Read Zeme Naga KADESUIBE 5 Bible Online

KADESUIBE 5 - Zeme Naga bible

KADESUIBE 5

¹Chîbam lau, Hei Tingwang, anui dage ’ndaikau wangchang mei be zeu; pie le lau, zai anui kahelêube ngau le lau!

²Anui heurâ ze â, hesangme dage teikedettat kai ’nde lei, anui ki ramme â, heramzat gechâm-châmme dage pei gai ’nde lei.

³Anui â anui peu ga ze ’nggiâne ramme chang gai di de lei; anui pui ramme â kemîpui ramme gum la de lei.

⁴Anui hedui sakbe mî du anui pei himchang ra chang, heching anui ka’nnangbe hangge du pemî ne lui ra chang de lei.

⁵Anui guang ge guangkâm kai lu ’nchi-chine anui je kumgetie ze tat te lei; anui lei de da, kane anui je sau ra pei mak lei.

⁶Tingku ngaubuibe riâ ngau le ra Ijipram benai Assiriaram dage anui ba ngiêpat kai de lei.

⁷Anui peume ne hemui gai de lei, zai penui â chuna â ga de lei; zai anui ne penui gu hemui-helut ramme pâupung de lei.

⁸Kebang ramme ne anui peireige samram la de lei; penui ba gene anui je ’nripatkairabe kau mî de ga de lei.

⁹Anui keringbe hangge hing-hing ze anui hetak hangge ngau lei, tingkangram ge hiazutkie bambe ziegeneu.

¹⁰Herakûm betedgeteube gene anui gei ramme â hemang gum ze teusie la de lei.

¹¹Zaion ge ’mpuimi ramme je kakedui lei, Juda gu namdi ramme ge heleume ramme je kedui bei de lei.

¹²Heguangsinme je penui ba gene keî’nchie gai bei de lei; gechîngme je du hengêutewbe pei mak lei.

¹³Rehangme â chêu niakbe bâm ge chêu niak himchang ra chang di de lei; zai rehangme napoine ramme hechingput ritbe ramme ziegene kenukpin bam de lei.

¹⁴Kechipaume ne namdi kemui sâu ’ndi, rehangme ne penui gu heruak ka’ntabe tew ta di de lei.

¹⁵Anui gu helungsuiyibe sau di de lei; anui kelimbe ze kadesuibe hangge tewkedat kai bei de lei.

¹⁶Anui peî gene heguang peichûp keutat ti de lei; anui pausia de lei, anui ne hemui gai ’ndi daseu!

¹⁷Aipauziegene anui lung ramme ’nrâ ze bam di de lei, airamme ziegene anui mik ramme ngauzimra di de lei,

¹⁸Zaion loa put-hâmmuî la daseu; chige munserung ramme ’ngguakpang la de lei.

¹⁹Kane nang â Hei Tingwang, betingbeta heguang ze bam lei; ning gu heguang-bamrâ â, rehei ramme leine ge bam-bam lei.

²⁰’Ndaitew ze betingbeta hangge anui je nang ’ngngaî ’ndi, aitiege anui je nang sâu ’ndi lau?

²¹Ning dage anui je teiwang gai dai lau, dezai anui je Hei Tingwang, tew’nring gai dai bei ze bam le ra hangge zeu! ’Ndâge bambe luigum ze anui ting ramme tewrechi gai dai lau!

²²Nune anui je â nang ne tuâpat’nchichiak kai ’ndi de mei? Anui je ning lumpum-kadesang mei?