Read Zeme Naga KADESUIBE 1 Bible Online

KADESUIBE 1 - Zeme Naga bible

KADESUIBE 1

¹Ziemmena ne puigit ze bambe namdi ze ’ndaigum ze zîng ze bam di nung se lau! Heramzat ramme ruage pengêudilang ze bambe ze pa ze kemîpui gum ze changgaidibe zeu! Namdi ramme ruage heguangpui chang ze bambe namdi ze miramme ba kangge pa bam di de lei.

²Tingmuî ge pa hap-kadesang de lei. Pe biapi ge pe mikdui luachup zeu; pa kehungme leine ruagene pechu tum gai ra mî de ga lei; pe kangme leine ne penui jaîsiabe tâ pe peireige tew gai de lei, penui â pe teureime chang di de lei.

³Juda â tewsabe liebe benai tâ keritbe tewbe ziegene hesangme ram ’mbe tat ti de lei; heramzatme ruage chuna pa lung la lei, kane saugairabe bâm peulak lei; pa pe duânggabe kak lung gene pechu guaka’nchume ne ’nsachang kam di de lei.

⁴Zaion tatbe puidi ramme kadesui lei, riagaibe-ngi ramme ge mî de wang mak daseu; pe gu keriekemui ramme leine put-hâmmuî ’nda, pe gu tingkume kehuisiak la de lei; pe ram heleume je â zukereutat ti de lei, zai pa ’nsangdu lunghereu-desang ze la de lei.

⁵Pe teureime ne pe peî chang di de lei, pe teureime kengambe ngau lei, pa hede ’ngka’ngkie-desangdibe ziegene pa lunghereu ra Tingwang ne tew gai bei daseu; pe name â heteureime suage kebangtewtat ti de lei.

⁶Zaion na heleu’mpui dage pa pengêudibe leine rimnatat ti de lei. Pe gu heguangsinme â, petaning hang peulakbe rehiê’nsei ramme gum chang gai di de lei; penui je guaka’nchume suage penui ran-ga ze pak ti de lei.

⁷Jerusalem ne pa kahereube liebe benai pe duânggabe ting ge ’ndâge pe dage bambe mâ-pemîhungbe ramme leine huî ze bam lei. Pe gu ziemmena heteureime ba ge kâugaibe luage, zai mî de pechu ’ngngâ ra gadibe luage, pe teureime ne pe peireige hemia ze, pa kâukeudibe geze teihenuitew de lei.

⁸Jerusalem ne hemui sia-kadesangbe tew gai ’ndi de lei, chipauziegene pa kahebâbe chang di de lei; pechu hengêutew ze bamme leine ne pechu ngaugailak ti de lei, pa pumlâng bambe penui ne ngau lu daseu, eu lei, pa ’nsangdu huaipun ze pe ju ’nnuk ti de lei.

⁹Pa kahebâbe â pe nî ramme ge bam di de lei; pa garabe ze pa â ’nningchi mak te lei; chipauziegene pa kâukeube ze â mi kehingbe de lei, pechu tumgairabe kau mî de ga lei. “Hei Tingwang, I kahereube pie gai ni lau, heteureime ne duî ’ndi daseu!” ze pa kacheu de lei.

¹⁰Heteureime ne pe gu pemîhungbe merua ramme leine peireige pe ba ngiêpat te lei, eu lei, pe gu ka’nchibeki ze heramzatme ne ’nggigutbe pa ngau lu de lei, ning gu wangka’nduibeki ge gut ra nang ne lunmakme zenêu.

¹¹Mâ-teu ra penui peube luage pe gu ziemmena leine ne huaipun bam lei; penui ran tew’nchi gai ra hangge penui hetak hangge penui heurâ ramme hiak kai lei. “Pie gai ni lau, Hei Tingwang, zai pie le lau, achu â ngau’nna ze bam di daseu,”

¹²“Aize ningnui â, mâ-hangge du ’nning gai mak semei, ningnui tatka’ngguakme leine gau? Pie gai ze ngau le lau, a peireige lungkahereube teiwanggaibe gumbe lungkahereube la mei be zeu, Tingwang ne, pa pe lumpum-kadesangbe mai ge tewsâgaibe zeu.

¹³“Kehu ’mbene pa ne hemi langkeu gai de lei; a ra ramme lungge chize wangkeu gai ra pa ne tew gai de lei; a pî hangge pa ne ’mpia ’nsung gai de lei; pa ne achu tei’nrikwang gai bei de lei; a duângga ze bam ra pa ne tew gai bei de lei, ’nrîmbeting tâluî kenuihuak bam de lei.

¹⁴A gu hemui ramme â guangkâm ge ret kai ’ndi de lei; pe ba ne chiramme pihelua gai bei de lei; chiramme ze a guang ge luak kai bei de lei; a ran-gakeu de ra pa ne tew gai bei de lei; I ne tingkangchilakme ba ge Tingwang ne achu pei gai bei de lei.

¹⁵“A gu peranchibe ziemmename a dage bamme je Tingwang ne ngauka’nna de lei; a gu rehangme je chaîkeniak kai ra achu ’nggi ra hang baudime je pa ne kûwang’ndui gai bei de lei; wain niakbe ge gum ze Tingwang ne Juda na leusangka’nchipui je chaîkakeniak te lei.

¹⁶“Airamme hanggene I hap te lei; a mikdui luachup kai de lei; tumgairapeu â a dagene deu di daseu, a lung ran tew’nchigaidairapeu zeu; a name je â put-hâmmuî gai ’nde lei, heteureime ne duî ’ndi daseu.”

¹⁷Zaion ne pe ba getuapat te lei, kane pechu tumgairabe kau mî de ga lei; Jakobbe je ’nggi ra Tingwang ne die gai ’ndi de lei, chidezai pe kiningme ne pe teureime chang ra hangge zeu; Jerusalem ze â, penui ruage ngaukatenetbe chang gai di de lei.

¹⁸“Tingwang â ka’nzeibe ge bam lei, I ne pe gu sam ze ’nggi bei daseu; kane ’ngking le lau, ningnui ziemmena leine gau, zai I kahereube liebe pie gai ni lau; a gu rehang-heleume â kebangtewtat ti de lei.

¹⁹“I kehungme je I kû gai de lei, kane penui ne achu duai de lei; a gu tingkume benai gechîngme namdi lungge ga gai di de lei, penui ran tew’nchi gai dai ra penui hetak hang peube luage zeu.

²⁰“Pie gai ni lau, Hei Tingwang gau, I â lunghereu ze la de lei, A keringbe â keleulia ze la de lei, a lung ge ’nningherutsut ze la de lei, I ne hekuâpheumeu-desang ze bam di dadegeu. Puidi ge hiazutkie ne bichat kam da; kilûng ge kechaibe gum ze bam di de lei.

²¹“’Ndaigum ze I huaipun ze bam mei be ’ngking gai lau; achu tumgairabe kau mî de ga lei. I kahereube ze a teureime leine seu di de lei; chize nang ne tewgaibeibe ziegene penui suiyi de lei. Nang ne hetkai’ndibe naimikpui ze nang ne teiwang gai lau, zai peize I gum ze penui je du bam lau.

²²“Penui tâsiabe tewbe leine peize ning masuage wang gai lau; a gu hemui ramme leine ziegene a peireige nang tew gai bei gum ze penui peireige tew gai be lau; I huaipungaibe ramme ze misongga ze bam, zai a lung ze â desuipoi ze bam di daseu.”