Read Zeme Naga EZEKIEL 1 Bible Online

EZEKIEL 1 - Zeme Naga bible

EZEKIEL 1

¹Tingkum himreu ze kêu medai ze hezie mengeu mai ge tingkupeu Buzibe na I Ezekielbe Babilon gene Kebar geukung ge Judame kebang changme ruage I bam de lei. Tinggîm lat kai de lei, zai Hera gu keliâbe I ngau de lei.

²(Chize heguang Jehoiakinbe kebang changbe tingkum pamengeube kum ge de lei).

³Babilonram ge Kebar geukung ge Tingwang ne achu ka’mpaube I seu de lei, zai Tingwang ba ranchi a peireige bam di de lei.

⁴Zai I piehang gai dege tingpeî ’mbene natri kechibe guiwangbe I ngau de lei. Mauzingkâng gene tingkakepitbe kepitplik-lik ze, pehiage babak-bak ze bam de lei. Zai tingkakepitbe gene tinggîm du ba bam de lei, zai hemi ’mbi ze hetageî ’mbi peling-lingbe gum lei.

⁵Zai tingkai natri zuilung ge mâ-keringbe medai ziemmena luigum ze I ngau de lei,

⁶kane pe ju medai, zai pe kan ramme medai bam kam lei.

⁷Zai penui pî ramme ’nzeitun lei, zai penui pîdei ramme â getum pî’nchîn ramme gum lei. Hetageî ’mbi peling-lingbe penui ’mbi patbe gum lei.

⁸Zai penui kan ramme medai kangge heju medai zai ziemmena ba gumbe medai bam kam lei.

⁹Zai mâ-keringbe kan kena getuachube ge pe kantûn kena â kat-kat je deîtau lei; pe kan ramme châu medai getuachu lu, pebautew ze penui ’ngngai gai dege penui pum ramme â mâ de ’ngngai mak ze penui tatkeli mak ze tat lu lei.

¹⁰Mâ-keringbe medai ge heju luî châmcheî ze medai bam lei, ziemmena ju ne penui sua ’mbe bam lei, zai duilui ju ne hezat’mbia, zai getumsei ju ne heku’mbia, zai keliengdi ju ne bechai ’mbia bam lei.

¹¹Zai mâ-keringbe medai dage penui kan kena-na pung kam lei. Zai pe kantû kena deîtau ra getuachu gai de lei, zai pe kan kêdabe ramme â pe pum ge heluagit bam lei.

¹²Zai mârekaune keringbe ramme ’nsua penui tatbe luî tat’nzeitun ze tat kam lei, kêda-da ’mbe ’nreipie mak ze herui ne tat-tatbe ge penui tat ti de lei.

¹³Zai mârekaune keringbe ruage kebabe mechingheigie bambe gum, zai mârekaune keringbe ramme ruage keleu ramme gum ze kezitrai-rai ze bam lei; hemi â tauba bam de lei, zai hemi gene tingkakepitbe gum ze plik-lik bam lei.

¹⁴Mâ-rekaune keringbe ramme â tingkakepitbe gum ze plik-lik ze bam lei.

¹⁵Mâ-rekaune keringbe zat medai je I pie lage, bepîgua medai mâ-keringbe bambe ’nchui ge bam lei, zai kedei dungtaube I ngau de lei.

¹⁶Bepîgua medai ze ’nsamrap lei, zai pemîhungbe beril tingchu gum ze pa ’mbi bam kam lei, zai bepîgua kat lungge bepîgua kêdabe pelung sûngngang sing ge bepîgua kêdabe kat-kat bam lei.

¹⁷Zai penui tat dege bepîgua medai ne tatkai-kaibe ge penui tat bam lei, mâ de gi’nruirua mak ze penui sua ’mbe tat bam lei.

¹⁸Pe pigua medai ge bekunghia ramme benai betang ramme bam lei, pegua medai ge hemik ramme ne bamguâgit la lei.

¹⁹Zai mâ-keringbe zat medai ne tat bei dege bepîgua ramme du suitat bam de lei: Zai mâ-keringbe zat ramme ne kedei gene chu di dege bepîgua ramme du chu di de lei.

²⁰Mâ-keringbe zat ramme â herui ne tat ra lunei-neibe ’mbia penui tat bam lei, zai bepîgua ramme du herui chube ge nguachu de lei, mâ-keringbe zat ramme gu herui â bepîgua ramme ge bambe ziegeneu.

²¹Zai mâ-keringbe zat gu herui â bepîgua be bambe ziegene chiramme tat ti dege penui du tat ti de lei; zai chiramme ne sap bei dege penui du sap te lei; zai chiramme kedei gene teichu gai bei dege bepîgua ramme du nguachu-chu de lei.

²²Zai mâ-keringbe zat peî ramme peireige kristal tingchu plingbe ne tewgaibe gum ze mi ngauhingbe tingsung bam lei.

²³Chi tingsung kangge mâ-keringbe ramme kan liâm bam lei; pe taige penui kan ramme liâmpat ze bam lei, zai kêdabe kan kena zene penui pum tapchim ze bam lei.

²⁴Zai penui liamtatbe luage penui kan kakelapbe kuâ acheu ze I seu lei, sungkling ge hedui kagesuâkbe kuâ gum, zai hereikangme baudime ’ncheu gum, baudime ’ncheu kua gum, baudime ne samsabe kuâ gum, mâgetaleine tewchibe Hera kuâ gum ze bam de lei. Zai penui liam mak ze sau gai di dege â penui kan ramme ’nzui gai di lei.

²⁵Zai penui saudibe penui kan ’nzui gai dege penui peirei ’mbe tingsung gene mâ-kuâ ’nnang ze bam lei.

²⁶Penui peî ramme peireige tingsung peireige heguang-bamrâ luirun ze, sapphir chu ne tewgaibe bam lei, zai heguang-bamrâ luigumbe peireige ziemmena luigum ze bam lei.

²⁷Zai pe kia gene ’nrei ’mbe kangngâgeî ’nzinbe luigum ze hemi ne guâgit ze bambe luigum ze I ngau de lei, zai pe kia gene ’ngkang ’mbia ge hemi luigum ze pa’mbi sireba ze pechu guâgit ze bam de lei.

²⁸Tingruibe mai ge kemâu ge ’ngkîtplei ngaube luigum ze kebabe ’mbi ne pechu guâgit ze bam de lei. Ai teiliabe ze Tingwang ngeudibe gum de lei. Chize I ngau lu dege ’ngkum I kâukeu di de lei, zai samhatkaibe ne samsabe kuâ â I seu lei.