Read Zeme Naga EZEKIEL 10 Bible Online

EZEKIEL 10 - Zeme Naga bible

EZEKIEL 10

¹Zai I pie gai dege kerubme bau peireige tingsung ge sapphir chukâng gum ze heguang-bamrâ luigum ze ngau lei.

²Pa ne linen paî bâpeu je, “Kerub kangge timriang pigua ka’nruibe kakge gutchu lau, kerubme kakgene mechingkâng ning ba kena ne herakpuiting lu ze namdi lungge ’nruk kai be lau,” ze kacheu de lei. A mikngau sing gene pa tat ti de lei.

³Zai ziemmena gutbe luage kellumki ze tingpî ’mbia kerubme â sapbam de lei, zai helungbe kisîam ze kemua ne puigit ti de lei.

⁴Chidadege Tingwang ngeudibe ze kerubme dagene chu ze kemuiki peirei hekilung singgit bam di de lei, zai kilûng kemua ne puigit bam di de lei. Zai Tingwang ngeudibe kebabe ne teririe lung puigit ti de lei.

⁵Zai kerubme kan kuâ teririe hela riâ chang ze Hera, mâgetaleitewchipeu ne ka’mpaube kuâ gum ze seu de lei.

⁶Zai acheu lage, linen paî bâbepeu je, “Kerubme kakge timriang pigua ka’nruibe kakgene hemi lu le lau,” ze pa ne samdie gai bei ze pa gut ti de lei, zai bepîgua taige pa sapbam de lei.

⁷Zai kerub hangkat ne kerubme kakgene kerubme kakge hemi bambe ge pe ba getuagut lu, hemi lu lu ze linen paî bâbepeu ba ge pei bei de lei; zai pa ne lu lu ze hela zuapat ti de lei.

⁸Zai chige kerubme kan ramme kangge ziemmena luigum ze I ngau de lei.

⁹Zai I pie gai dege, pie le lau, kerubme taige bepîgua medai, kerub kat taige bepîgua kat, zai kerub kêdabe taige bepîgua kêdabe I ngau lei; zai timriang pigua ngaube tak ge beril chukâng luigum lei.

¹⁰Bepîgua medai luî bambe ngaube tak ze luîkatsiak ze ngau lei, bepîgua kat lungge bepîgua kêdabe bambe luigum ze ngau lei.

¹¹Penui tat dege bepîgua medai ne penui sualuî nguatat ti lei, penui tatbe ge kelik’nrui ze ’mpuimakbe ge tat mak lei; kane keraîbe zene ’nsuatatbe luî penui suitat bam lei, penui tatbe ge mâ de kelik’nrui mak lei.

¹²Bepîgua pelane ge, bekung ramme ge betang ramme ge, bepîgua ramme ge pemik ramme ne guâgit bam de lei, zai bepîgua medai ge du bamguâ kam lei.

¹³A kun ne I geseube ge chi timriang pigua ramme je kû ze, “Hei bepîgua ka’nruibai,” ze kacheu lei.

¹⁴Penui ’nteumena dage heju medai bam kam lei, heju raîlangbe â kerub ju lei, zai heju pakenabe â ziemmena ju lei, zai heju pakechumbe â duilui ju lei, zai heju pamedaibe â keliengdi ju lei.

¹⁵Zai kerubme je teichu di de lei. Aize Kebar geukung ge mâ-keringbe zat I ngaube luî sing de lei.

¹⁶Zai kerubme ne tat bei dege bepîgua ramme du penui dage nguasuitat ti de lei; zai kerubme ne kedei gene liamchu ra penui kan ramme getuapat bei dege bepîgua ramme du penui dagene kêda ’mbe ’nriktat mak lei.

¹⁷Mâ-keringbe zat ramme ne sap bei dege penui du sap ti de lei, zai penui ne chu bei dege chiramme du chu di lei, zai penui dage mâ-keringbe zat gu herui bambeibe ziegeneu.

¹⁸Zai Tingwang ngeudibe â hekilung gu kemui sâu nan ze kerubme peireige sap ti de lei.

¹⁹Zai kerubme ne penui kan kehingchu ze kedei gene penui liamchudibe a mik ne ngau sing de lei, penui pat bei dege bepîgua ramme du penui taige bam lei, Tingwang ki gu keriekemui tingbia ’mbia kemuiki ge penui sapbam de lei, zai Israelme Rapeu ngeudibe penui peireige bam lei.

²⁰Kebar geukung ge Israelme Rapeu kangge mâ-keringbe zat I ngaube ze airamme de lei, zai chize penui â kerubme lei be I chî di de lei.

²¹Zai penui hangkat dage heju gechâmbe medai, zai bekan medai la kam lei, zai penui kan ramme kangge ziemmena ba ramme luigum ze bam lei.

²²Zai penui ju ramme I ngaube tak ge Kebar geuki kung ge I ngaube heju benai ’nzuâtit te lei; zai ’nteumena penui sua luî penui tat’nzeitun ze tat ti de lei.