Read Zeme Naga KADESUIBE 3 Bible Online

KADESUIBE 3 - Zeme Naga bible

KADESUIBE 3

¹Pe lumpumbe gu hetui kangge tewsabe liebe ngaupeu ze I de lei;

²pa ne kumpat ze mâ de kebabe gabe kemuîbe ge achu nguawang gai bei de lei;

³pelingsing ze ’nrîmbeting tâluî a peireige pe bahuâ kai dai kai dai ze bam de lei.

⁴A chie benai a gei ’nggâuhuakpat ra pa ne tew gai bei de lei, zai a ra ramme pa ne tewbet ’ndi de lei;

⁵lungkahereube benai tewsabe ne achu tuaguâ ze ’nzuichim ne ra pa ne tew gai bei de lei;

⁶’ndâge chaidime gum ze kemuîbe lungge I bam ra pa ne tew gai ’ndi de lei.

⁷I pak’mbiachi lak ra pa ne achu riegua ’ndi de lei; heria keritbe pa ne a peireige luak kai ’ndi de lei;

⁸’ngngâ gai ra hangge I ne kû ze ’nrung sede I gekiebe pa ne tewnam ’ndi de lei;

⁹’nchugialube ramme ne pa ne achu a ’mpuî ramme dangnam ’ndi de lei, I tatbe ’mpuî ramme ze pa ne tew’ngkuirua gai bei de lei.

¹⁰Pa â a hangge hegum lîmkuabe gum, duilui ’mbaikuabe gum chang lei;

¹¹a ’mpuî gene pa ne a chu tei’mbiatat lu ze achu chakdesuirui gai bei de lei; pa ne achu sâu gai bei de lei;

¹²pa ne pe gu bai’mpi ’nsung gai lu ze pe gu bai’mpitu ’nchetrabe hangge gum ze achu kai bei de lei.

¹³Pe gu heturak gu bai’mpitu ramme ne pa ne a ’nnung ge kapgut kai ’ndi de lei;

¹⁴I â ziemmena leine ne teihenuitewrabe chang di, patingnai’nsangne penui gu karengetbe leu hang chang di de lei.

¹⁵Lungkahereube ne pa ne achu tewpui gai bei de lei, keza karîbe ne pa ne achu guî’nggeu gai bei de lei.

¹⁶A geu ne hegitmoîne kegit ra pa ne tew gai bei, zai timbun ge ’ngkunrun bam ra pa ne achu tew gai bei de lei;

¹⁷a keringbe ne lungzeune tewbe ngaulak ti de lei; hesuiyibe ze ’ndaikau mei be I â chî ta di de lei;

¹⁸dadege I ne, “A ngeudibe benai Tingwang dagene I kaheguîbe â ga de lei,” kacheu de lei.

¹⁹I geteubeted liebe benai lungkahereube, keza karîbe benai ’nneirai ze bambe ’nningtâu gai lau!

²⁰A keringbe ne chize ’nningsau mak ze bam lei, zai a lung ge helêukeu ze bam de lei.

²¹Kane aize I ’nningdau lei, zai chipauziegene I kaheguîbe bam lei:

²²Tingwang gu hungka’ntipbe mâdau du sau me lei, pa ka’nggiabe mâdau du betun-gai me lei;

²³hechua’nsang ne chiramme rechi ze bam lei; nang lungsangtewbe â di-desang lei.

²⁴“Tingwang â a heu lei,” “Chidaze pa ge I heguî gu lei,” ze a keringbe ne kacheu de lei.

²⁵Pechu kuâbamme hangge Tingwang â yi lei, pechu peube hangge zeu.

²⁶Tingwang gu tewka’nringbe hangge hangkat pe kuâneu mak ze kuâbambe yi lei.

²⁷Ziemmena hangge pa hena’ngka gene guangkâm pungbe pe hang yi lei.

²⁸Tingwang ne chize pe peireige tuagaibeibe luage, peize pe runne pe kuâneu mak ze ’ntau bam lau;

²⁹peize pe ju kedei ’mbe ’ngkumtit kai lau— kaheguîbe bam leu gu rei lei;

³⁰kagepeibe kau dage peize pe biapi lie gai be lau, zai ka’nrûbe ramme ne peize puigit ze bam lau.

³¹Tingwang ne betingbeta hangge tuâpatzut kai ra mak daseu,

³²kane, pa ne tewhereu gai sede, pa ngauka’nggiabe bam gu lei, pa hungka’ntipbe misongga ze bambe luigum zeu;

³³pa â pe lung sing ne ziemmename name je tewsâ ze tewhereu mak daseu.

