Read Zeme Naga JEREMIA 9 Bible Online

JEREMIA 9 - Zeme Naga bible

JEREMIA 9

¹A peî ze dekuaki chang, zai a mik ze hemikdui depin chang bei nung laîzai, a gu ziemmena ’mpuimi je tewchat’ndibe ziegene kemuî-keba I puîhap le ra hangge zeu!

²Tingkangram ge tebeîtewme hang tewgaibe tejeîki a gu bam nung laîzai neu? Dezai a gu ziemmename je sâu nan ze penui dage I tat te ra hangge zeu! Penui â kahemame zai choachime bau lei.

³Penui leipak ze bai’mpi gum ze penui rîauka’mbung lei; herat benai samsang makbe gene heram lungge peranchi chu de lei; kesiabe gene kesiabe penui tat’ntua hang ze penui achu chî mak lei, ze Tingwang ne kacheu de lei.

⁴Peize haimena ne pe kining’mpeu je ’ntîng le lau, zai peize pe sikina’mpeu dage ’nnumtew se lau; mi sikina’mpeu leine du miramme gum ze kechoa-keduai tâ tew tew lei.

⁵Mi haimena ne pe kining’mpeu je duai lei, zai mî de samsang sa mak lei; penui leiria ne karasa sa ra penui getei gai lei; penui hemui-helut tâ tew ze heliwanghung di de lei.

⁶Kategabe peireige kategabe kaipeî gai, zai kechoabe peireige kechoabe kaipeî gai lei, penui ne achu chigailak lei, ze Tingwang ne kacheu de lei.

⁷Chidadege baudime gu Tingwang ne aigum ze rang lei: “Pie le lau, penui je I tew’nchi gu zai kedak ku lei, a gu ziemmename hangge ’ndaikau I kêdabe tew gai dai sua dui lau?

⁸Penui lei â kechaibe bai’mpi tu de lei; chize kechoabe ’nnia ne sam dam de lei; ’nteumena penui mui gene penui kining’mpeu je yinan ze ka’mpau lei, kane penui lung ge â pechu lîmpie bam lei.

⁹Airamme leine hangge penui je I tewsâ mak ra mei? ze Tingwang ne kacheu de lei; Aigumbe heramzatme peireige I hekûmtew mak ra mei?

¹⁰“Peloa’ntûm ramme hangge hap ze heu zu lau, zai hênamgechangberam gu reheubuâ ramme hangge desui zu lau, chiramme siakamdibe ziegene mî de tatpela ta di de lei, zai kaurui ramme ka’nrabe kuâ seu ta de lei; tingkai ge ’nruine ramme benai hekaune ramme pak kam da zai tat kam de lei.

¹¹Jerusalem ze I ne mâ-kesiabe tuâgaika’nduibe bâm hang tew gai gu lei, zai munserung ramme ki hangge tew gai gu lei; zai Judram je henâm ’mpiezîng ra I tew gai gu lei,” kacheu de lei.

¹²Aize ’nningchi ra châu ningching-kadesangbe kau la lau? Châu dage Tingwang salia lau, dezai pa ne saba gai be ra hangge zeu? ’Ndaitew ze heram ze mige de tatpela mak ze bam ra hênamgechangberam gum ze perua ze bam lau?

¹³Zai Tingwang ne sa ze, “Penui suage a gu hingde I kaibeibe ze penui ne put kai nan, zai a kuâ pheu mak, peluî gum ze du tat mak,

¹⁴kane penui kunrachi ze penui suî’nning tew ze penui pau-pai ne geteigaibe gum ze Baal chai suitat ti de lei.

¹⁵Chipauziegene baudime gu Tingwang Israelme Rapeu ne aigum ze rang lei: Pie le lau, aipau ziemmename je mâ-gekabe ne kei gu lei zai penui je chairabe dui sak ra pei gu lei,

¹⁶zai penui benai penui peume ne du chimakme zatme ruage penui je I hûtimra gai gu lei; zai I ne penui je deî’ngga kam mak tâne penui chaige hiazutkie I lang gai gu lei,” ze kacheu de lei.

¹⁷Aigum ze Baudime gu Tingwang ne rang lei: “’Nningdesi gai ze heugaihame ’mpuimi ramme je wang ra kû gai zu lau; desuigaihâchime ’mpuimi ramme je lang gai lau;

¹⁸Anui peireige peize penui ne kelua ze hapchu gai zu lau, dezai anui mik ramme ge hemikdui lua ra, zai anui mik kum ramme ge hedui luabiaupat ra hangge zeu.

¹⁹Zaion gene hapka’nrungbe kuâ seu de lei: ‘’Ndaizeuge anui sia kam di lau! Anui â ’ngngam-desang de lei, heram ze anui sâugai’ndibe ziegene, zai penui ne anui ki ramme tew’nsia’ndibe ziegeneu,’ acheu zeu,” ze kacheu de lei.

²⁰Hei ’mpuimi ramme gau, Tingwang sam ze ’ngking gai lau, zai pe mui gene sam sapatbe ze ningnui kun ne peize seu le lau; ningnui na heleume ramme je kadesuibe tak geteilia lau, pe kining’mpui je kadesuibe leu hang kat-katne geteilia lau.

²¹Anui gu muicheiki ramme ge kechaibe wangchang daseu, anui gu heguang kisîam ramme ge chize gut te lei, ’mpuîhimdi gene napoine ramme je kelitua kam ’nda, zai keloa’ndi ramme gene rehangme ramme je tew’ngga kam ’nde lei.

²²Sa gai lau, “Tingwang ne kacheu de lei: ‘Helu ge keratum, zai helugatpeu chaige mekum ramme gum ze ziemmena kechaipum ramme kâukeu gu lei, zai mî de chize gekumwang’ndui gai ra mak lei,’ zeu,” ze acheu zeu.

²³Aigum ze Tingwang ne rang lei: “Ziemmena kaningchingpeu je peize pa kaningchingbe ge gechîtew se lau, pe ranchipeu je peranchibe ge peize keditew se lau;

²⁴kane mi-mige hegiêneime je â I Tingwang ze kedeirei ge hungka’ntipbe, pelingtewbe zai ka’nzeipeu lei kacheube ’nningchibe, zai achu gechîbe, aige zene peize hegiê le lau, airamme geze I ne ka’nchâ daseu,” ze acheu zeu.

²⁵“Pie le lau, rumgeten lu, kane helung ge rumgetenmakme je I ne tewsârabe naimikpui ramme wang mui de lei ze Tingwang ne kacheu de lei.

²⁶Chize Ijip, Juda, Edom, Ammon name, Moabme zai tingkangram ge bamme penui tam rimlume bau de lei; aipau heramzatme leine â rumgeten mak, zai Israel kibau leine â helung ge rumgeten mak daseu,” kacheu lei.