Read Zeme Naga KADESUIBE 2 Bible Online

KADESUIBE 2 - Zeme Naga bible

KADESUIBE 2

¹’Ndaigum ze Tingwang ne pe lumpumbe gene Zaion na heleu’mpui je kemâu kangge kai bei nung se lau! Israel ngeudibe ze tinggîm gene kedei ’mbe pa ne tuâkeu gai ’ndi de lei; pe pichaîra ze pa ’ngngaî ’ndi de lei, pa pe lumpumbe mai gezeu.

²Tingwang ne ngauka’nggiabe ga ze Jakobbe lungbe bâm ramme leine tew’ngga kam ’ndi de lei; pa pe lumpumbe gene pa ne Juda na heleu’mpui gu keriengdi ramme puikau ’ndi de lei; ngauka’nnabe gene pa ne kedei ge heguangram benai pe gu samrambe ze teikeu gai bei de lei.

³Pe lumpum-kadesangbe gene pa Israel ranchibe leine ’ngettua ’ndi de lei; hereime masua gene pa ne pe ba hezat’mbia ba tei’mbia ’ndi de lei; pa ne hemimelei getaube gum ze Jakob ge tau de lei, pe taihia leine du rû kam ’ndi de lei.

⁴Heteureipeu gum ze pa ne bai’mpi chak’mbungring gai de lei, pe ba hezat’mbia ba ne heteureipeu gum ze pa ka’nsung de lei; zai Zaion na heleu’mpui gu paîki gene anui ne nguaka’mmieme leine je pa ne tewchat ’ndi de lei; pa pe lumpumbe ze hemi gum ze pa ne ruîpat kai ’ndi de lei.

⁵Tingwang ze â heteureipeu gum ze chang gai di de lei; pa ne Israel je tew’ngga kam ’ndi de lei; pe gu heguangki ramme leine pa ne tew’nsia, pe gu keriengdi ramme tewkau gai de lei; zai Juda na heleu’mpui lung ge pa ne puîhapbe benai kadesuibe tewpung gai ’nde lei.

⁶Merie ge gum ze pe gu paîki ze pa ne tewkau gai ’nde lei, pe gu riagai’ndibe hengi ramme tewbe bâm ze pa ne tew’nsia gai ’ndi de lei; Tingwang ne Zaion gene riagai’ndibe-ngi benai ’ntakbambe mai ze tew’nsau ’nde lei, zai pa pe râta-kadesangbe gene heguang benai tingkupeu je tuâpat ’nde lei.

⁷Tingwang ne pe gu herâtewbe-kaira ze mâ-hang du ’nning gai ta di, pe gu ka’nchibe bâm je liângri ta di de lei; pe gu heguangki kerie ramme ze heteureime ba ge pa ne peipat kai ’ndi de lei; riagai’ndibe-ngi mai ge gum ze Tingwang gu heki ge kebiengseng ze bam di de lei.

⁸Tingwang ne Zaion na heleu’mpui gu kerie tew’nsia gai ra pe lungsing di de lei; ka’ndeube ria ne pa ne chize ’ndeupat kai de lei; tew’nsiarabe gene pe ba tei’ngngîn dai ta di de lei; ka’nseubeki benai keriengdi ne desui ze bam ra pa ne tew gai de lei, penai lung hereu’nsamrap ti de lei.

⁹Jerusalem gu keriekemui ramme kedei ge kau gai di de lei; pe gu ’ngkamchâp ramme pa ne tew’nsia ze tewbet ’ndi de lei; heramzat kêdame ruage pe gu heguang benai heguangsinme â la de lei, hingde â ga de lei, zai pe gu kemeume Tingwang dagene keliâbe mâ de ngau ta di de lei.

¹⁰Zaion na heleu’mpui gu gechîngme penui kuâneu mak ze kedei ge ka’ntau de lei; penui peî ge kedeiniamoîne ’nruk ze miseigiriapaî ba de lei; Jerusalem heleume kedei ’mbe penui peî kei’ngkumkeu di de lei.

¹¹Hapbe gene a mik kezin de lei; A keringbe (a lung) keheu di de lei; a suisiabe ne a lung peruahuâng bam di de lei. A zatme na heleu’mpui je tew’nsia’ndibe ziegene, namdi gu puidi ramme ge napoine ramme benai ’ngngiêne ramme penui jiesia-keudibe ziegeneu.