³⁴Kedeirei gu kebangki ge bamme leine je mi pî ne chaîkeniakrabe,

³⁵Hulangpeu masua gene ziemmena ka’nzeibe teika’mbiabe,

³⁶ziemmena je pedeu râm’ngkuigaibe, airamme ze â Tingwang ne pe suîhezuâ mak lei.

³⁷Tingwang ne diegaibe ne lei makchai â, châu ne samdiegaibeibe gene tâ wangchang lu lau?

³⁸Keyibe benai kesiabe wangchangbe ge Hulangpeu ne samdiegaibe gene mak mei?

³⁹’Ndaitew ra ziemmena, keringbe kau ziemmena ne pe gu hemui ramme ziegene tewsabe deu ge tingkang ra lau?

⁴⁰Anui ’mpuî ramme kedak ze pie’mmi gai zu kei lei, zai Tingwang dage helatwang zu kei lei!

⁴¹Tinggîm ge bambe Hera dage anui lung ramme benai anui ba ramme getuachu gai zu kei lei:

⁴²“Anui ne hede’ngka zai hekuâ pheu mak te lei, chipauziegene nang ne lun gai mak tai lei.

⁴³“Ning lumpumbe ne ning runne ningchu ’nzuichim lu anui je gua’nchu ze, ngauka’nggiabe ga ze anui je tewchat te lei;

⁴⁴anui gekietewbe ramme tatpelachi lak ra hangge ning runne ningchu kemâu ne chûm ’ndi de lei.

⁴⁵Hezat ramme ruage anui â, kesiabe benai tuâpatkaibe chang ra nang ne tew gai bei de lei.

⁴⁶“Anui teureime leine ne anui je kesiachau gai de lei;

⁴⁷kehingbe benai tewkaurabe anui peireige wangchang di de lei, tewka’nsiabe benai tewka’nggabe zeu;

⁴⁸a gu ziemmena na heleu’mpui je tew’nsiakam’ndibe ziegene a mik gene hemikdui geuki ramme lua de lei.

⁴⁹“A mikdui ramme â saumeluisui ze, gîngmang du gai ta di ze lua bam gu lei,

⁵⁰tinggîm ’mbene Tingwang ne piekeu ze ngau mak tânai;

⁵¹a gu namdi gu ’mpuimi leine dage wangchangbe I ngaulube ziegene a suisia de lei.

⁵²“Pedeu ga ze a teureime ne achu ’nruine je gum ze tewchat ra rikrua de lei;

⁵³penui ne achu hûm ge ’nringtua gai lu, tingchu ramme ne a peireige tuâchim gai de lei;

⁵⁴a peireige hedui ne sungchim ’ndi de lei; ‘I ga gu de lei,’ ze I kacheu de lei.

⁵⁵“Hei Tingwang gau, hûmkuiki sîng ’mbene ningchu I kû gai de lei;

⁵⁶‘’Ngngâ gai ra I ka’nrungbe kuâ ze ning kun ’ngketnam se lau,’ ze I kiambe kuâ ze nang ne ’ngking bei de lei;

⁵⁷I ne ningchu kube luage nang ne wang’nna bei de lei; nang ne, ‘Hing se lau!’ kacheu de lei.

⁵⁸“A deu ze nang ne mêuhâ gai bei de lei, Hei Tingwang gau, nang ne a keringbe meupat kai bei de lei.

⁵⁹A peireige kesiatewgaibe nang ngau lu de lei, Hei Tingwang gau; nang ne a tûdeu ge samram gai lau.

⁶⁰Penui ne hekûmtewbe leine nang ngau lu de lei, a peireige kesia chiambe ramme leine zeu.

⁶¹“Penui ne ka’nrûbe ramme nang seu lu de lei, Hei Tingwang gau, a peireige penui ne kesiachiambe ramme leine zeu.

⁶²A teureime sam ramme benai ka’nningbe ramme zene ’nrîmbeting tâluî achu ’nggi ze bam lei.

⁶³Penui sap ze ka’ntaube tak ze pie gai ni lau; I â penui gu karengetbe leu ramme hang chang di de lei.

⁶⁴“Penui ba tatew luigum ze nang ne penui je peiruî dai gu lei, Hei Tingwang gau.

⁶⁵Nang ne penui je helung ’ndamdeibe pei gai gu lei; ning gu desetkaibe penui peireige bam gu lei.

⁶⁶Ning gu tingkehube kangge ning lumpumbe gene penui je gua’nchu ze penui je nang ne tew’ngga ’ndu lei, Hei Tingwang gau,” acheu zeu.