Read Zeme Naga EZEKIEL 11 Bible Online

EZEKIEL 11 - Zeme Naga bible

EZEKIEL 11

¹Zai Herui ne achu teichu lu ze tingbia ’mbia Tingwang gu keriekemui ge teiwang gai bei de lei. Zai pie le lau, kemuiki hiage ziemmena hang’ngkai ze mengeu ruage heguangsin hangna, Azzurbe na Ja-azaniabe benai Benaiabe na Pelatiabe je I ngau de lei.

²Zai Hera ne achu, “Ziemmena na gau, aime ze namdi ge tâ-kesiabe tew ra kelutewme, zai mâ-kesiabe tew ra geteigaime de lei;

³‘Hekitewbe ting mak kerei lei, aipau namdi ze hemei langbe li de lei, zai anui ze hemei de lei,’ kacheume bau zeu.

⁴Chidaze penui peireige mâ-ranglia’ntua be lau, Hei, ziemmena na gau, ranglia’ntua be lau,” ze kacheu de lei.

⁵Zai Tingwang gu Herui a peireige wangkeu lu ze achu, “Salia lau, Tingwang ne acheu ze sa lei: Aigum ze ningnui ka’nning lei, Hei Israel kiduîme gau, ningnui lung ge mâ-mâ wangchangbe ramme I chî kam lei.

⁶Aipau namdi ge ningnui ne tewchatme ze pungbi-bi la de lei, zai ’mpuîrikki ge ningnui ne tewchatkaibe ne puigit la de lei.

⁷Chidadege Tingwang HERA ne acheu ze rang lei: Ningnui ne tewchat lu ze chige kaibe ze, chize hemei de lei, zai aipau namdi ze hemei langbe heli de lei; kane chi pezuilung gene I ne ningchu lupat kai gu lei.

⁸Hiazutkie je ningnui hing da, zai I ne ningnui peireige hiazutkie teiwang gai gu lei, ze Tingwang Hera ne rang lei.

⁹Chiramme ruagene I ne ningnui je lupat lu ze, hesangme ba ge ningnui je I ne pei gai bei ze ningnui je penui ne samram ze bam gu lei.

¹⁰Hiazutkie mui ge ningnui kau gai gu, zai Israelme gu heramrai gene I ne ningnui je samram gai gu lei, dezai I ze Tingwang de lei be ningnui chî gu lei.

¹¹Aipau namdi ze ningnui gu hemei langbe li chang ra mak lei, zai chipau zuilung ge ningnui zene hemei chang ra mak lei; Israelme gu heramrai gene ningnui je I ne samram gu lei;

¹²I â Tingwang lei be ningnui chî gu lei, a gu hingde ge ningnui tat mak, zai I ne samramgaibeibe ningnui tei mak, kane ningnui huâzie ge heramzat gu hingde-sie ze ningnui sui ze tei di daseu,” ze kacheu de lei.

¹³Zai acheu lage sam I sabe luage Benaiabe na Pelatiabe chai di de lei. Chidadege â kedei ge I kei’ngkumkeu lu, I a laîkai ze ’nrung je, “Hei, Tingwang HERA gau, Israelme ruage ’nsakpatbe tew’ngga kam ’nde ra de mei?” ze I kacheu de lei.

¹⁴Zai Tingwang gu sam a dage wangkeu ze,

¹⁵“Ziemmena na gau, ning puiname, ning kiduîme benai nang nguakebangtewme, zai Israelbe kiduîme leine penui ’nteumena Jerusalem ge lungme ne, ‘Penui â Tingwang dagene tat’ndeu de lei, aipau heram â anui lung ra anui hang pei gai ’nde lei,’ ze kacheu de lei.

¹⁶Chidadege Tingwang HERA ne acheu ze rang lei, ‘I ne penui je kedeu ’mbe heramzatme ruage tuâpat kai leusede, zai heram ramme ge I ne hûtimrarip kai leusede beting keduîne hangge penui bambe heram ge penui hangge pebâm ka’nchibe I ne chang bei de lei,’ ze acheu zeu.

¹⁷Chidaze ‘Tingwang HERA ne acheu sa lei: Heram ramme ge ningnui lungrarip ze lungdibe ze, hezat kêdame ruagene ningnui je I ne teiwang’ndui gai dai gu lei, zai Israelram ningnui je I pei dai gu lei,’ ze acheu sa gai lau.

¹⁸Zai chige penui wang dai dezai mâ-mâ kahebâbe leine zai mâ-katenetbe leine chigene penui lutua ’ndu lei.

¹⁹Chidezai penui dage helungsui kat zai helung karchibe penui dage I kai gu lei; zai hemeipum gene helungchibe I ne lutua lu ze, helung ka’nchiapbe penui dage I pei gai gu lei.

²⁰A gu hingde rawdiakkaibe ge penui tat ku, zai a gu samriagaibe penui tei gu, zai chize penui tew gu lei; dezai a gu ziemmena penui chang gu, zai I ne penui Rapeu chang gu lei.

²¹Kane mâ-kahebâbe ramme benai ngaukatenetbe ramme ge penui lung tatkaime je penui tatew ramme hangge I peiruî gu lei, ze Tingwang ne kacheu de lei,” ze kacheu de lei.

²²Dadege kerubme â penui kan kehingchu ze bam lei, zai penui hiage timriang pigua ramme bam lei; zai Israelme Rapeu ngeudibe penui peireige bam lei.

²³Zai namdi zuilung gene Tingwang ngeudibe chu di de lei, namdi gene tingbia ’mbia kedeiloa kedibe peireige sap ti de lei.

²⁴Zai Herui ne achu teichu lu, keliâbe gene achu Hera gu Herui ne Kaldiame ram ge kebang chang ze bamme dage achu nguachang gai bei de lei. Zai chi keliâbe I ngaube ze achu sâu gai ’ndi de lei.

²⁵Chidadege Tingwang ne achu teiliabe ramme leine kebangme je I salia bei de lei.