangbe gene dilangbe riâ chang ze haimena ne ’nzeimakbe gene pelâp ngaube je dekum di daseu; kemeume gene tingkume riâ chang ze haimena ne karasa ne tâtew lei.

¹¹Penui ne a gu ziemmename geteube jâm ramme ze teleu kakelam lei, lunghegeikatenaibe gabe luage, ‘Lunghegeikatenaibe, lunghegeikatenaibe,’ acheu zeu.

¹²Mi ngaukatenetbe penui tewbe luage penui ka’ngngam mei? Mak lei, penui ’nteumena ’ngngam mak lei; penui ’nchangsiabe du ga lei, chipauziegene penui gekâume ruage kâu gu lei; chime je I tewsabe luage penui je I tewkau ’ndu lei, ze Tingwang ne kacheu de lei.

¹³I penui je gekumwang ra tewbe luage grepchî riâ ge grepchî ’ngga lei, ’mbeuchîbang ge du ’mbeuchî ’ngga lei; peneu ramme du heguî kam di, zai penui je I ’ndaikau pei gai ’ndi mei be leine penui dagene ga kam gai di de lei,” ze acheu zeu.

¹⁴’Ndaitew ze anui ’ntau bam ra rei lau? Wang herua lu ze sum’ntiptibe namdi ramme ge tat lu ze chige ga gai de kei lei; Tingwang anui Rapeu ne anui ga gai de ra tew’ngkui gai ’ndaseu, zai anui je chairabe hedui sak ra pei bei daseu, Tingwang dage anui ne hemuigai’ndibe ziegeneu.

¹⁵Desieyibe hangge anui peu lei, kane keyibe ngau mak, tewka’mmibe ting hangge peu lei, kane pie le lau, mi kehingbe laleu lei.

¹⁶“Dan gene penui gu hekun chui kuâ seu lei; hekunsei ramme ka’nrabe kuâ ne heram gechuîka’ngngai de lei. Penui ne wang ze heram benai chige puigitbe bambe leine, namdi zai chige lungme leine je tew’ngga kam ’nde lei.

¹⁷Daze pie le lau, ningnui ruage pa’nchaiteube henêu ramme zai chinchilakbe megam ramme je I lang gai de lei, zai chiramme zene ningnui je ’nsâu gu lei,” ze Tingwang ne kacheu de lei.

¹⁸I kadesuibe â tew’mmidaichi lak te lei, a dage a lung ’nrâ de lei.

¹⁹Heram pedit-petâ luî ge a gu ziemmena ne puîhap ze: “Zaion ge Tingwang ’ngga mei? Pe gu Heguang pe dage ga mei?” kacheube kuâ ze ’ngking le lau. “’Ndaitew ze penui gu mâ-luîtewlube ramme ne benai hesangme ramme gu heraluîtewlube ramme ne penui a lumpum ra tew gai lau?”

²⁰“Hechitting â ’ntua de lei, tinglum ting kam de lei, kane anui je ’nripat kai mak rei lei,” acheu zeu.

²¹A gu ziemmena jâm ze a lung kahejambe daseu, I kadesui de lei, zai a duânggabe ne a dage puigit la de lei.

²²Gilead ge tew’mmirabe reheu ’ngga mei? Chige tewka’mmibe kau ’ngga mei? ’Ndaitew ze a gu ziemmena je pe pumsak teleu’mmi gai dai mak lau?