¹²Penui ne penui pui ramme dage ’nrung ze, “’Ndaige tingku benai wain la lau?” kacheu de lei. Namdi gu puidi ramme ge kahejambe kau ramme gum ze penui kâukeube lua, penui pui ramme ne puabe gene penui keringbe tudkaidibe luage zeu.

¹³Ningchu I ’ndaikau hangge sa’nda gai ra, ningchu ’ndaikau ne teikeda ra lau? Hei Jerusalem na heleu’mpui gau! Ningchu I ne tum gai be ra hangge ’ndaikau luigumbe hangge ningchu I teigaichi le ra lau? Hei Zaion na leusangka’nchipui gau! nang siadibe ze â sungkling gum ze di-desang di daseu; châu ne ningchu teleu’mmidaichi le ra lau?

¹⁴Ning gu kemeume ne ning hangge karasa benai kechoa-keduai gu keliâbe ramme ngau de lei; ning hang keyibe ramme teiwang gai dai ra hangge penui ne ning gu hemui-helut ralia mak te lei, kane penui ne ning hangge karasa benai ngualietatrabe keliâbe ngaube sam pau gai de lei.

¹⁵’Mpuiki ge tatka’ngguakme leine ne ningchu penui ba kagekeu de lei; penui ne Jerusalem na heleu’mpui je ’nneî ze penui peî kakezit te lei; “Aipau namdi ze peluiyi ’nsangsiakbe, kedeirei leine ne hesuiyika’ntabe ze kûbe namdi de mei?” kacheu de lei.

¹⁶Ning teureime leine ne ningchu ka’nrû lei; penui ne kerai ze, penui geu kakegit lei, penui ’nrung ze, “Anui ne pechu tew’nsia ’nde lei! Hei aize anui ne kaheguîbe naimikpui de lei; chuna â chize anui dage la de lei; chize anui ngau de lei!” kacheu de lei.

¹⁷Tingwang ne pa tew ra ’nninggaibe ze tew gai ze, pa rang’ntuagaibe ze tewpui gai ’nde lei; pa ne ’ndâge diegai’ndibe luigum ze, ngauka’nggiabe ga ze pa ne tew’nsia gai ’nde lei; ning peireige heteureime ne hesuiyi’nta ra pa ne tew gai ’nde lei; zai ning teureime ran tew’nchi gai ’nde lei.

¹⁸Tingwang dage ’nrung’nchi lau! Hei, Zaion na heleu’mpui gau! Peize kemuî-keba ning mikdui ne teleu gum ze luakeu lau! Ning runne ningchu sau ra pei se lau, ning mik ze peize saunak kai se lau!

¹⁹Chu lau, tingmuî ge ’nrung gai lau, pehî ramme putchube lua’nsangne ge zeu! Tingwang masuage hedui gum ze ning lung ruîpat kai lau! Puidi mui ’nsangne gene penui jiesiakeudime ning name keringbe hang gene pe dage ning ba getuachu gai lau.

²⁰Pie gai ni lau, Hei Tingwang gau, zai pie le lau! Châu dage aigum ze nang tew gai lau? ’Mpuimi ramme ne penui ne lungkeume, penui ne ’mpâmchube na ramme je teu ra di de semei? Tingkupeu benai kemeu’mpeu je Tingwang gu ka’nchibeki gene gîchat kai ra de semei?

²¹Puidi ramme kemûtpupbe ge gechîng-hena tuâtiam la de lei; a gu heleume benai a gu rehangme hiazutkie gene kâukeu kam de lei; ning lumpumbe mai ge nang ne penui je gîchat kai bei de lei, ngauka’nggiabe ga ze tewchat kai bei de lei.

²²Riagai’ndibe-ngi mai gum ze I kehingbe guagitbambe ramme je nang ne ’nnâ gai bei de lei; zai Tingwang pe lumpumbe mai ge mî de ’mbiapat mak zai ringpat mak te lei; I ne ’mpâm ze ’ngkutchume je a teureime ne tew’ngga ’ndi de lei.