Read Zeme Naga KADESUIBE 4 Bible Online

KADESUIBE 4 - Zeme Naga bible

KADESUIBE 4

¹’Ndaigum ze gechâk pegeî hâmdibe, gechâk ka’nchibe pegeî kelidibe nung zeu! Puidi mui ’nsangne ge ka’nchibe tingchu ramme tuârarip la de lei.

²Pemîhungbe Zaion na ’mpuimi ramme, penui pumrît mî ze gechâk yibe mî riâ pemîhung ze, penui je â, helîkahedetpeu bachiâm gu hegamli ramme gum riam gai la de lei.

³Munserung ramme ’nsangnedu penui poine je tung ra pei lei, kane a gu ziemmena na ’mpuimi â, tingkangram ge bambe ostrikruî ramme gum ze peraksia lei.

⁴(Hedui) hereidibe ziegene ka’mpâmbe poine pe hak ge pe lei kup ti de lei; napoine ramme ne tak teu ra kie de lei, kane penui je mî ne de pei mak lei.

⁵Teuyibe hetak ramme teu ze bamme puidi ramme ge chai la de lei; gieremangbe paî yibe gene ’nggumchume timbun tum ramme ge jeikela la de lei.

⁶A gu ziemmena na heleu’mpui gu hemui-helut â, Sodom gu hemui suadu di’ngkeu ze bam di de lei, chize mî de hebalak kai mak ze luakatne tuâkeu ’ndi de lei.

⁷Pe gu heguangsinme â kebun suadu ’nchi, tungdui sua ’ngngûp ze bam de lei; penui pum ramme â koral suadu satgie bam, penui luî-râyibe â sapphir chu gum ze bam de lei.

⁸Kane chuna â tingngui suadu tik te lei, puidi ramme ge mî de penui luî chî ta de lei, penui ra ramme peireige penui gei herutsut kai di la de lei, chize heching kechaibe gum ze changku gai de lei.

⁹Hiazutkie chit gene chaime â, ka’nzeibe chit gene chaime, helu rachî ramme teu ra ga ze lungkahereube gene kemei-meichatme suadu penui suiyibi di de lei.

¹⁰Ngauka’nggiabe ne puibe ’mpuimi ba ramme ne penui name gîmsing je langteu de lei; a gu ziemmena na heleu’mpui je tewka’nsiabe luage penui name ze penui hetak chang di de lei.

¹¹Tingwang ne pe lumpumbe ’mpat’nzâuchiak kai de lei, pe lumpumbe geteubeted pa ruîpat kai de lei; zai pa ne Zaion ge hemi kedia’ntau gai de lei, chize ne kedei riâ rûmut ’ndi de lei.

¹²Jerusalem gu keriekemui ramme ge ka’nggime mei nune heteurei ne mei ze gutleduibe hangge â, kedeireime gu heguangme ne. Zai kedeirei ge lungme ne mî de ’nnumtew mak te lei.

¹³Aize â pe gu kemeume gu hemui ramme ziegene, zai pe gu tingkume gu hemui pe lung ge ziemmena kapelingme jai tewpatkaibe hemui ramme ziegene de lei.

¹⁴Hemikchitbe chang ze puidi ramme ge penui kezitrua bam de lei, hejai ne tewhebâ’ndibe ziegene mî de penui paîni ramme deîchi dai lak ti de lei.

¹⁵“Tat te lau! Kahebâme!” ze ziemmename ne penui je ka’nrat te lei; “Tat te lau! Tat te lau! Deîtau se lau!” acheu zeu. Dadege penui â pak’mbiaruabe kau, zai kezitruabe kau chang di de lei; heramzatme ramme ruage ziemmena ne sa ze, “Anui dage penui je peize bam ta gu de lei,” kacheu de lei.

¹⁶Tingwang gîmsing ne penui je hûtimrarip kai bei de lei, pa ne penui je mâ-hangge du ’nning gai ra mak te lei; tingkume je hengêutewbe teilia mak te lei; gechîngme je ka’nchâbe teilia mak tai lei.

¹⁷’Ngngâ ra hangge peruânggabe gene piekua-kua ze anui mik ran-gakeu di de lei; anui piekuabe ge anui je tew’nringchilakbe heramzat je piekua de lei.

¹⁸Anui gu puidi ramme ge anui tatrua chilakterabe hangge ziemmename ne anui pikiâm ramme reîgit ’ndi de lei; anui betun-gairabe wang’nna di de lei; anui ting hang ria gai ’ndi de lei; anui betun-gaibe wangchang di daseu.

¹⁹Tinggîm ge kelie ramme liamruabe sua â, anui je guaka’nchume â ’nzat’ngkeu di lei; kedeiloa ramme peireige penui ne anui je guaka’nsa de lei, tingkangram ge penui ne anui je lîmkua ze bam de lei.

²⁰Anui keringbe chuilu, Tingwang ne suanggaipeu je, penui gu hûm gene lu ’ndi de lei, “Heramzatme ramme ruage pe gu kezui gene anui ring ra de lei,” ze anui sagaipeu jeu.

²¹Hesuiyi’ntaza bam zu lau, Hei, Edom na heleu’mpui gau, Uz heram ge lungbe kau gau; kane ning peireige du hepiak ze puakeliawang gu lei; nang meneu di ze bam gu, zai ning runne ning puâ rarît ’ndu lei.

²²Hei Zaion na heleu’mpui gau, ning gu hemui-helut ziegene tewsabe â tew’nsang gai ’nde lei, pa ne ningchu kebang ge kai ta du de lei; kane Hei Edom na heleu’mpui gau, ning gu hemui-helut ze â pa ne gesâbe peiruî gu lei, pa ne ning gu hemui ramme ralia gu lei.